أنا والحياة ... والخيانة الــــــ ؟؟؟؟

**نور العمر** · 15-05-2009 09:39 PM

منذ فترة طويلة مبتعدة عن التليفزيون تماما
ولا حتى البرامج الاخبارية ... دايما على الكارتون للولاد
بعرف اخبار الدنيا أو رتوش منها
من زمايلي في الشغل أو من المنتدى لو عرض قضية مثارة

النهاردة فتحت التليفزيون ... واتمردت على الكارتون
وإذ به برنامج ... أنا والحياة ... للفنان الجميل الانسان حسين فهمي
كان بيعرض مشكلة ... ( الخيانة الزوجية ) ... وكانت الصدمة
من إلللي سمعتوا اتقال من مداخلات تليفونية
معنديش غير ( حسبنا الله ونعم الوكيل ) في كل ظالم خاين مفتري .... ( حسبنا الله ونعم الوكيل بحق مداد كلمات الله التامات )
حرام والله العظيم حرام ... دي مش مسألة الست هي السبب في إن زوجها يخونها ... ( ربنا قاللك اتجوز في الحلال متمشيش في الحرام )
دي مسألة خيانة وقلة دين وقلة احترام بتجري في دم الرجالة إللي من النوع ده .... وحرام بقا وألف حرام تجيبوا العتاب على الستات ... وكفاية يا رجالة يا خاينين تعلقوا جريمتكوا على شماعة غيركوا
وربنا يحفظ الرجال المحترمين المتدينين إللي بيتقوا الله في زوجاتهم ... ويحفظ زوجاتهم وأطفالهم من كل شر

ويا رب يا رب يا رب يا رب ... تجيب حق كل ست اتجرحت واتأذت ... وتحول كل ظالم مفتري خاين ... عبرة وعظة لمن لا يتعظ ... ربنا موجود وبصير وعليم وخبير وحق وعدل
وإنا لله وإنا إليه راجعون

**Terrible_DaRsH** · 15-05-2009 10:30 PM

مخدرات + فراغ + احباط ( رجال ) .

مــــــــع

قلة عقل و دين + طــمــع + تدخل فى شئون الغير + التمرد و الافترا على نعمة ربنا .. ( سيدات ) .

= اسرة مصرية .

**memohamada** · 15-05-2009 10:39 PM

على فكرة يا نور معظم المكالمات الى بتيجى لبرامج التليفيزيون متفبركة بهدف اثارة الموضوع و زيادة عدد المشاهدين مش اكتر

و بعدين لو الخيانة الزوجية منتشرة قوى كدة , يبقى لية عمرى ماسمعت عن حد اعرفة مراتة ظبطتة مع واحدة تانية او العكس و انتى برضة هل سمعتى قبل كدة عن حد تعرفية اتحط فى الموقف دة غير من اخبار الحوادث مثلا او التليفيزيون ؟
طب ياستى نشهد الاخوة الاعضاء مابينا و احنا ماشاء الله 30 الف عضو تقريبا , كام واحد مننا سمع عن حد هو يعرفة متورط فى موضوع الخيانة الزوجية دى ؟

قيسى بقى على كدة مواضيع كتير بتتناقش فى التليفيزيون و هى اما ملهاش وجود اصلا فى الواقع او بالكتير موجودة فى حالات نادرة جدا

عن نفسى انا مبصدقش 90% من البرامج الحوارية الى فى التليفيزيون اصلا و ال 10% الباقين بحكم عقلى الاول و بعدين اشوف اصدق ولا لا

**نور العمر** · 15-05-2009 10:54 PM

لا .. المكالمات إللي على الهوا حقيقة
وصوت الستات إللي اتكلمت بمنتهى الاسى .. حقيقة
والوجوم إللي صاب حسين فهمي وشله عن إنه يرد ... حقيقة
والخيانة الزوجية ... حقيقة وموجودة ومنتشرة ... وسمعت عنها بنفسي كتيير من ناس قريبين وقوي كمان
بس هي بتبدأ خروجات ومشاوير غامضة ومجهولة
وبعدها تليفونات ورنات وماسجات
وبعدها ... وبعد إللي بعدها ... وبعدهم ..... خراب البيت ... للأسف

ولو الرؤية زي ما بتحكي ... يبقا يا ريت .. ده شيء يطمني طبعا

**نور العمر** · 15-05-2009 11:01 PM

المشاركة الأصلية كتبت بواسطة Terrible_DaRsH

مخدرات + فراغ + احباط ( رجال ) .

مــــــــع

قلة عقل و دين + طــمــع + تدخل فى شئون الغير + التمرد و الافترا على نعمة ربنا .. ( سيدات ) .

= اسرة مصرية

.

عرفت إن الستات ( ناقصة دين - وعقل أحيانا)
لكن شوفت كتييييير جدا رجال منعدمي الدين
الطمع دي مسألة نسبية وبيئية
تدخل في شئون الغير = محدش عنده وفت يكفي حاله عشان يدخل في شئون الغير
التمرد والافترا على نعمة ربنا = شوفتها كتييييير جدا في رجالة ربنا إداهم من وسع فكانت النتيجة يظلمو ويفترو
المخدرات = كل الرجالة بتجرب و90 % بيستمر
فراغ = من أين لك هذه الكلمة ده حتى العاطل لازم ما يكونش عنده وقت من كتر ما بيدور على شغل
إحباط = ده حال كل المصريين بأطفالهم حتى

**Terrible_DaRsH** · 15-05-2009 11:14 PM

المشاركة الأصلية كتبت بواسطة نور العمر

تدخل في شئون الغير = محدش عنده وفت يكفي حاله عشان يدخل في شئون الغير

لالالا لا اتفق معاكى نهائي بخصوص النقطة دى ..

اكثر وقت السيدات فى مصر ايا كان مستواهم بيكون فى القيل و القال و فلانة عملت و فلانة سوت و فلانة راحت و فلانة جت و هكــذا ..

نسبة السيدات اللى راضيين بحياتهم كشكل عمومى قليلين جـــــــــــدا جدا ...

البطالة بتؤدى الى الفراغ فبالتالى الفراغ بيؤدى الى المخدرات و التسكع فى الشوارع و التمرد على الحياة بصفة اساسية ..

و للاسف بتبتدى المأساة الجديدة ب الحياة الزوجية لانها بتكون ملتقى المشاكل الشخصية و الاسرية مع بعض ..

**icehearted girl** · 15-05-2009 11:17 PM

على فكرة يا نور معظم المكالمات الى بتيجى لبرامج التليفيزيون متفبركة بهدف اثارة الموضوع و زيادة عدد المشاهدين مش اكتر

فعلا يا نور

ولو انهم تعبوا نفسهم شوية ودوروا فعلا علي الناس اللي بتعاني من المشكلة دي هيلاقوا مشاكل افظع بكتير

واكثر اثارة

**hamedo0** · 16-05-2009 01:11 AM

يا جدعان خيانات زوجيه ايه بس هو في حد في البلد فاضي يهرش
اذا كان واحد متجوز بيجري في شغل الصبح وبعد الضهر عشان يوفر للعائلته حياه كريمه واذا كان شاب طالع عينه عشان يكاون نفسه او يجيب شقه
يبقي الفراغ جاى عند الناس المعها فلوس او مش بتفكر في العيشه والعيشنها

**aif** · 16-05-2009 10:11 AM

اختي الفاضلة نور العمر
انصحك ارجعي للكارتون .....
برامج الحوار والمكالمات دي انا مقاطعها من سنييين طويلة ... لأني ببساطة لا أثق بالاعلام عموما ... إلا فيما ندر
اسوء شيء في بلدنا الحبيب ..... الاعلام
البرامج البشعة دي مسببة مشاكل لا حصر لها عند الناس
انا ليا أقارب كتير اوي في الخارج .... لاحظت انهم لما بينزلو اجازة في مصر بيبقو خايفين من كل حاجة في مصر وعندهم كم رهيب من الاحباط والقرف من البلد واللي فيها .... وبالتدريج عرف السبب .... ببساطة هو متابعتهم للبرامج المصائبية للقنوات المصرية
لو لاحظتى ح تلاقي البرامج اليومية دي مش بتجيب غير المصايب ... مع بعض التهويل ... وبعض المبالغة ... وبعض اثارة المشاعر ....طبعا لزوم الفرقعة الاعلامية .... وكله بحسابه

تلاقي الخبر العادي بقى كارثة قومية ..... وطبعا اللي عايشين برة مصر بيستقو معلوماتهم عن بلدهم ... من العاشرة مساء ... البيت بيتك ... حالة حوار .... 9000 دقيقة ...وحسين فهمي ..... وغيرهم ... ويتفرجو ومتخيلين ان هو ده المجتمع المصري ....
.....
انا بأتفرج ع الجزيرة الوثائقية وبراعم و قنوات اطفال مع ابراهيم و بعض قنوات الاخبار غير المصرية و قنوات رياضية اوقات مسابقات العاب القوي وما شابهها
بس
ارجعي للكارتون يا نور

الموضوع: أنا والحياة ... والخيانة الــــــ ؟؟؟؟

LinkBack

أدوات الموضوع

عرض

أنا والحياة ... والخيانة الــــــ ؟؟؟؟ - انشر الموضوع فى :

-

-

-

-

-

-

المواضيع المتشابهه

اتعلم ازاى تركب الــــــ rpm

لبست مخالفة اول يوم العيد الصبح بسبب السايس الــــــ---

تجربتي مع المرض .... والحياة

الكلمات الدلالية لهذا الموضوع

المفضلات

المفضلات

ضوابط المشاركة