الموضوع: استراتيجية تطوير شهاب 3

اولا يا جماعة شكرا علي الردود واهتمامكو بالصناعة الايرانية الحديثة وجهودها الرامية للصمود امام القوى المبرياليه العالمية والتي ان دلت فهي تدل علي مدى تمسكوا بمبادئ جماعتنا ( الشكمان هو الحل ) والتي ستثمر خيرا ان شاء في سبيل جهادنا المقدس ضد ال ال ( اهو ضد اي حاجة وخلاص )


(( تنوية هااااااااااام ))

هذة المعلومات سرية جدا والتعليق عليها او حتي مجرد الاطلاع قد يؤدى بك الي مشاكل كبرى مع جهات استخبراتية معادية ( حد فاهم حاجة !!!)











ديه فاتورة الحساب طالعة من التوكيل وزي ما انتو شايفين ان الاسعار مبالغ فيها حبتين وطبعا ده الاسلوب اللي بيتبعة اي مركز صيانة في التعامل مع شركات التوكيل يضرب سعر عاااالي جدا والمهندس بتاع المعاينة يفاصل فيوصل في الاخر للسعر اللي هو عايزة ولا عزاء لصاحب السيارة
الادهي والامر هو ما يحدث في قطع الغيار يعني مثلا ممكن المركز يقنع المهندس بتاع التامين انة هيغير رفرف وبعدين ميغيروش ويسمكرة بس ( علي السخن بحموات ) وممكن يعرفك الحقيقية او لاء ولو عرفك فبيفهمك ان ده في صالحك عشان العربية تبقي كلها فابريكا واي كلام في اي كلام

الخدعة التانية الاشهر هي خدعة وش الفانوس اللي بيتغيرلك وتتحاسب عليه علي انة فانوس كامل ( طبعا مش انت اللي بتدفع شركة التامين هي اللي بتحاسب ) بس لو انت عارف اعتقد انك هتشيل الوزر كمان ده بالاضافة لانة يحاسبك علي قطع غيار اصلية ويركب مضروبة وهكذا

الكلام ده مش مقصود بيه المركز اللي اتعاملت معاه تحديدا لاكن ديه سلبيات شوفتها في مراكز تانية في رحلة البحث عن مركز جيد وكمان سمعتها من المهندس بتاع التامينات

الخدعة الكبرى
في الغالب حضرتك لو جديد في الكار 8) مش هتعرف اي حاجة عن تفاصيل المقايسة والفواتير اللي بتطلع من مركز الاصلاح وانت بتحملها دون وعي لشركة التامين لاكن لو انت برووم ( حلوة بروم ديه :lol: ) هتعرف ان المركز بتاع الاصلاح سافح الشركة بتاعة التامين وانت طيشة في النص وساعتها قدامك حل من اتنين اما تبقي راجل ولد راجل وتقف وجفة رادل

يا اما تنصص مع مركز الاصلاح وتعملوا سبوبة مع بعضيكوا :twisted:

بس خد بالك لو صاحبنا بتاع مركز الاصلاح ولع لك في العربية او دهنهالك بمونيكير اظافر بدل البوية او حطلك حبهان في الشكمان ولا هتعرف تفتح بؤئك وهتاخد عربيتك زي البوبي مكسور العين مرفوع الديل ولمواخذة

فنصيحة من اخ لاقدر الله لو عربيتك حصل فيها حاجة وهتستخدم التامين متخليش عربيتك سبب في ان حد يسرق حد حتي ولو كان هينوبك من الحب جانب



الخطوة التانية هي تركيب الجنوط والجاوتش

مقاس الفابريكا كان 165/65/13

المقاس المفتكس هو 175/55/14 بس المقاس ده ملقيتهوش وبالعافية لقيت

185/55/14

( ليه اخترت المقاس ده )

مبدئيا انا بحب ان العربية تبقي سبورتي شوية كمان عمليا انا فعلا بجري في حتت فيها رملة او تراب او مياة وكل ده كان بيخلي العجل يفرك مع التسارع او يزحف مع الفرملة
وده لعيب في النقشة الغبية الاولي
ده غير خامة الكاوتش اللي افتدت مطاطيتها من سوء التخزين
كمان المقاس الاستوك مصمم اساسا للعربية الاصلية 1100 سي سي كاربراتير
وشهاب 3 1300 سي سي انجكشن مع نفس الوزن القديم وده بيديك احساس ان العربية ريشة في هو فكانت محتاجة حاجة تكلبشها في الارض شوية غير الاسبيويلر المهم نرجع لموضوع الكاوشت :lol:

قولت لازم اعرض الكاوتش
واغير النقشة
وشكليا لازم اكبر الجنط ل 14 بس عايز اديلو شكل 15 وفي نفس زات الوقت مأثرش علي المحيط الاجمالي للعجلة

ومن هنا جه المقاس الفتكاسي اللي انا جبتة




تاني اهم خطوة هي تركيب الجنوط الاسبور وطبعا انتوا عارفين ان الجنوط الاسبور ليها وظيفتين الاولانية انها اخف من الحديد وبالتالي اسهل في التدوير ( يعني استفادة اكبر من عزم المحرك )
الوظيفة التانية هيا انها بتفرش الكاوتش اكتر علي الارض وده لوحدة بيعرض الكاوتش حتى لو كان نفس المقاس وبالتالي ثبات اكبر في المناورات



خدبالك لما تيجي تغير الجنوط لاسيما باكبر اهتم ثم اهتم ثم اهتم بمسامير الجنط ويفضل انها تكون اكبر من الفابريكا بس متكونش اكبر اوي المسامير (((( واوعي تحك في ديسكات الفرامل اوعي ))))







اخيرا ده الشكل بعد التعديل وديه الحاجات اللي اتعدلت

1- دهان وسمكرة الجانبين الايمن والاييسر

2- تصليح خبطات صغيرة في الاكصادمات ( امامي وخلفي ) ورشهم بلون العربية
عشان الفابريكا مش بيجيو مدهونين

3- تركيب اسبيولر برايد اصلي ( استيراد عمل 125 بدهانة عشان كان مكسور واتصلح) والجديد مش موجود

4- تركيب دواسات سبور ميتل x كاوتش واشتريت شبشب بصباع (عشان مسوقش حافي تاني )

5- تغيير الكاوتش من 165/65/13 ال 185/55/14

6- تغيير جنوط الفابريكا 13 باخرى سبور 14 بوصة

-------------

التكاليف

1- فاتورة الاصلاح والدهان 2000 جنية فوق بس ديه المفروض اني استردها من التامين بعد ما تتشلفط شويتين

2- شوية اكراميات علي شوية اكسسوارات حسبة 200 جنية

3- اشتريت الجنوط 14 بوصة اندونيسي من اشرفكوا ب 1200 جنية

4- اشتريت الكاوتش accelera فرنسى ب 285 جنية للفردة

5- بعت الجنط القديم بالكاوتش ب 100 للفردة ( فردة الجنط والكاوتش )

الا ان القوى الشموليه المتعسفة بنت ديي ميبع هثقثقعهي ابت انها تهنيني بفرحتي فاغارت علي شهابي حبيبي في ثاني طلعاتة التجريبية مستخدمة اعتلي اسلحتها ( مقطورة بامب ) الميدانية مسلطة اقسي عتادتها ( مسامير الجنط الامامي لعجلة التريلا) لتخترق صاج شهاب 3 فتمزقة اربا من الخلف للامام وكل ده قبل ما الباش مهندز بتاع التامين ما يعاين العربية عشان يختم الفاتورة واكمل الاجرائات في سبيل استرداد مبلغ التامين ( حد فهم حاجة !!؟ )




يعني مقدرش اعمل اخطار بالحادثة ديه عشان العربية في حكم الحادثة الاولي
ومقدرش اصرف تكاليف الاصلاح الاولي الا لما المهندس يعاين العربية وتبقي سليمة

والي لقاء في حلقات قادمة