الموضوع: كارثة كارتون وبرامج الاطفال !!

لو تابعنا شوية برامج الاطفال هنلاقي فعلا الموضوع وصل لدرجة الكارثة
انا بصراحة مش مصدقة اللي بقيت اشوفه
خصوصا على القنوات الفضائية اللي بتذيع كارتون مدبلج
قصص غرامية ومشاهد حميمية بين ابطال الكارتون وخيانات عاطفيه
طيب دول ممكن نقول عليهم مستهدفين اطفال العرب لتخريب الباقي من الاخلاق

طيب الكارتون المصري ياترى ايه مشكلته
انا كنت بتفرج بالصدفة على برامج اطفال بالعرائس المتحركة مبقتش مصدقه الالفاظ اللي بتتقال على لسان شخصيات المسلسل الاطفالي
او الحركات المقززة اللي بيعملوها
انا شوفت مشهد مش فاكرة تفاصيله اوي.. عبارة عن شخصية منهم جايب ملابس داخلية رجالي وتقريبا بيحاول يثير قرف اللي قدامه عشان يطفشه
ايه القرف ده
طيب نربي اولادنا ازاي
ماهو صعب ويمكن مستحيل كمان نمنعهم من قنوات وبرامج الاطفال
ولو منعنا عنهم القنوات الغير مصرية ... طيب ماهو المصرية كمان مبقتش فارقه كتير


الله يرحم ايام الزمن الجميل اللي كنا عايشين فيه
ايام بوجي وطمطم ومن قبله بقلظ ونجوى ابراهيم وبرنامج بابا .... ههههههههههههههه نسيت اسمه وبرنامج ماما عفاف
كلها برامج كانت بتبث فينا الاخلاق والقيم بطريقه غير مباشرة وكنا بنتأثر بيها بجد


طيب الاجازة خلاص على الابواب نعمل ايه علشان ولادنا
تليفزيون مدمر وشارع اكتر واكتر تدمير واندية مفيش وقت للمتابعه ولا نفس وجامع لحفظ القرآن هايملوا منه لو مفيش ترفيه جنبه
طيب نعمل ايه؟؟!!