حكايتي مع الفليشيا

**spiderex777** · 16-05-2009 04:58 PM

حكايتي مع الفليشيا انا اشتريت فليشيا 97 من كام يوم و طبعا بعد يوم ابتدت العربية تسخن جدا رحت للميكانيكي و قاللي ان وش السلندر عاوز يتغير اشتريت وش سلندر جديد و صبابات و جلد صبابات و جوانات و كل حاجة الراجل قفل الوش الجديد و غيرت بوجيهات و زيت و ميه و كل حاجة تمام و طلعت بالعربية و مشيت بيها 3 كيلو و فجاة لقيتها بطلت دورت لقيت صوت ترزيع و خبط جامد جوه الموتور المهم اتصلت بيه جاللي و قطر العربية و قال يمكن قواعد الوش الجديد وقعت المهم راح حل المكنة و اتصلت بيه قالي انه لقي صباب مكسور و ده عيب الوش اللي انا اشتريته يا جماعة العربية سدت نفسي و الله يا ريت حد يدلني علي ميكانيكي سكودا بيجيب من الاخر احسن هاولع في العربية و في نفسي

**nezamy71** · 16-05-2009 07:12 PM

اهدأ كده وربنا يبارك لك في العربية ويملهالك بركة - الميكانيكي بتاعك غالبا من المفتيين بغير علم - انا متابع مع راجل فوق الممتاز اسمه سيد سكودا موجود في جسر السويس بجوار بنزينة كالتكس امام مصنع برتي بدار وخذ تليفونة 0165332977 - الراجل ده ابن التوكيل ومش بتاع اشتغالات وبيجيب من الاخر وان شاء الله يخلليلك العربية زي الفل - واصبر ودي ضريبة ركوب العربيات وعيون الناس وربنا يكرمك

**nezamy71** · 16-05-2009 07:56 PM

معليش رقم تليفون سيد سكودا الصحيح هو 0101107669 ونعتذر عن الخطأ

**hanyreload** · 16-05-2009 07:57 PM

يا ريت متولعش لا فى العربيه ولا فنفسك توكل على الله وولع فى الميكانيكى الى بيفتى عندك ده ومتخافش الفليشيا عربيه ممتازه وانشاء الله تتظبط وتبقى تمام وربنا يباركلك فيها.

**hanyalashkr** · 16-05-2009 11:21 PM

قلبى عندك يا باشا و الله لو كنت فى اسكندرية عندى مكيانيكى ممتاز بس عموما شوف توجيهات اخوانا فى القاهرة
و عموما كل شىء يتصلح و يتغير بس دور على الأصلى جوه الموتور

**spiderex777** · 17-05-2009 05:00 AM

ربنا يخليكوا و يبارك فيكوا و في عربياتكم يا جماعة المشكلة ان الواحد بيمشي ورا الميكانيكي عشان يرتاح و يقعد يدفع في فلوس حتي لو عارف ان الميكانيكي بيسرق بس بيبقي عاوز يخلص و للعلم لكل الناس اللي في المنتدي و نصيحة لوجه الله الميكانيكي هو صلاح سكودا اللي في العمرانية و انا كنت جايب عنوانه و تليفونه من المنتدي و بصراحة و انا واقف هناك في كام عربية كان خلص فيهم شغل و رجعوا النهاردة و انا باقفل الوش اللي طلع عيب خراطة و عيب تقفيل كاوتشة الصباب كانت مكسورة فعوجت الصباب و كسرته و هو مصمم ان الوش مش مظبوط مع اني شاري الوش جديد لانج بالفين و تلتميت جنيه

**tarekaf78** · 17-05-2009 01:42 PM

علي فكرة اسكودا عربية عادية و اي ميكانيكي يقدر يصلحها , دور علي ميكانيكي شاطر مش لازم يكون متخصص في سكودا

**tarekaf78** · 17-05-2009 02:07 PM

ممكن اعرف انت جبت العربية بكام, و انت كنت عارف ان العربية محتاجة يتعملها وش سلندر و انت بتشتريها ولا لأ , اصل كون ان الواحد يدفع 2300 بعد يوم واحد من شراة العربية دة كتيير اوى
بس انا علي حد علمي ان جوان وش السلندر بيتكلف حوالي 750 جنية بس , لكن 2300 جنية انت كدة بتتكلم في عمرة كاملة

**spiderex777** · 18-05-2009 09:22 AM

العربية انا اخدتها بتلاتين الف بس هي حالتها ممتازة زي ما تكون زيرو و مكيفة بس المشكلة اني كشفت عليها اساسيات و لما جربتها لقيتها كويسة جدا و قوية جدا المهم ان وش السلندر اللي ممكن يبقي ب 750 ده استيراد اما الوش الجديد من عند ابو الحسن في بين السرايات ب 2300

**tarekaf78** · 18-05-2009 02:54 PM

علي فكرة انا لفيت في السوق كتير و عربية فيليشيا 97 مكيفة و حالتها كويسة سعرها من 32000 الي 33000 الف يبقي صاحبها ممكن يكون عارف ان فيها العيب دة علشان كدة بعهالك بالسعر دة