الموضوع: مشاكل مع البطارية لو ركنت العربية يوم او اتنين

انا لقيت جهاز الشحن للبطاريات في العتبة بس صيني
10 امبير ب 210 جنية وفية لحد 30 امبير

اللى سمعته ان تونجر الشحن يعمل له حوالى 800 جنيه

حصل معايا موقف رذل اوي عالصبح
خلاني ضربت العربيه شلوتين ومشيت من الحر و الزهق

نزلت ادور العربيه هب مفيش نفس صمت القبور
ولا حتي تكه و لا نيله ادوس علي الكلاكس ولا الهوا
تعالي يا عم زق اصلها ركنه بقالها 3 ايام
ارمي ارمي ارمي
دارت قلت يمكن كنت ناسي حاجه شغاله فضت البطاريه (( مع اني متاكد اني مكنتش مشغل حاجه))
المهم وقفت بيها بتاع 5 دقايق حرق جامد عشان تشحن
قلت اجرب تاني
طفيت و ادور هبببببببب صمت القبور حبيبت قلبي لازم تحرقي دمي
ازق و ارمي تدور والكلاكس يشتغل و الكاسيت
اطفي و ادور هببب ولا الهوا
رحت ضاربها شلوتين كونغ فو و راكنها
ايه بقا ممكن العيب ؟؟؟؟
انا لسه مغير قواطيش البطاريه معرفش ليها علاقه ولا لا؟؟
الدينامو والمارش مشتكتش منهم ابل كده وسير الدينامو جديد
البطاريه مش قديمه
ممم المروحه بتشتغل كتير عشان الجو والزحمه الرهيبه
معرفش والله
ارجو الافاده سريعا قبل مروح للكهربائي اللي غالبا هيقرفني و يغني عليا و يبهدلني معاه
العربيه 131

ده موقف كان حصلي يا جماعه و كنت حاطه في قسم الورشه
المهم روحت للكهربائي غير مياخ البطاريه و شحنها ساعتين
و حطيتها تمام و فل الفل و دارت من اول تكه
متهيالي يبقي كده المارش براءه و لا ايه؟؟؟؟
قاسلي الدينامو و خلاني افتح النور و خلافه قالي تمام
كده المفروض الدينامو براقه و لا ايه؟؟؟
قالي بقي شوف بكره لو دارت فل الحمد لله لو مدارتش و لاقتها نامت تاني تجيب بطاريه
تاني يوم دورت دارت تمام ومن اول تكه بردو اتبسط اوي و لفيت بيها كده دقيقتين كويس
اليوم اللي بعديه بدور في كلاكس بس صوته عيان مش مقتوله قوي زي الاول بس تدي هه سنه مارش و بعد كده مش عارف اوصفهالكو ازاي و الله بس نور البطاريه وفرامل اليد في التابلو يعد يرعش جامد وانا لافف المفتاح و يعمل صوت تتتتتتتتتت زي لما تكهرب حاجه او توصل شراره بحديده
اليوم اللي بعديه نفس الفيلم
انا كنت خلاص رايح اشتري و احده غيرها بكره بس انتو قلقتوني بصراحه من حكايه تسريب شحن من الكابلات ملمسه او الضفيره
خصوصا اني لسه مغير قواطيش البطاريه و عيل صغير اللي ركبهم
فيمكن عمل حاجه غلط ولا حاجه
ارجو مساعدتييي سريعا البطاريه النسر فارتا 70 امبير بقالها سنه و نصف

نفس الموقف البايخ حصل تانى
بعد ما كنت فاكر ان العيب من جهاز الانذار وفصلته وقعدت كام يوم العربية بسم الله ما شاء الله حلوه
جيت ركنتها يوم الخميس و جيت النهارده السبت ادورها نفس الصوت تتكككككك ومفيش بطارية
فكده علشان اتاكد ويبقى اخر حاجه اعملها ان هدورها و فى اخر اليوم هفصل كابلات البطارية وهسيبها يومين وهشوف علشان اتاكد انا ده تسريب ولا لا و هقول ليكم على اللى بيحصل
على فكره البطارية برضه نسر فارتا 70 امبير

حبيت اقول لكم اخر الاحداث مع البطارية وتسريب الكهرباء
اتأكدت تانى ان البطارية فيها تسريب لانى كنت فاصل الكابلات لمده يومين ورجعت ركبها والحمد لله العربية دارت ( مش كانت هتدور لو كانت الكابلات موصوله اليومين اللى ركنتها فيهم)
فرحت اجرب كهربائى تانى ناس وصفولى انه كويس رحت هناك وفك كابل البطارية السالب وقعد يلمس القطاش مع قطب البطارية السالب من غير ما يفصلهم عن بعض و شاف الشرارة اللى بتطلع فلقيته زى ما يكون بيمشى دايرة الكهرباء و حبه حبه قال ان السبب وصله كهرباء من البطارية اللى واصلة للاكوليزر هيا الملمسه فظبطها وجرب تانى فكان مع اول لمسه من الكابل للقطب حصل شرارة صغيرة ( قال دى من السنتر ) والشرارة قطعت على طول وقعد يمشى الكابل على القطب من غير ما يفصلهم عن بعض فمفيش شرار طلع فقال كده سليم ولما سئلتة على الشرارة اللى بتطلع مع اول تلميسة للكابل مع القطب قال دى من السنتر فقفل على كده ودلوقتى رجعت اركن العربية تانى وهسيبها يومين كده علشان اتأكد ان مفيش حاجه بتسرب

نرجع تانى لموال البطارية
ركنت العربية يومين بعد ما الكهربائى ما قال لى انه صلح التسريب اللى فيها و جيت ادورها بعد كده لقيتها نايمه دورتها ورحت على الكهربائى شاف القطاشات لقى مفيش تسريب راح فتح غطيان البطارية وقال لى افتح النور العالى ( قال لى علشان يفضى شحنتها) فضل النور مولع لفترة مش اكتر من 5 دقايق بعد كده قطع فبعد البطارية ما فضت شحنتها راح الكهربائى جايب سلك و لمس بيه قطبى البطارية وبص على الاربع لقى فيها 3 اربع بيبقللوا فقال ان البطارية بايظه كده واخيرا جه الاثبات
رحت غيرت البطارية بواحده جديده اختها نسر فارتا سائلة ودفعت 200 جنيه و خد البطارية القديمه
ودلوقتى ركنت العربية تانى وهسيبها يومين علشان اعرف بقى العيب لسه موجود ولا اتحل بتغيير البطارية
يارب تبقى دى اخر حلقة فى مسلسل البطارية اللى طول معايا جامد ده

للأافادة حبيت أشارك معاكم انا عربيتي دوجان موديل 93 مكيفة كان عندي مشكلة من يومين جيت ادور العربية الصبح لما بدور كونتاكت كل كهربة العربية تسقط بالكامل مفيش اي ضوء في لمض التابلوه وبسمع صوت تكة المارش زي ما تكون البطارية ميتة سيبت الكونتاكت وجربت الكالاكس والكاسيت البطارية تمام شكيت في المارش رحت للكهربائي بعد ما دارت زق شاف المارش كلة تمام دور دارت في لحظة شكيت في سلك اللقط بتاع المارش اكدت علية لكن الكهربائي كان شاكك في البطارية مع انها ACdelco وكانت العين السحرية خضرا يعني مشحونة وتمام لكن أمبارح تاني نفس الموضوع حصل رحت عند أولاد علي سليمان في المهندسين بص برضة علي البطارية وبعد الفحص قالي البطارية بايظة بالرغم من ان العين السحرية خضرا قالي ان البطارية ممكن تبوظ والعين برضة خضرا المهم غيرت البطارية بنفس النوع وبرضة 55 أمبير كانت ب 270 خد القديمة ب 40 ودفعت 230 ضمان سنة أستبدال.
للأمانة ان معرفش البطارية بقالها أد ايه عمر لأني أشتريت العربية من سنة والبطارية فيها.