ألف ألف شكر لكل اللي مر و شاف الفيديو و قال رأيي انا بجد سعيد بكل التعليقات
انا هحكيلكم بقي .. بالنسبة لموضوع الممثلين .. انا هقولكم بالنسبة للموضوع ده رغم إني مكسوف منه بصراحة .. أصل دول مش ممثلين و مش صحابي حتي ! بصراحة دول ناس انا وقفتهم من الشارع و طلبت منهم يشاركوني في الفيديو !
الموضوع إن انا كنت مأجر كاميرا و شوية حاجات عشان أعمل مشروع تبع مادة في الجامعة .. و كنت متفق مع صحابي من اللي ليهم في التمثيل يجوا مع صحاب تانيين ييجوا بعربياتهم و واخد تصريح تصوير في الجامعة من 9 لواحدة .
اللي حصل إني كنت متفق مع 25 ممثل .. و 12 عربية .. جالي 3 ممثلين و عربيتين !! و اللي قافل موبايله .. و اللي مبيردش .. و اللي بيخلي والدته تقولي ده نايم !! و سلملي عالصحوبية !! مع إني أكدت عليهم بالكامل 3 مرات خلال الأسبوع الأخير و مرة قبل يوم التصوير و كله قاللي تمام، بس زي ما تقولوا كسلوا لأن كان التصوير يوم الأجازة و كسلوا ييجوا أكتوبر .. مع إن فيه ناس ساكنة جنب الجامعة !!
المهم لقيت نفسي الساعة 12 و لسة مصورتش حاجة .. فصورت مشهد اللي بيزبطوا دول و انا بصوره اللواء اللي ماسك أمن الجامعة قام نازل طاردني و قاللي تصريحك خلص، و ده كان معناه إني هسقط و مش هتخرج السنة دي أولاَ .. و إن راح عليا فلوس المعدات ثانياَ .. فا قمت طالع في الشارع إتفقت مع تاكسيين أصور بيهم .. و لميت شوية ناس معدية .. و صورت في الشارع بدون تصريح و كان زماني مقبوض عليا .. و طبعاَ كتبت مواقف جديدة لأن بتوع الحاجات القديمة مش موجودين و مفيش مكان .. مكنش فيه موقف في السكريبت الأصلي غير بتاع اللي بيزبطوا .. الباقي إتكتب ساعتها و كان قدامنا واحد بتاع أدوات صحية قمت واخد منه التواليت ده .. و طبعاَ لأن الناس دي معندهاش خلفية مكانوش مجمعين أوي .
و خلصت تصوير قمت طالع علي مكتب المونتاج و قلت أخليه Semi report لأن اللي صورته ميكفيش .. وقفت عند قهوة في السكة عملت اللقاءات دي .. و حتي التعليق الصوتي مكنش فيه وقت أروح ستوديو أسجله سجلته عالكاميرا .. قعدت منتجت شوية بس معجبنيش و المونتير كان بطئ و مش بيعمل اللي انا عايزه بالزبط قمت ماشي و رحت مكتب تاني معرفة بس بعيد شوية .. و قعدت معاه شغالين من 10 مساء لحد 7 الصبح .. خلصت قمت حاطه علي dvd و رايح مسلمه في الجامعة .
عامة انا طلعت من المشروع ده بمواقف و دروس كتير و أولها إعرف صاحبك و علم عليه !
و هو بصراحة مش معمول بمزاج و مش زي ما انا كنت عايز .. بس الحمد لله إنها جت علي قد كدة و الموضوع إتلم !
بالنسبة للكلاكسات انا كنت قاصد أجيب كلاكسات مش ساوند تراك عشان الزحمة مزعجة و الناس إيديها عالكلاكس علي طول حتي لو الطريق واقف أو الإشارة حمرا ! بس هي كانت عايزة توطي شوية فعلاَ .
شكراَ لكل من شاهد الفيديو و قال تعليق .
المفضلات