الموضوع: كيف تحذر خطأ الغير؟

الحمد لله
انا فعلا بتبع الطرف دى فى القياده
والف شكر ليك على التوضيح
جزاك الله كل خير

المشاركة الأصلية كتبت بواسطة _hany_

إحذر خطأ الغير
تعتبر هذه القاعده من أهم قواعد القياده السليمه، بل و يمكن اعتبارها الأهم على الاطلاق عند القياده في شوارع المحروسه.
لتطبيق هذه القاعده لابد من توافر عدة عوامل أساسيه:
1- عدم الانشغال نهائيا بغير الطريق.
2- الانتباه التام لكل الأصوات المحيطه بك.
3- النظر في المرآه الخلفيه مره كل فتره زمنيه قصيره (من 8-12 ثانيه)
4- اتباع قواعد القياده السليمه حتى لا تربك الآخرين فيرتكبو أخطاء قد تضرك.
5- استخدام الاشارات بشكل سليم و مراعاة استخدام الانتظار في حالة التوقف المفاجيء.


و نأتي لبعض المواقف اللتي ممكن نقع فيها و القاعده الذهبيه: توقع دائما الأسواء!!

- نفترض انت عايز تعدي نقل بمقطوره (يفضل تعدي من الشمال مش اليمين)، توقع دائما ان في أي لحظة ممكن يحدف عليك، و بالتالي قبل البدء في التحرك لازم تتأكد بنسبه كبيره ان السائق انتبهلك ووسعلك الطريق و برغم كده لازم تكون واخد حذرك عشان لو حصل حاجه تاخد قرار سريع و مترتبكش.

- لو ماشي و بتبص في المرايه لقيت واحد ماشي بنظام الغرز و مش هاممه حد، حاول توسعله و تديله مساحه يعدي منها لو فيه، لو مفيش مساحه اضرب انتظار و خليك ماشي بسرعه ثابته لو الطريق يسمح.

- لو لقيت واحد لازق فيك من ورا و مش عايز يسيب مسافه و انت ماشي على سرعه كبير، اضرب انتظار و امشي بسرعه ثابته و شاورله يعدي، أو لو مفيش مكان يهدي.

- لما تكون ماشي في شارع ضيق و فيه عربيات واقفه كتير، توقع دائما أي عربيه تتحرك فجأه و كمان توقع أي شخص ماشي ينطلك من بين العربيات، فممكن لو انت الصبح تستعمل الكلاكس ضغطه خفيفه كل فتره، أو لو باليل تقلب نور كل فتره بسيطه مع التركيز التام في أي حركه على الطريق.

- لما تكون ماشي و تشوف كلب على جنب الطريق، توقع انه هيعدي الشارع في أي لحظه، حتى لو شايفك و زمرتله، الكلاب الغبيه كتير.

- متحطش راسك براس أي ميكروباص، نص نقل، تاكسي قديم، لوري و طبعا نقل بمقطوره، لأن دول من كتر ما بيسوقو في الشارع بتنمو عندهم روح الاستهتار و الامبالاه (معظمهم مش كلهم طبعا)، فيستحسن تركز و انت بتتعامل معاهم.

و في النهايه الموضوع ده مجهود شخصي و ما به يحتمل الخطأ و الصواب و انا حبيت أفتح موضوع لنستفيد من خبرات بعض.
في انتظار اضافاتكم المفيده...

+1111111111111111111
:k49::k49::k49:

شكرا على الموضوع الوافى ده

فعلا مهم جدا الحذر من خطأ الغير

أنا فاكر مره كنت لسه جايب العربية من شهرين بس وواقف في اشاره عادي وكنت أول واحد في الأشاره على رأس الطريق وبعد ما وقفت بحوالي 20 ثانية كدة ببص في المرايه لقيت ميكروباص ورايا جاي بسرعه جدا وكأنه مش شايف الإشاره واقفه ولقيته بيقرب بسرعه بيقرب بيقرب وفيه لحظه رحت جايب الأول وطالع بسرعه 5 متر قدام ولقيته عمال يحتك بالرصيف ووقف في الآخر ورايا بالظبط فنزلت أشوف ايه الحكاية لقيته بيقولي الفرامل هربت مني ومكنتش عارف اقف !!!

يعني لو لا ستر ربنا وان انا شوفته في المرايا وطلعت 5 متر فقط كان زمانه بهدلني من ورا لذلك لازم نعمل حساب خطأ الغير حتى لو كنا واقفين في اشاره

كلام سليم يا باشا,,,,,,,,,,,

لازم فعلا تكون شديد الحذر من سواقين الميكروباسات لأن معظمهم مش بيفكر أو بيسيب مخه في البيت وهو خارج للأسف (طبعا مع احترامي للمحترم منهم) أما بالنسبة لسواقين الشاحنات و المقطورات فدول ناس محترفي سواقه وبعتبروا الطريق ملكهم وده بيربي عند معظمهم روح الاستهتار وبيني وبينكم المعظم منهم مش بيمشي إلا لما تكون البرشامة تحت لسانه
آسف على أسلوبي بس دي حقيقه

حقا القاعدة الذهبية فى مصر فى فن القيادة هى:

لا تتعلم فقط فنون القيادة و لكن تعلم أولا كيفية تفادى أخطاء الآخرين

الحرص ثم الحرص من اخطاء الغير
وربنا معانا جميعا