الموضوع: مؤيدى ومعارضى النيو سيراتو

المشاركة الأصلية كتبت بواسطة mohammedsamirabdeen

يا باشا معظم المعارضيين اعتراضهم ان ازاي عربية كوري 1600 سي سي يوصل سعرها 127 الف جنيه لكن لما الياريس مثلا الهاف مانيوال وصلت 100 الف ماحدش اتكلم ؟؟؟؟؟وكمان ازاي بقوتها وامكانيتها بقت تنافس الكورولا والمازدا 3 والسيفيك و الانسر وكمان دول خلوا الصني و الياريس والتيدا احسن منها حاجة غريبة جدا!!!!!!!!!!!!الكيا جاية وبشدة بجميع موديلاتها وان شاء الله الايام هتثبت

والله يا محمد باشا العربية دى اذواق وانت عارف ثقافة الشعب المصرى وغير كدا زى ما انت قلت كلة معترض على سعرها ما هما نزلو فئات كتير منها عشان ترضى جميع شرائح المجتمع بس ماينفعش تنافس الكورولا او السيفك او المازدا حاليا غير لما تثبت انها فعلا اد الكفاءه دى ولو حتى قلت بنسبة 30% دا طبعا بيرجع لفرق السعر الى انت بتاخد بية وعلى اد فلوسك انت بتركب والعربية انا شايفها كويسة وسعرها مش غالى طب ما انا قبل ما احجز النيو سيراتو كنت رايح اجيب جيتا كمفورت الكاملة ب 210 الف جنية ورجعت قلت اجيب بى ام دبليو 320 ورجعت قلت اجيب 520 موديل 2005 بس فى الاخر استقريت على النيو سيراتو لحد ما ربنا يكرمنى واجيب العربية الى عاوزها بس انا لما اعدت فيها وجربتها وشفت العربية عجبتنى وغير ان التوكيل محترم انما لما الناس بتتكلم على الجودة والخامة انت على اد فلوسك بتركب عربية يعنى انا اركب النيو سيراتو كاملة وماركبش الكورولا فاضية مع انى بحترم التويوتا جدا وبحترم اليابانى عموما بس دى امزجة ودا رأى الشخصى وعلى اد لحافك مد رجليك

والله ردك منطقى وكويس يا استاذ حسام بس فى حاجة فى العربية انها زى ما بتدينا الى عاوزينو فى الكماليات والاداء لازم تدينا فى الكفاءة والتحمل والتعود على شوارعنا الجميلة التى لا تخلى لا من مطب او من نئرة او بلاعة وانا بدعى ربنا ان العربية تكسف كل واحد قال فى حقها كلام مش مظبوط وانها تطلع عربية محترمة من كل حاجة وربنا يبارك لكل واحد اشتراها

طبعا أنا مؤيــد للنيو سيراتو

وده من خلال البحث و التجربة و الاستماع الى أراء أصحابها ...

العربية ناخدها واحدة واحدة من أول التصميم لحاااد الصيانة و خدمة ما بعد البيع

التصميم : اوروبي القلب و القالب على يد أحد أقوى مصممي ألمانيا (قلب الصناعة السياراتية الأوروبية) بيتر شراير و ده أنا عملت عنه موضوع في المنتدى العام .

المحرك و الشاسية : محرك مطور لانتاج طاقة أكبر لتحمل وزن السيارة و شاسيه محسن لتحمل الثني في الملفات

الثبات : معادلة الثبات أيضا عملت عنها موضوع في كيا

الكماليات : حدث ولا حرج و خصوصا الهاي لاين الي بتنافس عربيات كبيرة سعرا في الكماليات و وسائل الراحة

الأمان : توفر عوامل الأمان السلبي و الإيجابي

السعر : الي شايفه مناسب جدا حتى و ان تعدى 127 الف جنيه للهاي لاين

الضمان و خدمة ما بعد البيع : خمس سنوات أو 100,000 كم للوكيل و سنتين او 40,000 كم لجابر عبد الشهيد الخليجي
و على فكرة في استراليا ضمان خمس سنوات بدون حد أقصى للكيلومتر و ده ينم عن ثقة الشركة في نفسها لحد بعيد


ربنا يرزقنا الخير جميعا

استعمال العربية ومدى تحملها للشارع المصرى هو اللى حيقيمها صح مش الكماليات اللى موجودة فى كل العربيات الصينى "