نصيحه لاخواني البروتوناويين في موضوع التيل
الى الاخوه الاعزاء
حبيت انقل لكم تجربه حدثت معي بالفعل لكي تستفيدوا وماتقعوش في مشكلتي اللي كلنا محتارين فيها
اللي حصل معايا في صيانة ال 20000كم لسيارتي الجن 2 قالولي في التوكيل ان التيل الامامي خلص ومحتاج يتغير وطبعا انا كنت على عمايا وماكنتش اعرف ان التيل الاصلي بتاع العربيه اللي هو كان البوش الالماني مايتعوضش وفكرت ان اللي هيركب هو هو وماكنتش اعرف انه تيل من اسؤ انواع التيل اللي شفته في حياتي وغيرته ومااخدتش القديم ودي كانت تاني غلطه
لاني شفته وهو بيتغير ولقيته مليان ولما سألتهم هو كده خلص فعلا مع ان شكله مليان قالولي اه وصدقت انا وماتكلمتش ومن يومها وانا بعاني من التيل بتاع التوكيل من صوت صفاره وصوت احتكاك التيل بالطنابير وغيره وغيره من القرف
لحد مارحت الصيانه اللي بعدها وكانت صيانة ال 30000 كم
وقلتلهم الفرامل مش تمام ومش زي الاول وفي صوت صفاره
المهم قالولي ان التيل الخلفي خلص وعاوز يتغير
قلتلهم لا سيبوه انا هغيره بره وقالولي كده الطنابير هتفقد ضمانها قلتلهم عادي لان التيل بتاعكم سيء جدا
وفعلا رحت جبت تيل من اولاد منصور اللي هو ال fbk امامي وخلفي وقلت اغيرهم عند اي ميكانيكي شاطر
وسألت على ميكانيكي شاطر ورحتله النهارده وقلتله عاوز اكشف على التيل الامامي والخلفي واغيرهم لو محتاجين
والعربيه النهارده عامله 36600 كم من ساعة ماقالولي ان التيل الخلفي خلص في التوكيل 6600 كم
المهم كشف عليهم وقاللي ان التيل الخلفي لسه قدامه بدري وده الاصلي بتاع العربيه وقدامه ولا 10000 كم تاني عشان يخلص لسه مليان
ف حكيت له الموضوع ده واللي حصل ورد عليا وقاللي طيب فين هو التيل الامامي ده قلتله مانا صدقت انه خلص وسبتهولهم
قاللي حرام عليك كنت اخدته وهو اكيد لسه مليان وطبعا انا شفته بعيني والله كان اكتر من نصه
المهم ركب التيل الامامي بدلا من التيل بتاع التوكيل اللي بيصفر وقاللي ان خامته وحشه جدا
قاللي ده مش بيتاكل يعني ناشف اوي وكمان قاللي ان ال fbk مش قد كده بس احسن من بتاع التوكيل تخيلوا
المهم نصيحتي ماتغيروش التيل في التوكيل لو قالولوكم انه خلص وخصوصا الاصلي بتاع العربيه البوش
الا لما تكشفوا عليه بره عند حد ثقه
والله مايتعوضش التيل الاصلي ده
واخيرا حسبي الله ونعم الوكيل
وعموما انا ركبت التيل ال fbk ده النهارده وهبقى اقولكم ايه اخباره ولكن بعد ماستعمله كده 1000 كم حتى
تحياتي لاخواني الاعزاء