بلوف التكيهات!!!؟؟

**mmahermf** · 17-05-2009 05:02 PM

السلام عليكم ورحمة الله

أانا اشتريت سيارة نوبيرا موديل 2000 مواصفات أوروبي هيدروماتيك ورحت بنزينة موبيل في الطريق الموصل بين مساكن شيراتون لحد الكيلو 4.5 والنادي الأهلى مدينة نصر علشان أشوف حالتها من ناحية الشاسية والعفشة والموتور وخلافه واغير السيور والزيت والفلاتر مثل اي شخص شاري عربية مستعملة وميعرفش صاحبها كان بيعاملها ازاي..
المهم كله تمام من ناحية الشاسيه والصاج والعفشة وبعدين قلت اقيس كبس الموتور .. فك الراجل وطلع البوجيهات كأنها جديدة بدون بخر زيت أو سواد كأنك لسه مركبهم وبدأ يقيس كبس البساتم..
رقم 1 تمام
رقم 2 تمام
رقم 3 ماجبش معاه
رقم 4 تمام

قلقت فقال لى الموتور ناعم وسلس وسليم بس العربية واضح انها متعملش فيها حاجة غير تغيير الزيت من ساعة مجت من بلادها والسبب هو بلوف التكيهات "محجرة" لأنها شغالة كهرباء وممكن يكون زيت مركون فيها هو اللى موقف بعضهم..

وقال لى احنا نعمل فلاش ونغير زيت وفلتر ونقيس كبس تاني ونشوف ولو مظبتش نغير البلوف وعددهم 16 والواحد الاصلي ب50 حنيه وطبعا نفك كده كده علشان نغير سير الكاتينة وبلية مش فاكر اسمها واى حاجة بيمشي عليها السير لو مش كويسة (مش فاكر اسمهم)..

من فضلكم وبما انى لسه ممشيتش بالعربية ومعلوماتي في الحديث ضعيفة جدا وبحاول اتابعكم واستفيد من خبراتكم في مواضيعكم المختلفة ... ممكن تشوروا عليا مدي صحة الكلام ده واعمل ايه وعند مين واجيب قطع الغيار الأصلية منين لأني مش عايز أهين العربية علشان متهنيش لأني معاق وصعب جدا التحرك بدون عربية.

على فكرة السيارة شاريها من شخص سليم وكانت ملك خاله استيراد من بورسعيد وفاكك حظرها وأنا حاولت احصل على سيارة معاقين ولكني رسبت مرتين في الكومسيون..

وعمار يامصر..

آسف للإطالة وجزاكم الله خيرا..

والسلام عليكم ورحمة الله وبركاته...

م/ محمد ماهر

**samirayad** · 17-05-2009 05:16 PM

مبروك الأول يابشمهندس / محمد ..........ولو العربيه كويسه وصوت الموتور تمام .......ماتسمعش كلام الراجل ده ......وروح لميكانيكى تانى يغيرلك سير الكاتينه وطلمبة الميه والشداد ( وبارك الله فيما رزق ).......لأن ممكن يكون كان مركب عداد ضغط بايظ فى الغرفه رقم 3 ..................علشان يعمل عليك شغل ......ومفيش حاجه أسمها بلوف تاكيهات بتشتغل كهرباء ( دا شكله .......!!!!!!!!!!! )

**mmahermf** · 17-05-2009 05:43 PM

الف الف شكر يابشمهندس/ سمير على رد حضرتك السريع جدا...
بالنسبة لعداد الضغط كان هو هو اللى في يده وقاس بيه الاربعة وبالنسبة لموضوع البلوف ده طبعا حضرتك أدرى وحشوف ميكانيكي كويس بس لو ممكن تقولي رأيك لأني خايف يبقى الموتور خفيف مثلا ولكن أنا بطمن نفسي بأن العربية معايا سلسلة وناعمة جدا على الطريق وصوت الموتور هادي.. ياترى أنا بطمن نفسي ولا بضحك على نفسي؟!!!!
ممكن اي نصيحة او شواهد ممكن الاحظها لأني مش عايز اعتمد عليها في مشاويري الا بعد تغير اللى حضرتك قلته (انا دلوقت راكنها).

وشكرا لأهتمام حضرتك.

**mmahermf** · 17-05-2009 06:01 PM

أنا نسيت اقول ان العربية عاملة 124000 كم

**zocor742** · 17-05-2009 06:30 PM

بص يا استاذ على قد معرفتى ان بلوف التكيهات لما يكون فيها حاجة بتعمل زى صوت تكتكة بيكون واضح فى السلانسية لنى كان عندى حوار صوت التكتة دى ولما غيرت بلفين من ال16 الصوت بقى ناعم جدا الحمد لله
اما عن موضوع الموتور خفيف دى شوف العربية وهيا واقفة شكل العادم طبيعى ولا طالع اسود ولا ابيض ولا ازرق واتأكد بردو بأنك تزود بنزين والعربية واقفة واحدة واحدة لو فى دخنة فى العربية بشكل الغير الطبيعى يبقى ممكن تشك فى ان المتور خفيف

على فكرة انا تقريبا كانت عايش نفس السيناريو بتاعك بأختلاف السباب دى وكنت جايب العربية من المنطقة الحرة بورسعيد وطلع كل الهلوسة الى عندى ان العربية يكون فيها حاجة او المتور فى حاجة وكل واحد مش فاهم حاجة يفتى ويقولك دة فية وفية لحد ما دماغك هتمشى فأنصحك تشوف ميكانيكى فاهم كويس يعملك اتشيك على العربية كلها وحطها على كمبيوتر وشوف قراءة الحساسات ولو فى حاجة هتكون بسيطة جدا ان شاء اللة وعلى فكرة معظم الى فى العربية دة بيكون ناتج ان العربية بتفضل فترة كبيرة واقفة فى جراج المنطقة الحرة لحد ما يجى حد يشتريها المدة دى ممكن تكون طويلة شوية فازى ماتقول بردو العربية بتكون عايزة تدور بأستمرار والركنة دى ممكن ممكن تكون حجرت حاجة او كدة بس لا اقل ولا اكتر ان شاء الله خير
والف مبروك على العربية وربنا يديك خيرها ويبعد عنك شرها

**mmahermf** · 17-05-2009 06:41 PM

المشاركة الأصلية كتبت بواسطة zocor742

بص يا استاذ على قد معرفتى ان بلوف التكيهات لما يكون فيها حاجة بتعمل زى صوت تكتكة بيكون واضح فى السلانسية لنى كان عندى حوار صوت التكتة دى ولما غيرت بلفين من ال16 الصوت بقى ناعم جدا الحمد لله
اما عن موضوع الموتور خفيف دى شوف العربية وهيا واقفة شكل العادم طبيعى ولا طالع اسود ولا ابيض ولا ازرق واتأكد بردو بأنك تزود بنزين والعربية واقفة واحدة واحدة لو فى دخنة فى العربية بشكل الغير الطبيعى يبقى ممكن تشك فى ان المتور خفيف

على فكرة انا تقريبا كانت عايش نفس السيناريو بتاعك بأختلاف السباب دى وكنت جايب العربية من المنطقة الحرة بورسعيد وطلع كل الهلوسة الى عندى ان العربية يكون فيها حاجة او المتور فى حاجة وكل واحد مش فاهم حاجة يفتى ويقولك دة فية وفية لحد ما دماغك هتمشى فأنصحك تشوف ميكانيكى فاهم كويس يعملك اتشيك على العربية كلها وحطها على كمبيوتر وشوف قراءة الحساسات ولو فى حاجة هتكون بسيطة جدا ان شاء اللة وعلى فكرة معظم الى فى العربية دة بيكون ناتج ان العربية بتفضل فترة كبيرة واقفة فى جراج المنطقة الحرة لحد ما يجى حد يشتريها المدة دى ممكن تكون طويلة شوية فازى ماتقول بردو العربية بتكون عايزة تدور بأستمرار والركنة دى ممكن ممكن تكون حجرت حاجة او كدة بس لا اقل ولا اكتر ان شاء الله خير
والف مبروك على العربية وربنا يديك خيرها ويبعد عنك شرها

ألف شكرا وان شاء الله حشوف ميكانيكي بس يارب يكون بيفهم لأن الموتور تقريبا ملوش صوت وانا فاتح الكبوت وواقف قدامه وربنا يستر.

**Sherif Khalifa** · 17-05-2009 06:55 PM

بلوف التاكيهات او الكوستبانات بتعمل بضغط الزيت مش كهرباء

لو فيهم مشكلة مفروض تسمع صوت تكتكة من المتور و العربية لسة باردة
لو انت هتعمل شغل فى العربية مسل الصيانة الدورية بعد شراء سيارة مستعمل يفضل انك تغيرهم و تريح دماغك منهم
و التغير بيكون بالكشف عليهم واحد واحد و تغير التالف منهم فقط مش كلهم طبعا و الاهتدفع ثروة

لو مش هتعمل شغل فى العربية (دا غير مرجح) و الصوت بيختفى بعد العربية ما بتسخن (علشان لزوجة الزيت بتخف و حركتة بتكون اسهل)يبقا مفيش منهم مشكلة و انساهم

معرفش ا1ا كان ليهم علاقة بكبس المتور ولا لا بس بالمنطق مفيش علاقة
(لو مش بتسمع الصوت دا يبقا مفيش مشكلة منهم نهائى)

**zocor742** · 17-05-2009 07:00 PM

انا بشك ان بلوف التكيهات عندك سليمة نتيجة لكلامك ان الماتور صوتة ناعم لو كان فية حاجة فى البلوف اكيد هتسمع التكتكة دى وهتكون واضحة على فكرة

**samirayad** · 17-05-2009 08:56 PM

وبالنسبة لموضوع البلوف ده طبعا حضرتك أدرى وحشوف ميكانيكي كويس

من خلال كلامك يابشمهندس أنا عندى فعلا قناعه بأن مجموعة الكستبانات مفيش فيها حاجه......ويجب عدم الأعتماد على رأى الميكانيكى ده فى أى حاجه ( لأنه ببساطه بيقول أى كلام وطحينه )

لأني خايف يبقى الموتور خفيف مثلا

ماهى حالة الموتور بتبان من شكل العادم وسحبه وأستهلاك الزيت وكده .....وده حيتأكد معاك برضه مع الوقت ........ولو عملت أختبار كبس كويس فى مكان تانى أفضل وجبت القراءات حنعرف نحدد حالته لو حبيت ( وبعدين مش ممكن يكون فيه تلت غرف جابوا كبس كويس ورقم تلاته مجبتش حاجه ) وأنا حاسس أن الأختبار تم بطريقه مش مظبوطه ......والراجل أكبر دليل ( أى كلام )

ولكن أنا بطمن نفسي بأن العربية معايا سلسلة وناعمة جدا على الطريق وصوت الموتور هادي

طيب الواحد يقول أيه بعد الكلام الحلو ده ...............ألف مبروك طبعا

ياترى أنا بطمن نفسي ولا بضحك على نفسي؟!!!!

أعقلها وتوكل ...............وحقولك تعقلها أزاى فى الرد على الأقتباس القادم........

ممكن اي نصيحة او شواهد ممكن الاحظها لأني مش عايز اعتمد عليها في مشاويري الا بعد تغير اللى حضرتك قلته (انا دلوقت راكنها

غير الكاتينه وطلمبة الميه والشداد على طول ......وتابع مقاس الزيت والميه .....وأكشف على زيت الفتيس والفلتر بتاعه ....وأطمن على زيت الباور ..........ومية الردياتير

وشكرا لأهتمام حضرتك.

ياباشا تحت أمرك وأحنا أخواتك ......وحنفكر معاك فى أى أستفسار بأذن الله