الموضوع: للأسف غيرت كارتة الكنترول يونيت فى العربية

للأسف ياجماعة اطريت اغير الكارتة بتاعت العربية وجبت واحدة تانية انتم فكرين لما كنت عملت موضوع بخصوص ان الاربى ام بيعلى ويوطى لوحدة والعربية على السلانسية بعد ما غسلت العربية عشان تصدقوا ان كل لما بغسل العربية لازم يحصل حاجة فى العربية المهم كنت قولتلكم ان العربية اتظبتت تانى لوحديها ولكن العيب ظهر تانى بس مش بنفس الشكل كان العربية بتعلى لحد ار بى ام 2 وتفضل معلقة كدة وطبعا المبة التشيك منورة روحت للميكانيكى بتاعى احط العربية على اسكانر الكمبيوتر سجل العطل طبعا كشف على الحساس ملقاش حاجة فك الكارتة وحط واحدة تانية العربية اشتغلت تمام ويمكن احسن من الاول قبل ما الكارتة تبوظ كمان قالى طيب هنشوف كدة نفور الضفيرة ونركب واحدة تانية يمكن الضفيرة فيها حاجة ركبنا الضفيرة التانية وشغلنا الكارتة بتاعتى نفس المشكلة حطينا الكارتة الجديدة كل حاجة تمام كدى يبقى العيب من الكارتة نفسها روحنا مرجعين الضفيرة بتاعتى تانى وركبنا الكارتة الجديدة وشوفنا قراءة الحساسات والنتيجة كل حاجة زى الفل واحسن من الكارتة القديمة وصوت الماتور حسيت انة انعم من الاول وطلعنا جربنا العربية على الدولى سحب العربية والتجميع فوق الممتاز وبردو احسن من الكارتة القديمة لما كانت بدون عيب والعربية بتسحب حتى بعد ال120 كأنها بتجمع من صفر وانت طالع
طبعا انا مكنتش عامل حسابى نهائى على الكرتة دى ولا حتى جة فى دماغى ان العيب دة هيكون من الكارتة نفسها طيب سألت الميكانيكى تفتكر اية الى بوظها قالى اكيد فية مية حصلت الكارتة قولتلة ان غسلت العربية وبعد ما غسلتها حصل كدة قالى يبقى هو دة السبب طيب ازاى يا باش موهندس المية هتعدى الفيبر وهتخش لحد جوة طبعا مع ضغط المية العالى لو ركز مسدس المية على المكان دة او جنبة اكيد فى رزاز مية هيدخا ولو جة على الفيشة بالسلامة الكارتة كل واحد معاة نوبيرا يخلى بالة كويس من المية طبعا كلكم عرفين الكارتة فين فامتقربش منها مية وخد بالك من الى بيغسل العربية ونبهة على المكان عشان ياخد حظرة ودى صور الكارتة القديمة للى ماشفهاش قبل كدة وعلى فكرة انا اشتريتها استعمال بس بحالة ممتازة ب500 جنية وسمعت ارقام كتير 1000 و1200 ومش جديدة طبعا

طولت عليكم جدا بس اعمل اية قدر الله ما شاء فعل