سيمبول و لا افيو 5 و لا fvr

**essamfarid** · 18-05-2009 01:57 AM

السلام عليكم
انا معايا نوبيرا 98 استيراد جميع الكماليات اوتوماتيك بس تعبت منها جدا كل شويه مصاريف فقررت ابيعها و اقسط عربيه جديده بس محتار جدا بين :
1 - افيو 5 كامله اوتوماتيك
2- سيمبوا فول ابشن اوتوماتيك
3- fvr ( مش عارف في منها اتوماتيك و لا )
عموما ان يهمني الشكل الخارجي جدا و كمان ان العربية تكون اوتوماتك
انا مش غاوي السرعه و لا ال sport drive بس الامان و التبات على الطريق و الرفاهيه دي اهم حاجه و بصراحه مخرج الهونداي من حسابي علشان تقفيلها مش حلو + الشكل الخارجي مش بشايكة السيمبول مثلا
ارجو الرد بسرعة و يا ريت من مالكي النوعيات دي

**Tam** · 18-05-2009 02:20 AM

السلام عليكم..ممكن حضرتك تعمل مبدئيا مقارنة بسيطة بينهم..زي مثلا كدة:
1-السعر:-
أفيو كاملة هاتش باك أوتوماتيك 81000
FRV كاملة أوتوماتيك 90000
سيمبول أوتوماتيك 89990

2-السعة اللترية:-
أفيو 1500
FRV 1600
سيمبول 1400

وهكذا..
تبص على أسعار قطع الغيار
الكماليات الأساسية
الكماليات جودتها وقوتها(زي التكييف مثلا قوي ولا ضعيف)
وبعدين تبدأ تجمع أراء الناس ودي إيه عيوبها وإيه مميزاتها وكدة!
وفي الأول والأخر الراحة النفسية ثم الإستخارة إن شاء الله ربنا يوفقك
أنا عن نفسي باحب ال3 عربيات..بس frv الأول بعدها أفيو بعدها سيمبول
الFRV شايف إنها كويسة جدا بس 90000 شايف إنهم شوية كتير..بس مش مبالغ فيهم
ممكن تدخل في المنافسة البروتون سواء GEN2 أو persona لأنهم في رأيي المتواضع جداااا شبه ممتازين بالنسبة للفئة والسعر
وربنا يوفقك وأسف على الإطالة
السلام عليكم

18-05-2009 02:37 AM

بالنسبة لرينو سيمبول حضرتك مشكوراً تفضل بزيارة قسم رينو
يوجد (بالموضوعات المثبّتة) تقييم السيمبول , أسعار قطع غيار السيمبول .
مع الأخذ في الإعتبار بأن الإحساس ببرودة تكييفات السيارات الأوروبية بوجه عام أقل منه في سيارات شرق آسيا.
تمنياتي بالتوفيق فيما تستقر عليه عن قناعة.

**Hosam_Optrawy** · 18-05-2009 03:44 AM

شوف يا استاذ حضرتك قلت انك تعبت من النوبيرا عشان المصاريف يعنى مش عايز عربيه مكلفه
والرينو سيمبول هى اكثرهم تكلفه فى الصيانه الدوريه وقطع الغيار
برضه اسأل على الموضوع ده بالتفصيل عشان ممكن يكون الفرق بسيط بينها وبين الباقيين
بالنسبه للشكل الخارجى فال FRV والرينو سيمبول احلى من الافيو ولو ان الافيو مش وحشه برضه
بالنسبه للامان والكماليات فالسيمبول وال Frv يكسبوا فى النقطه دى لان الافيو مفيش عوامل امان نهائى
بالنسبه للمواتير
ال Frv موتور 1600 و 102 حصان
السيمول موتور 1400 و 98 حصان
الافيو موتور 1500 و 83 حصان
الاسعار
السيمبول اوتوماتيك 90 ال Frv اوتوماتيك 90 الافيو 5 ب 81
رأيى النهائى
حضرتك تسأل على اسعار الصيانه الدوريه وقطع الغيار فى السيمبول
لو مناسبين بالنسبه لك
ومش مهم عندك اعادة البيع
يبقى توكل على الله فى السيمبول
ال Frv برضه اسأل على صيانتها وقطع غيارها
هى عربيه كويسه واغلب اللى جابوها بيشكروا فيها
بس الخوف منها انها لسه جديده ومحدش عارف ايه نظامها واكيد اعادة البيع برضه مش هتبان دلوقتى
الافيو اوفر واحده فيهم سعرا ومصاريف واعلى اعادة بيع
لكنهم اقلهم اداءا وعوامل امان صفر
أرجو انى اكون افدتك وربنا يوفقك للى فيه الخير