الموضوع: معتقدات و اساطير خاطئة عن الطب (2)

بصراحة ردودكم الجميلة و تشجيعكم لى فى الجزء الأول من الموضوع شجعنى اكمله
نرجع تانى مع اسطورة تانية من اساطير العيون فى مصر (و العالم العربى)

*"أوعى تلبس النظارة كتير لحسن تتعود عليها و نظرك يضعف و ما تعرفش تشوف من غيرها"
....*
*"اقلع النظارة علشان تمرن عينك و تقوى نظرك و تقدر تستغنى عنها"
....*
*"انا كنت ماشى من غير نظارة و كنت شايف كويس و لما لبست النظارة ماعدتش اقدر اشوف من غيرها ، دى فعلا بتضعف النظر"

طبعا الثلاث جمل دول بنسمعهم كتير و فى النهاية مضمونهم واحد و هو ان النظارة بتضعف النظر و تسبب التعود (الإدمان) عليها...

و الكلام ده غير صحيح

و الحقيقة هى :
النظارة بتصلح النقص الموجود فى العين (مقاس العين) فقط و ينتج عن ذلك رؤية الصورة السليمة ، يعنى مثلا لو واحد عنده قصر نظر درجتين فالنقص ده بيمنع ان الصورة تقع على الشبكية و بالتالى يشوف صورة مزغللة ، و المفروض بيلبس نظارة 2.00- علشان تصلح النقص اللى موجود و الصورة تيجى على الشبكية و بالتالى يشوف صورة واضحة و كويسة.

و لو عرفنا ان اى تغيير فى مقاس العين سواء قصر او طول بيكون عادة نتيجة التغير فى معدل نمو العين و يتضح بسهولة ان النظارة اداة لتصليح الفرق فى المقاس فقط و غير مسئولة عن اى تغييرات فى حجم العين او درجة نموها (شئ منطقى) ، و يبقى لبس النظارة او قلعها مالوش دعوة بتغير مقاس العين
يعنى النظارة بريئة من مقولة اضعاف الإبصار
و فى نفس الوقت بننفى المقولة الكاذبة ان قلع النظارة بيمرن العين ، لأن لو قلعتها منين اجيب المقاس الناقص للرؤية السليمة اللى لازم يتوفر علشان الإنسان يشوف بوضوح ؟؟

طب يا ترى فعلا اللى بيتعود على النظارة صعب يقلعها ؟
فعلا دى حقيقة ..

لكن لحظة .. لازم نوضح الحقيقة من الأسطورة :
الحكاية دى بتحصل لأن الواحد بيتعود على صورة سليمة واضحة بدل المزغللة اللى كان بشوفها ، يبقى ازاى تطلب من المخ انه يتنازل عن الصورة الكويسة و يرجع يمشى بالمزغللة ؟؟ طبعا مش هايقبل
انا دايما احب ادى مثل للمريض اللى يسألنى السؤال ده بالمثال التالى :
"لو واحد طول عمره بياكل فول بس و ما يعرفش اصلا ان فيه اكل غير الفول ، طبعا مش ها يشتكى و يبقى راضى بالفول ، و لكن لو جيت يوم و اكلته فراخ و بيض و جبنة و كباب و سكالوب و بسلة و بامية و سلطة و بودنج و كنافة ... الخ:k31: ، و تانى يوم قدمت له الفول تانى ، طبعا مش حايقبله زى الأول ، ليه ؟ لأنه جرب حاجات اعلى و طبعا صعب ينزل لتحت بسهولة ، دى طبيعة بشرية .. الطموح للأفضل.
الواحد بيبقى ماشى عادى لأنه ما شافش غير اللى هو شايفه ، مافيش مقارنة ، و لكن لما يلبس النظارة بقى فيه مقارنة بين الصورة الواضحة للنظارة و الصورة المزغللة (اللى طول عمره ماشى بيها و لكن انكشفت حقيقتها دلوقت) ، فطبعا لازم المخ يفضل الصورة الأوضح و بالتالى الشخص يلاقى نفسه مش قادر يمشى من غير النظارة
و عموما النظارة من المنطلق ده تغيير للأحسن (من صورة غير واضحة الى صورة واضحة و نقية) و بالتالى المفروض انه تغيير مطلوب.
ارجو اكون وضحت النقطة دى و الى لقاء آخر ، و تحياتى

المشاركة الأصلية كتبت بواسطة ams

استشارة سريعة :
انا عندى قصر نظر و على ما اسمع ان العادى حدوث طول نظر بعد الاربعين عشان حاجة مش فاكر هى ايه-ممكن جفاف بس جفاف ايه بالظبط ؟الله اعلم -المهم انا لابس نظارة بتعالج قصر النظر ده . ايه اللى يحصل عند سن الاربعين ؟هل النظر هيطول تانى و ممكن استغنى عن النظارة ؟ ولا ان النظارة هتفضل حاكمة الرؤية و مش هيبقى فى تحسن ؟ و لا الكلام ده احسن حل ليه اكتبه على ورقه و اقطعها و ارميها فى الزبالة ؟!

للأسف دى احد الأفكار الخاطئة عندنا و انا كنت هاتكلم عنها لسه
باختصار شديد و لحد ما اشرحها ان شاء الله ، مابيحصلش طول نظر و لكن عدسة العين بتقل مرونتها ، يعنى بتنشف شوية (ده اللى حضرتك فهمت انه جفاف) ، و المفروض ان العدسة محتاجة المرونة دى علشان تزود قوتها و نقدر نقرأ و نشوف الحاجات القريبة ، فلما المرونة تقل نحتاج اننا نلبس (بداية من سن 45 سنة) نظارة قراءة و دى مقاسها بال +
و لو فى حالة حضرتك (عندك قصر نظر) يضاف هذا المقاس على مقاسك الأصلى و تبقى نظارة قراءة غير نظارتك الأصلية

احيانا لما بيكون المقاس ال + هو نفس مقاس نظارتك (اللى هى بال -) فبنقول للمريض : لما تيجى تقرأ ، اقلع نظارتك و اقرأ

هو ده سبب اللخبطة اللى بتحصل
و اتمنى اكون وضحت الموضوع
و تحياتى