الموضوع: إيـه اللـى بيحصـــل؟ (عن إغلاق شركة النصر للسيارات)

كانوا يطوروها و تجمع العربيات الهوندا سيفيك 1992 او التويوتا كرولا 1992 بدل الشاهين و الفيات ال 128 التعبانين

المشاركة الأصلية كتبت بواسطة فادى

تدمير الغرب للصناعات و الاقتصاد فى الدول النامية له خطط ثابتة و متبعة منذ عصور الاستعمار.
الغرب يريد الدول النامية مجرد مصدر للمواد الأولية فقط, لا أكثر,
و الكلام ده قائم فى مصر من ايام الاحتلال الانجليزى, لما كان الانجليز بيشتروا الورش المنتجة و يفتحوا بدل منها قهاوى و كباريهات.
و لما كانوا بياخدوا القطن و يصنعوه و يرجعهولنا تانى فى شكل ملابس.
و غير ذلك الكثير,
الكلام ده مش علينا احنا بس, يسرى كذلك على كل الدول النامية من أول البرازيل و كوبا لحد سريلانكا وصولا الى مصر و المغرب.
و ده مش بجيبه من عندى, و لا هو تبرير من الدول النامية, ده حاجة اعترف بها الغربيون انفسهم, الغرب بنفسه اعترف انه كان السبب فى افقار الدول النامية, أو على الأقل القوى اليسارية فى الغرب, و رغم ذلك, مازالت هذه الاعيب مستمرة.

وجهة نظرك و تحترم
بس بصراحة مش مقتنع بيها..
أصل ايه دوافع قوى الغرب دي إنهم يحطونا في دماغهم قوي كده ..
طب ما كانو يحاربو صناعة السيارات الكورية مثلا أو الماليزية حتى..
أنا رأيي بقى النصر دي مشكلتها هيكل إداري فاشل غير مبدع بعقلية متحجرة هو الي ضيع الشركة و بس كده

المشاركة الأصلية كتبت بواسطة dr_abooody

كانوا يطوروها و تجمع العربيات الهوندا سيفيك 1992 او التويوتا كرولا 1992 بدل الشاهين و الفيات ال 128 التعبانين

والله حتى لو جمعوا فيرارى ولامبورجينى هتلاقى برضه اللى ييجى يقول"اصل دى الفيرارى المصرى التعبانة"، زى ما بيحصل مع اى حاجة تتعمل فى مصر، مهو لما يجتمع الفساد الادارى مع الترهل الأدائى المميز للقطاع العام مع زبون عنده استعداد يشترى ليس فقط المنتج الصينى او الجنوب افريقى او الهندى او الايرانى ولكن حتى الاسرائيلى المهم انه ميكونش "منتج مصرى تعبان" ، يبقى فعلا نقفلها ونروح احسن ، هتفتح ليه اذا كان الزبون المصرى بيستعر انه يركب عربية مصرى حتى لو كانت مرسيدس وللا بى ام دبليو ، نقفل البلد كلها ونهاجر احسن ،

والله دى حاجه تزعل

الشيء اللي انا مش فاهمه ليه الشركة تحقق خسائر بالرغم من انه سياراتها كانت مطلوبة وتباع رغم وجود كل الموديلات الحديثة ورغم الأسعار المرتفعة جداً للشاهين، والحاجة الأغرب ليه مانزلتش الشاهين ضمن مشروع تكهين التاكسيات القديمة؟؟؟ أعتقد أنها كانت هاتبقى اختيار لكثير من اصحاب السيارات القديمة لأنها معروفة ومتجربة وقطع غيارها متوفرة وأي حد ممكن يصلحها والمشروع ده لوحده كان ممكن يعيد أحياء الشركة مش كده ولا أيه؟