مساعدة مطلوبة من الأستاذ سبعاوي على وجه السرعة

**الصاوي** · 29-09-2007 04:37 PM

قريبي معاه لانوس لسة جايبها و ظبتلها زوايا علشان كانت بتحدف يمين في التوكيل بعد اول الف
المهم انه بعد كده لقاها بتحدف برضه و رحنا كشفنا برة عند 3 مختلفين و النتيجة عند الثلاثة كلآتي:
الزوايا زي الفل تماما و مظبوطة بالسنتي و العجل كله في مكانه كنبر و كستر و خلافه يعني مفيش اي حاجة غريبة
بس بعد كده قريبي سابلي العربية و سافر لقيتها ساعات بتحدف و ساعات لأ و كل ما أعدي على مطب الاقيها بترمي مرة و مرة تانية لأ
طب ايه الأشياء اللي ممكن تخلي العربية ترمي كده او كده غير الزوايا؟؟
مع العلم ان الكاوتش طبعا جديد و بدلت مكانه من قدام لورا و من اليمين للشمال و مفيش فايدة
العجل اعيد ترصيصه و زي الفل
فزورة محتاجة الحل!!

**ahmed1981** · 29-09-2007 05:43 PM

طالما الحدفة ليها علاقة بالمطبات ممكن يكون المساعدين وحشين أو بايظين
إكشف على المساعدين
والله أعلم

**الصاوي** · 29-09-2007 05:49 PM

ممكن يكون المساعدين

انا بقول كده برضه و شكرا ليك و برضه مستني كلام سبعاوي

**أبو عبدالله** · 29-09-2007 05:54 PM

طالما الحدفة ليها علاقة بالمطبات ممكن يكون المساعدين وحشين أو بايظين

أكيد ذلك وممكن كمان يكون حاجه زي البيض بتاع العجل الامامي مبووش

**الصاوي** · 29-09-2007 06:02 PM

البيض بتاع العجل الامامي مبووش

العربية دي زيرو يا جدعان

**أبو عبدالله** · 29-09-2007 06:13 PM

ايه المشكلة وهيا زيرو
مش متقفله في مصر ومن مصانع ابو الفتوح يبقى مفيش مشكلة
طيب ما انا كنت شاري النوبيرا زيروا وكانت علبة التروس بايظه واتغيرت والعربيه لسه معملتشي 5 الاف كيلو
والطنابير اتغيرت 3 مرات
والفرامل زفت ومحدش بيعرف يعمل فيها حاجه

الكوري حاجه وتقفيل مصر هنا حاجه تانيه خالص

**hero** · 29-09-2007 08:19 PM

ممكن تلاحظ امتي بتحدف وتركز قوي مع الطريق او الاسفلت.....ساعات العربية بتكون واخدة ميل الطريق وتحس انها بتحدف لكن هي ماشية مع الطريق...
وممكن برضة لو في هوا جامد جاي من الشمال لليمين هتلاقي العربية فيها حدفة بسيطة يمين ودة بيبان في الطرق المفتوحة او السريعه..

دة طبعا لو اطمنت ان كل العفشة تمام ...

**الصاوي** · 29-09-2007 11:11 PM

ممكن تلاحظ امتي بتحدف وتركز قوي مع الطريق او الاسفلت.....ساعات العربية بتكون واخدة ميل الطريق وتحس انها بتحدف لكن هي ماشية مع الطريق...
وممكن برضة لو في هوا جامد جاي من الشمال لليمين هتلاقي العربية فيها حدفة بسيطة يمين ودة بيبان في الطرق المفتوحة او السريعه..

انا بستخدم العربية بقالي اسبوعين في كل الظروف الممكنة و سافرت بيها كمان و نفس الملاحظات بس ممكن يكون ايه غير الزوايا والكاوتش؟؟؟