أخيرا استقريت علي الاوبترا

**m.atef** · 29-09-2007 06:38 PM

اول حاجة انا لازم اشكر كل القائمين والمشتركين في المنتدي بجد لانه فعلا بيسهل علي الناس حاجات كتيره جدا وبيوفر معلومات كثيرة جدا وقيمة جداجدا من الناس اللي معاها العربية مش من التجار اللي يهموهم البيع وبس.
ثانيا انا اول مرة اشترك في اي منتدي واشارك فيه بس اشتركت هنا لأني أقتنعت فعلا بفكرة واهمية التواصل بين الناس واخذ الراي من ناس معرفهاش لما حسيت قد ايه الناس مهتمة انها تقول رايها بصراحة وبمنتهي الادب والاحترام.
ثالثا اتمني اني اكون عضو جديد خفيف علي كل الموجودين ونقدر نكمل مسيرة NILEMOTORS الناجحة جدا حتي الان.
بالنسبة ليا بقي انا كان عندي عربية شاهين 2000 وبعتها من حوالي 3 شهور وكنت تقريبا مستقر علي الالنترا المانيوال وكانت فعلا عربية عاجباني وفعلا روحت التوكيل قالولي لأ انت لازم تحجز الاول وبعدين تاخذها بعد 3 شهور وفعلا حجزت ودفعت 1000 جنيه.
المهم اني كلمت واحد صاحبي قالي انا اعرف في غبور وفعلا كلمو وقالي بالكثير أسبوعين وتستلم والحمد لله الاسبوعين ما خلصوش لغاية دلوقتي مع العلم كمان اني وصلت لمدير فرع من الفروع وبرضهيقولي طب اخر الشهر طب نص الشهر لما زهقوني في عيشتي وبعدين قالي دا العربية زادت 2000 جنية قات معلش مع اني حاجز من زمان والمفروض استلم بالثمن اللي حاجز بيه
المهم بعد ضغط مني عرفت ان اصلن العربية المانيوال مش هاتيجي دلوقتي خالص قلت مش مهم اجيب الاوتوماتيك قالي تستني لغاية اخر شهر تسعة يعني اليومين دول قولن ماشي واستنيت وكلمتهم قالولي دي تمنها زاد هيا كمان وبقيت 104000
بعد ماعرفت كده قولت لنفسي انا ايه اللي جابرني علي كل الهم ده وابتديت افكر من جديد وبعديها لقيت تليفون جايلي الساعة 12 بلبل من التوكيل بيقولي في عربية مانيوال جت وياتلحق تاخذها الصبح يا انت الجاني علي نفسك والمصيبة الكبري انو بيقولي العربية ب 98000 يعني زادت 6000 مرة واحدة طب منين العربية ماكنتش موجودة و منين جت ومنين زادت وعلي اساس اية.
هنا بس خدت القرار وقولت لو هايدوهالي ببلاش مش عايزها ومش عايز اتعامل مع توكيل اقل حاجة تتقال عنو انة كذاب وان لما معاملتهم كده وانا لسا هدفع فلوس امال هيعملو اية لو لا قدر الله كان في حاجة في العربية واحتجتهم.
وبعد مباحثات استقريت علي الاوبترا مع اني كنت مقتنع بيها اصلن من الاول بس النصيب بقي وفعلنروحت التوكيل في رابعة ودفعت 1000 جنية وبكرة ان شاء الله هاخلص الاجراءات واتلم يوم الاثنين يعني قمة الاحترام والسهولة بس ربنا يبارك فيها يا رب.
اسف علي الاطالة
محمد عاطف