معتقدات و اساطير خاطئة عن الطب (3)
ارجو انى ماكونش تقيل عليكم
نيجى لثالث اسطورة مصدقة عن العيون
انا عندى قصر نظر لكن لما اكبر هايجيلى طول نظر و اقلع النظارة
الناس لما بتكبر بيجيلها طول نظر
الناس لما بتكبر بيلبسوا نظارة بالبلس يعنى بيجيلهم طول نظر
دى واحدة من اكبر الأساطير عندنا
كل الحكاية ان الواحد لما يكسر ال 45 سنة لازم يلبس مقاس + (لوحده او فوق مقاسه الأصلى لو عنده نظارة)
طب ما هى نظارة بال + اهى يعنى طول نظر .. امال الحكاية ايه؟؟
دى مش نظارة طول نظر
و المقاس ما بيتغيرش من قصر لطول
دى مرونة عدسة العين و العضلة الداخلية للعين بتقل مع العمر.
يعنى ايه الكلام ده ؟؟؟
اولا لازم نفهم حاجة مهمة و هى ايه قصر النظر و ايه طول النظر و ايه هى العضلة الداخلية فى العين ؟؟
عدسة العين متعلقة 360 درجة بعضلة مسئولة عن رؤية الحاجة القريبة
يعنى الأنسان الطبيعى لما يبص على حاجة بعيدة العضلة دى مرتخية و مش بتعمل حاجة و لكن لما يبص على حاجة قريبة تنقبض و تزود قوة عدسة العين لرؤية الشئ القريب
و بالبلدى كده اللى عنده قصر نظر يشوف القريب و مايشوفش البعيد
و ده لأن عنده طول العين اكبر مما يجب ان يكون و بالتالى الصورة بتسقط امام الشبكية مش عليها
و هنا لازم نستعمل عدسة مقعرة علشان الصورة تقع على الشبكية و المريض يشوف كويس
http://img38.imageshack.us/img38/1125/myopia.jpg
طب طول النظر ؟؟
الخطأ الشائع ان الناس بتعكس تعريف قصر النظر و تقول "يشوف البعيد و مايشوفش القريب" ، و ده غلط...
مريض طول النظر عينه اقصر مما يجب ان تكون و بالتالى الصورة بتقع خلف الشبكية و هنا تبدأ عضلة العين فى الأنقباض علشان تجيب الصورة فوق الشبكية
يعنى مريض طول النظر العضلة الداخلية بتاعه بتبذل مجهود للبعيد و بالتالى مجهود مضاعف للقريب
و لكن كده هو شايف الأثنين (بمجهود و لكن شايف بعيد و قريب)
و طبعا بنلبسه عدسة محدبة علشان الصورة تقع على الشبكية للبعيد و بالتالى العين تبذل مجهود للقريب فقط زى الناس الطبيعية
http://img38.imageshack.us/img38/5228/hypermetropia.jpg
لما الأنسان بيتقدم فى العمر و يقترب من سن 45 سنة بنلاقى ان الحاجات القريبة مش واضحة و لازم يبعدها علشان يشوفها
و طبعا ده مختلف عن طول النظر
طب ايه اللى بيحصل ؟؟
مرونة عدسة العين و العضلة الداخلية بتقل تدريجيا اعتبارا من وسط او اواخر الثلاثينات
و بالتالى قدرة العين على رؤية الأشياء القريبة بتقل تدريجيا لحد ما نوصل سن 45 سنة ، بيكون القوة الباقية فى العضلة و مرونة العدسة لا تكفى للقراءة او عمل الأشياء القريبة و بالتالى لابد من تعويض النقص الحاصل فى قوة العدسة بعدسة محدبة خارجية تتزايد قوتها تدريجيا مع التقدم فى العمر لحين بلوغ سن 60 سنة و عندها تكون قوة العضلة الداخلية و العدسة فقدت تماما و تم تعويضها بالكامل بعدسة خارجية فلا يمكن ان يحدث تغير فى مقاس القراءة بعدها
http://img198.imageshack.us/img198/2170/presbyopia.jpg
و طبعا واضح من الكلام اللى فات ان الحكاية دى مالهاش دعوة بنظر المريض كان اصلا ايه
يعنى اللى عنده قصر نظر او طول نظر مقاسه كما هو مالوش دعوة بتغير القدرة على رؤية القريب
و بالتالى هايلبس نظارة تانية جنب النظارة الأصلية و بدل ما هى واحدة لكل شئ هايبقى فيه واحدة للمشى و واحدة للقراءة
آدى اصل الأسطورة و تفسيرها الحقيقى
ارجو انى اكون وضحتها
و تحياتى
