بلاش نجيب سيرة عمليات علشان يظهر الناس بتزعل ...
خللونى احكى لكم عن موقف و انا لسه نائب صغنن فى اول تعيينى
كنت فى العيادة فى المستشفى عندنا و كانت ساعتها غرفتين بينهم باب (مفتوح طبعا) و كنت قاعد فى اول اوضة
كنت باعمل نظارة لطالبة فى الجامعة (اعلى درجة من التعليم فى مصر ... التعليم الجامعى)
و بعد ما اخدت مقاس الكومبيوتر قعدت و لبستها الشنبر Trial Frame علشان نجرب العدسات لعمل مقاس النظارة
قبل ما احط اى عدسة راحت قايلة : كل حاجة مزغللة و مش واضحة
حطيت اول عدسة و لما سألتها اذا كانت ابتدت تشوف احسن كده
ردت و قالت : كل حاجة مزغللة و مش واضحة
غيرت بعدسة اقوى و سألتها نفس السؤال
قالت : كل حاجة مزغللة و مش واضحة
زودت المقاس اكتر و سألتها تانى
قالت : كل حاجة مزغللة و مش واضحة
قللت المقاس عن اول مرة و سألتها
قالت : كل حاجة مزغللة و مش واضحة
قعدت اطلع و انزل فى المقاسات و عدت الكومبيوتر مرتين (قلت يمكن مقاسه فيه غلط) و لكن نفس المقاسات طلعت هى هى
و بعد فترة من التجارب فوق النصف ساعة (رقم قياسى لأطول وقت عمل نظارة) اتنرفزت و كنت هاتجنن و قلت لها : ماهو مش معقول بعد ماجربنا العدسات دى كلها و مش شايفة حتى اكبر علامة فى لوحة العلامات فى المراية
بصت بقمة الأستغراب و قالت لى : لوحة علامات ايه ؟؟ و مراية ايه يا دكتور ؟؟ آه ... هو انت قصدك اللوحة اللى قدامى دى فى المراية ؟؟؟ هو المفروض انى ابص عليها ؟؟؟
سألتها و انا فى قمة الذهول من ردها : امال انت كنت بتبصى فين ؟؟؟
شاورت لى الهانم على دولاب ادوية فى آخر الأوضة الثانية (حاجة كده حوالى 8-9 متر بعيد عنا) و قالت بمنتهى البراءة : ده انا كنت باحاول اقرأ الكتابة اللى على علب الدواء فى الدولاب و ماكنتش شايفاها ...
المفضلات