الموضوع: بدايه النهايه !!!!

سؤال وحيره غرقان فيهم لما بفكر فى المستقبل لأسباب بسيطه وملموسه
ياترى العالم هيبقى عامل ازاى فى المستقبل وخصوصا ان كل حاجه حلوه بدأت تنقرض...
انفلوانزا طيور مابقيناش عارفين ناكل الطيور زى الاول وفى مننا بطلها خالص!!!
والله حضرتك انا باكلها وبأكلها لولادي وبقاليي سنين عايشة .. الفراخ هي إللي بتدبح وتتاكل

انفلوانزا خنازير ياترى هيجى علينا الوقت اللى لاقدر الله نلبس كمامات ومانركبش مواصلات ويتعمل عندنا حجر صحى!!!
معتقدش ... احنا شعب ... بتخاف منه الفيروسات

السرطان اعوز بالله الكل بيشرب سجاير واللى مابيشربش بيشم الدخان بتعها فى الشغل فى الشارع فى البيت وفى كل مكان
السجائر مش السبب الوحيد للسرطان ... وده مرض منتشر ... لأسباب كتيير من أيام الفراعنة ... وممكن يكون بسبب جينات وراثية ... تنشط فجأة ... أنا مش طبيبة ... بس قريت قبل كده الكلام ده
وكتير من الاوبئه والفايروسات ... قل لا يصيبنا إلا ما كتب الله لنا
الاحتباس الحرارى وثقب الاوزون وتقلب وتغير غير مسيطر عليه عموما (غضب الطبيعه) ياترى هنيجى فى يوم ونسمع عن درجات حراره تتعدى ال50 وممكن اعلى كمان
مخضوض ليه من خمسين ... احنا وصلنالها فعلا ... مع الرطوبة الشديدة ... ودول الخليج 50 دي عندها عادي جدا ..... خليك فريش

ياترى هنسمع عن عواصف وفياضانات و زلازل واعاصير وبراكين عندنا هنا
زلازل .. ok احنا دخلنا حزام الزلازل من زمان ... وكل يوم في هزات ارضية بس مش بنحس بيها .. بس موقع مصر .. مش موقع نشط لأي براكين .. إنسى ... وطول ما السد العالي موجود متخفش من النيل ... وتآكل شمال مصر من البحر ... عالجناه بالصدادات .. وكمان عمرناها بالمدن الساحلية ... دفعوا فيها ملايين عشان يسيبو البحر ياكلها .... ههههههه
كله بأمر الله ... وهو الحفيظ
ازمه اقتصاديه مافيش شغل للشباب واالى شغال اتطرد من الشغل ومش هيلاقى غيره طب المتزوج اللى عنده عيله هيعيشهم ازاى هيأكلهم ايه ولو اشتغل شغلانه بسيطه بدخل قليل ازاى هيعيش بيه فى وسط المفرمه دى هيلاقيها من تجار جشعه ولا ايجار كبير ولا من بعض بتوع المرور ولا منين ولا منين
عشنا أزمات اقتصادية أفظع منها ... وعدينا ... ( هنا فايدة الست إللي بتشتغل مع الراجل ) عشان لو واحد ساب الشغل ... التاني يشيل لحد ما الأول يوفق وضعه تاني ... وده رأيي من زمان ... وإللي يسيب يشتغل شغلتين ... إن شالله ورديتين في محلين ... ما هو أصل احنا شعب الفشخرة ... ونبص للمهن دون المؤهلات العليا بنظرة الـ oh no yaee ......... وأولا وأخيرا الرزق بإيد الله ... ممكن يكون معكش 10 ج في جيبك أو ولا مليم حتى وشايل الهم ... وتلاقي إللي بيخبط عليك عاملك زيارة وجايبلك أكل ... حتفرح أكتر من فرحتك باللي انت بتشتريه ... وهنا لازم نواجه الازمة ..ز وحياتنا كلنا ... نعييش مستورين ... بدون فشخرة ... ونجيب الاهم فالمهم ... و التاجر الجشع نسيبه وندور على غيره ... ولو من منطقة شعبية ... why not

انتهت كرايسلر وكمان النصر وتويوتا بتغرق وغيرهم من الشركات العالميه
النصر دي كانت لازم تمووت من زمان ... حرام الصناعة المصرية 30 سنة تقف على 128 وغيره بنفس الشكل وبنفس العيوب ونفس المآسي .... كرايسلر وتويوتا مش من بقيت أهلنا ... وأنا مبصدقش الكلام ده ... أكيد لأي سبب الشركات دي بتخفي نفسها ... وحتظهر بتقلها ... بأسماء تانية ... وبكرة تقول نور العمر قالت ... وكمان الازمة العالمية دي ... لعبة كبيرة من الكبار .... وربنا يستر

خلافات وخناقات بين الدول وبعضها الناس عماله تتدبح والكل بيتفرج لغايه مايجى دوره
ومن اعمالكم سلطت عليكم ... وما ربك بظلام للعبيد ... ثق من هذا تماما ... ولو جه علينا الدور ... حييجي على إللي يستاهل منا وربنا حينجي الصالحين ... افتكر ( قصة نوح )

جرائم سرقه ونصب وقتل وحرايق وانهيارات وحوادث كارثيه مافيش رقابه مافيش حكم للماتش!!!!
ده = بعد عن الدين ... بعد عن الإيمان وتقوى الله ... لو كل واحد آمن ورضى وشكر .. مش حنشوف كل ده .. ولو الغني طلع حق الله وكفل الفقير بالزكاة ... مكانش بقا في حقد طبقي ولا بقا فيه غنا فاحش .. ولا فقر فاحش
ده غير كتير وكتير وكتير مشعايز اطول عليكم بس
مجرد سؤال؟
تفتكرا هنام ونقوم نلاقى الاخبار ده على التلفزيون
(منظمه الصحه العالميه تقضى على مرض انفلوانزا الطيور وانفلوانزا الخنازير نهائيا وتعلن ان كوكب الارض خالى من تلك الفايروسات القاتله)
المرض صناعة أمريكية ... والمصل موجود ... أطمن
(منظمه الصحه العالميه تجرم التدخين وتضع احكاما قاسيه لردع اى شركه تقوم بتصنيع السجائر وخلافها)
حتجرمها .. وحيصنعوعها في بير السلم .. تتشطر على المدمنين ليها وتعالجهم الاول .. وبعدين تمنعها .. ومش محتاجين المنظمة تجرمها .. لإنها حرام شرعا ...
(تجربه فعاله للسيطره على ثقب الاوزون واخبار عن سد 40% من الثقب كخطوه بدايه)
نعزل من الارض أسهل ....
(مشروع ......... مذهل للسيطره على الاحتباس الحرارى وتغير مناخ الارض للافضل)
صعب قوي .. الأرض كدة كدة ليها عمر افتراضي وحتنفجر مع يوم القيامة ... وربنا بيسبب الأسباب
(فكره عربيه مشتركه لحل مشكله الازمه الاقتصاديه والقضاء عليها نهائيا)
والله يقدروا يعملوها ... بس ربنا يهديهم الأول

(خطه لخفض اسعار المنتجات واستغلال جميع الموارد المهدره والتى يتم تصديرها للخارج )
دي ترجع للتجار ... يخفوا على الناس شوية ... وليا رأي في الموضوع ده ... الضرائب مهمة جدا يا جماعة ... لو شدت حيلها وشافت شغلها 100100 ... محدش حيقدر يرفع هامش ربحه في أي عملية انتاجية أو خدمية ... لإن ده معناه زيادة وعائه الخاضع للضريبة ... يعني يدفع ضرائب اكتر .. الجشع سببه بُعد الرقابة
(افتتاح اولى خطوط انتاج اول سياره مصريه 100% يضع مصر امام الدول الصناعيه الكبرى)
شوفناها مرة من نفسنا أيام عبد الناصر ( قالولي صنع مرسيدس مصرية ) ... بلاش طمع بقا ... قدامك 100 سنة كمان ... وحاول توصي أحفادك لإعادة طرح السؤال والتفكير فيه
( مصر... اقل نسبه حوادث ومخالفات مروريه للسنه الرابعه على التوالى)
ممكن ... لو صادرنا عربيات الخلق ... واشترينا بتمنهم مواصلات عامة 100 100 خدمة مميزة ورخيصة .. الكل حيركب مواصلات .. ولا حد حيجري ولا حد حيخمس ولا حد حيبلطج ...
أو حل تاني ... نفجر المدن السكنية والطرق ... ونعيد تقسيمها ... ونخالي اصغر شارع عرضه 500 متر ... حنمشي براحتنا خالص .. وحنوصل ... للسنة العاشرة كمان
(اليوم انسحاب اخر جندى اسرائيلى من ارض فلسطين فى اطار الانسحاب الكامل وتشكيل دوله فلسطينيه حره)
مش حييجي اليوم ده إلا يوم ما ينطق كل شيء عليهم على وجه الارض ... يعني قاعدين .. قاعدين ... المهم ... فصل القوات والاستقلال .. ومنع الاعتداء

(لحظه تاريخيه ---محو جمله الاراضى المحتله من كل كتب التاريخ واستبدالها ب (دوله فلسكين الحره)----)
رأيي في الموضوع ده .... حيزعل الناس مني ... أسكت أحسن
ولاممكن نسمع الاسوأ وبلاش ذكره
طبعا حاجه محيره جدا احنا دلوقتى عايشين كويس بنام كويس بناكل اكل حلو وبنخرج ونتفسح وبنعمل كل اللى احنا عايزينه
طب وبعدين كمان 10 سنين الوضع هيبقى ايه ياترى هنشوف اللى بنشوفه فى افلام الخيال العلمى عن المستقبل ولا هنقول ياريت يوم من بتوع زمان!!!!!!!!!!!!!!!!!!
حتشوف ما هو أوقع من الخيال العلمي ... بفتكر نفسي وأنا في الثانوية العامة ... كنت ببص لجيلي إزاي حيشتغل والبطالة شيء ملوش نهاية ولا حل ... حنجيب شقق منين ونفرشها إزاي .. والمرتب 350 ج ... حنعمل إيه .... 90% من شباب جيلي اتجوز وجاب شقة وفرشها وعمل فرح وخلف وعاش ... ربنا هو الرزاق ... بيده الخير وهو على كل شيء قدير


أ[OVERLINE]خي في الله ... متشيلش الهم قوي كدة ... الملك بيد الله وحده
[/OVERLINE]
اسف للأطاله عليكم..
طول ولا يهمك ...
انا غيرت اللون ... عشان نظري على قدي يا بني
حكم السن بقا

متشكر لأهتمامك يانور بس ياريت الناس كلها شايفه الدنيا كده زى ما انتى شايفاها
العالم ده ليه نهايه انا بسأل نفسى هى ده اللى قربت ولا لسه كل ده هيتصلح وبعدين يدمر تانى
انا نفسى كل حاجه تتصلح وبعدين تخرب مش طمع فى الحياه والله الاعمار بيد الله بس نفسى اشوف النيا بحال افضل قبل النهايه
لو كل ولحد عمل زيك وماشالش الهم اكيد هتبقى افضل
اقل مثال :
لو الحرامى صبر وقال استنى شويه ده انا رزقى على الله واكيد طبعا ربنا كان هيرزقه ماكانش سرق صح ؟؟
وغيره وغيره
انا غيرت لك اللون اهه وكبرتلك الكلام عشان ماتتعبيش فى القرايه وتغير اللون

شكرا لك على الخط واللون والفونت ... هههههههههههه
على فكرة ... أنا نكدية جدا ... وشيالة هم وهموووووم ... وفي حالة اكتئاب وبحاول أخرج منها ... بس بجد ... أي حاجة توقفلك عقلك وتعجزك ... ارجعها لربنا سبحانه وتعالى ومتشيلش هم
متوسعش الدايرة ... خاليك في عيلتك وأهلك وولادك واصحابك المقربين ... طول ما في خير فيهم اطمن ... لكن حتوسع الدايرة ... حتلاقي كتيير من أصناف البشر

وعلى فكرة ... الحرامي مش دايما بيسرق عشان مش لاقي ياكل ... وإللي بيسرق عشان ياكل بس مش عشان حاجة تانية ... ده مش حرامي ده غلبان ... اتظلم من قسوة الناس شايفاه عايش عيشة جوع ... وبتقول ياللا نفسي

لكن الحرامية دلوقتي ... عصابات ... ومافيات .. وتشكيلات ... ليها مناهج وعلم ... وليها أهداف أبعد بكتييير من ( إنها تاكل )
وفيه حرامية مأجورين ... زي ... القتلة المأجورين تمام

والرسول صلى الله عليه وسلم قال ( الخير في أمتي إلى يوم الدين )
وهو اعلم البشر بعد الله سبحانه وتعالى ... فلن يقول هذا القول بدون يقين من الله

ربنا يهدي النفوس للخير
ودورنا نقوم أخلاقنا ونقوم أخلاق من حولنا لما يحب الله ويرضى

حسبنا الله ونعم الوكيل ... أي احتسب دنياك عند الله ... وهو نعم الوكيل والمفوض في كل الأمور.
وأخيرا ... نهاية العالم بظهور علامات القيامة الكبرى
ودي لسة مظهرتش والحمد لله ... لسة الشمس بتطلع من الشرق على الأقل ... لسة لم تطبق الآية الكريمة ( رفعت الأقلام وجفت الصحف ) .. لسة في خير .. اطمن

حنعيش ونشوف إللي مكتوبلنا فقط .. ونحمد الله على ذلك

ليه كدة بس يا ASKAFRAWY
نهاية النهاية إيه ... مكناش بقينا هنا على المنتدى
الحمد لله أنه ( قل لن يصيبنا إلا ما كتب الله لنا )
والآية الكريمة دي تكفي .. ننظر للأمور بارتياح ... إن ده قضاء الله وقدره .... ربنا يحفظ الجميع

اللهم ارفع مقتك وغضبك عنا

سيبها لله"

المشاركة الأصلية كتبت بواسطة ASKAFRAWY

والله يا نور هى فعلا كدة للاسف..كل يوم مرض جديد..مبيدات مسرطنة...اكل كله امراض
طبعا بالاضافة للذكره الاخ evoo...يبقى فاضل ايه تانى على النهاية؟؟

بلاش نهاية النهاية...نخليها الطريق الى النهاية؟؟
بس احنا فعلا شكلها فى العد التنازلى للنهاية

العد التنازلى .............هههههههههههه

قشطة انا عاوز امسك التيمر