الموضوع: مشكله في الموتور ولا ؟؟؟؟ البوجيه رقم 3 مالوش تأثير...

انا لسه مخلص شغل في العربيه دلوقتي...

شيكت علي ال 4 عجلات والحمد لله تمام...
التيل اللي قدام واللي ورا كان جديد...
وورا كان عاوز لجلاش بس (والحمد لله الفرامل دلوقتي من لمسه )
وربطت علي العافشه
ونظفت فلتر الهوا وفلتر البنزين.
وشحمت بلي البطاحات.
وفكيت البوجيهات علشان اطمئن علي الحرق بتاعها واسنفرها بالمره.
بعد التجربه.
الفرامل الحمد لله من لمسه بتكلبش في الأرض.
كان في صوت تزييق في العافشه من قدام. تلاشي.
صوت الخبطه اللي كان ورا من المساعد اليمين زي ماكنت شاكك. تلاشي بعد لجلاش التيل.
وغسله محترمه وتنظيف من جوا

بس إتقفلت في آخر الليله.

لاحظت حاجه غريبه في الموتور.
صوت الموتور عالي وتقطيع في خرج العادم (تتليته)... وصوت الموتور ده كان عالي من يومين علي فكره... وللاسف اكتشفتها بعد مشوار طويل ولاقيت القربه مافيهاش ميه خالص... بس انا متأكد إن أمبير الحراره مارفعش يومها وزودت ميه ومن وقتها مافتحتش الكبوت غير النهارده.

المهم.
فصلت كابل البطاره وعملت أيدل ليرن.
ومافيش جديد.
فكيت البوجيهات تاني وشيكت عليها.... قلت جايز بوجيه وانا بركبه جه عليه وسخ
( ملحوظه البوجيه رقم 3 من الشمال (متصل بآخر كابل في الموبينه ) كان مهبب أسود )
ولما فكيتهم المره التانيه لاقيته برده مهبب بس علي خفيف.

قلت اشوف خرج الموبينه بالمره.
الموبينه مخرجه كويس والشراره متماثله مع ال 4 سلوك.

بس المفاجأه. واللي اكتشفتها بالصدفه.

شلت سلوك البوجيهات خالص واحد واحد...
ومع كل سلك باشيله من الموبينه. صوت الموتور كانت بيتغير.
الا سلك البوجيه رقم 3
يعني لو شلت السلك خالص ولغيته. ولا كأنك شايله. وصوت الموتور هو هو والتتليته زي ماهي.

طلعت اجرب العربيه وفوقتها علي الطريق... التتليته راحت بس صوت الموتور عالي.
وفي صوت مسمع زي صوت التاكيهات لما تكون عاوزه تتظبط.

!!!!!!!! شوية معلومات علشان نبقي في الصورة !!!!!!!!!!
انا مغير زيت من اسبوع. ولزوجته ولونه ومقاسه مظبوطين بعد 350 كم استهلاك.
البنزين كالعاده 80 ومافيش تغيير وماشي علي التفويله دي 240 كم والتانك لسه فيه اكثر من النص. ومتأكد ان التقطيعه مش من البنزين.
جميع الفيش والكابلات راكبه مكانها.
لمبة التشيك مانورتش نهائي.
خرطوم حساس الماب راكب مكانه...
مافيش RPM
.............
مافيش دخنه من مقياس الزيت.
أول مره دورت العربيه فيها بعد تركيب البوجيهات كان في دخنه بيضاء + ريحة غريبه في الشكمان والشكمان كالعاده بينزل ميه.
.......................

السؤال.
1- ليه البوجيه التالت لما شيلت الكابل بتاعه خالص. مافيش تأثير علي صوت الموتور عكس بقية البوجيهات ولا تأثيره مثلا والعربيه ماشيه !!!! (انا طبعآ ماجربتش امشي بالعربيه علي كده ).

2- تفتكروا علو صوت الموتور. ناتج عن التاكيهات. (نفس الصوت التاكيهات علي فكره بس لو كده برده ليه اللي حصل مع البوجيه رقم 3)
ولا يكون في حاجه كبيره في الموتور.

منتظر الرد... وشكرآ مقدمآ للجميع.

مطنشني ليه يا استشاري ...