صباح باظ مع طيب الذكر خالد اباظه
النهارده اجازه لى ورغم انى مقاطع الجرايد القوميه نظرا لان مصر اللى فى جرايد دى غير مصر بتاعتنا ماعلينا
قلت اجيب جرنال اخبار اليوم واعمل شاى واقعد فى البلكون واقرا الجرنال
المهم قلت ابتدى بملحق السيارات وقلت ( وربنا يغفر لنا هفواتنا) اقرا عمود الجهبز العلامه فى اخبار السياره
استاذنا خالد اباظه حيث انه تقريبا محدش من شركات السيارات بيقدر يقرر ولا يعمل اى اجتماع الا بمشاوره العلامه
ونظرا لا النفس اماره بالسوء الا مارحم ربى قريت العمود
ومشاء الله اول خبر لقيت خبر طول عمرى من يوم مااتولدت كنت منتظره الا وهو دخول توكيل جديد فى مصر وان التوكيل ده كان يعرف بيه من زمن وان اصحاب التوكيل اللى هما برضوا اصحاب توكيل اودى وفولكس فاجن باسو ايد الجهبز علشان يسكت مش يقول المهم طلع التوكيل ( وياسعدنا ياهننا ) توكيل هولندى واقسم بالله دى او مره اعرف ان هولندا ليها فى العربيات واسمه سيايكر هينزل مصر خلاص وان السياره هتنافس السيارات من فئه ( خد بالك بقى قوى ) الفيرارى والمازيراتى والبوجاتى وتقريبا كمان 128 شوفتوا والعريبه 8 سلندر 4200 سى سى( بنزين 80 طبعا) ومن الصفر الى 100 بتاخد باين 3 ثوانى وسرعاتها على طريق مصر اسكندريه الزراعى ممكن توصل ببساطه الى 300 كم
عارفين الدموع نزلت من عيونى من الفرحه اخيرا اصحاب 127 وال128 والسيات يقدروا دلوقتى يشتروا ويهيصوا لا وايه يقدروا يجيبوا سرعه
300 كم كمان شوفتوا الهنا ياجماعه
شوفتوا الناس اللى عايشه فى بلد غير بلدنا شوفتوا الناس اللى مفترض يحاربوا كل اسراف وفشخره فى بلد اكتر من 20% عايشين باقل من دولار فى اليوم
بلد يفتقد لاابسط انواع الطرق السليمه ( دا مافيش فى البلد 100 متر مافيهمش مطب ) بلد بتصفق على كل قرار بتاخده ادارات المرور سوا كان صح ولا يحر ق الدم سوا ادى الى سوء تخطيط فى الشوارع او قفلها
قمت رميت الجرنال والشاى ولعنت الاجازه وانا ببص على صاحب سياره بيبكى على واحد بموتسيكل كسره له المرايا وجرى
نتقابل فى الجزء التانى
