الموضوع: مش باقي مني ...

رغم تحفظي على بعض أفكار المخرج خالد يوسف وهيافة اللا فنانة هيفاء وهبي، رحت البارح السينما واتفرجت على فيلم "دكان شحاته". الفيلم اخراج خالد يوسف وبطولة عمرو سعد وهيفاء وهبي.

الآتي هو رأيي في الفيلم. ماتخفوش مش ححرق أي حاجة.

الفيلم تحفة فنية من أول تتر البداية، اللي عبارة عن لوحة استعراضية للأحداث الجسام التي مرت بها مصر خلال ال 28 سنة اللي فاتت (اشمعنى 28 سنة؟ فكروا فيها انتم). التتر معمول بحرفية وذوق عالي. لو دخلت الفيلم لازم مايفتكش تتر البداية.

الفيلم نفسه مستواه الفني عالي. من حيث الاخراج والتصوير و خصوصاً الموسيقى التصويرة.

طبعا ده مايمنعش ان خالد يوسف لازم يخاطب غرائز الناس بشكل رخيص من خلال بطلة الفيلم هيفاء وهبي. رغم ذلك هيفاء مثلت مشاهد درامية مؤثرة وطلعت في بعض المشاهد من غير مكياج وعينيها حمراء وحالتها حال.

ولازم طبعا خالد يوسف يعرض الاسلاميين في صورة سلبية حتى ولو في مشهد خاطف في آخر الفيلم.

بالرغم من ذلك، الفيلم جميل وأنا دخلته وأنا عارف انه هيكون لي تحفظات عشان كده تجازوتها بسرعة وحاولت استمتع بما لا اعترض عليه في الفيلم وهو الكثير.

نيجي لهدف من الموضوع.

الفيلم فيه أكثر من أغنية منهم أغنية بإسم "مش باقي مني". الأغنية مقتبسة من قصيدة لجمال بخيت بنفس الاسم. قصيدة سياسة من الدرجة الأولى.

اسيبكم مع القصيدة.
[youtube]http://www.youtube.com/watch?v=SJzCEXmMNmY[/youtube]

وآدي الأغنية

المشاركة الأصلية كتبت بواسطة MoToRiZeR

رغم إني بحب خالد يوسف نوعاَ ما بس حاسس الأفلام كلها سواء له أو لغيره كلها دموية و جريمة و تقطيع جتت و شوية دعارة .. فا مليش نفس أخش ولا فيلم .. يا تري تنصحني أشوفه و خلاص ولا هيكأبني ؟!

بس مبدئياَ لو هشوفه هيكون بعد ما أشوف angels and demons

أنا عملت زيك كده ورحت Angels and Demons الأول لأني كنت مستني الفيلم من سنتين. من ساعة ما قرأت الرواية. بعديها بيومين رحت فيلم خالد يوسف وأنا متوقع الدموية والعنف و العري.

فيلم "حين ميسرة" معجبنيش وطلعت منه وأنا شايف انه فيلم مشمئز وبيعرض الانحطاط الأخلاقي اللي وصل له المجتمع بشكل صادم ومباشر وغير فني. يعني رغم المآسي اللي في الفيلم لكني لم اتعاطف مع أي شخصية في الفيلم من كتر الاشمئزاز والقرف.

فيلم "دكان شحاته" فيلم كئيب بس بشكل فني راقي شوية. الموسيقى قامت بالدور الكبير في تعاطفك مع شخصية البطل.