طلب استشارة قانونية : أرضى الدوله هتاخدها وهتبقى منفعه عامه

السلام عليكم ورحمه الله وبركاته
عندى استفسار ويا ريت حد يعرف يقولى ايه الاجراءات
من فترة واحنا بنسمع ان الدوله بتعمل طريق جديد دولى بيوصل بين المنصورة والزقازيق وانهم ماشيين بيصادروا الاراضى والبيوت واى حاجه فى وش الطريق
دلوقتى وصلت لى اخبار ان الارض المملوكه لى هيعدى عليها الطريق و الدوله هتاخدها
اعمل ايه دلوقت ايه اللى فى امكانى اعمله
الارض دلوقتى لسه زراعيه لكنها فى كردون المبانى يعنى كانت بتتباع بالمتر و كانت جايبة فلوس كتير
دلوقتى لما الدوله تاخدها وهتدى تعويضات هتبقى ملاليم ( سمعت انهم بيدوا تعويض على الفدان اربعه الاف و القيراط الواحد كان ب 20 الف) فهل فى اجراءات اتشاكل بيها لمنع الاستيلاء على الارض من قبل الدولة

الدوله اختارت الطريق الصعب فبدل ما الطريق الدولى الجديد يمشى على مصرف قديم مفيش حد بيستفاد بيه مشته وسط اراضى الناس والناس الواصله واللى ليها نفوذ اتدخلت و بعدت الطريق بعيد عن ارضها ودفعت فلوس
هل فى طريقة لانقاذ الارض؟

فعلا الخبر طلع صح يا جماعه
نزلت اشوف ايه اللى بيحصل لما وصلت لقيت الارض متغطيه بالرمله وشغالين فيها اكنها ملهاش صاحب ولا يحزنون
حد يقدر يفيدنى اقدر اعمل ايه ولا خلاص الارض راحت عليا

قلبي معاك
بس موضوع زي ده منفعش فيه استشارات من منتديات
لازم تشوف محامي جامد وتستشيره

سيناريو فيلم الارض للعملاق محمود المليجى
عليك العوض لو تلحق تبيع بيعها
احمد مظهر مات مقهور لان الطريق الدائرى كان ولابد ان يمر فى منتصف ارضه ودمرها ودمر زراعات من كل بلاد الدنيا فى ارض كان يملكها فى المنصورية بالجيزة

الحمد لله الارض كلها ضاعت الطريق بلع الارض كلها و واخد من الجيران كمان
مقلق ادخل فى سكك محامين التعويضات
هل فيه حل لوقف الطريق

ربنا يعوضك خير و احسن منها باذن الله
ماحدش عارف الخير فين
اعتقد ان اللي ممكن تعمله انك تتظلم من مبلغ التعويض ... ممكن تروح المحافظة او مجلس المدينة وهما ح يقولولك الاجراء اللي ممكن تتظلم بيه ... طلب ... دعوى ....
اعتقد ان ده كل اللي ممكن يتعمل
احنا عندنا ف العباسية بيوت ومحلات كانت ف الميدان ..... انت طبعا عارف يعني ايه محل في ميدان العباسية ... يعني ملايين
وازالوها عشان مترو الانفاق .... والتعويض اعتقد كان 30 الف للشقة او المحل .... حاجة زي كدة ... وفيهم ناس كانو لسة مشتريين المحلات بملايين ... زي صيدلية العزبي مثلا ....
العوض على الله
ما تزعلش .... يمكن ده خير لك .... ربنا وحده اللي عالم بالغيب

باشا معلش انا حخرج عن الجزئيه القانونيه شويه
حضرتك بتقول حيعملوا طريق في وسط ارضك
ممكن حضرتك طالما ارضط بقت علي طريق سريع تفكر في مشروع
كويس وتحاول تنفذه
زي بنزينه ومركز خدمه سيارات
كمان وجود الارض نفسها علي الطريق اكيد حيرفع سعرها بشكل يعوض الجزء اللي تم استقطاعه منها
وربنا معاك ويعوضك خير باذن الله

اقتباس:

---

المشاركة الأصلية كتبت بواسطة shnory

باشا معلش انا حخرج عن الجزئيه القانونيه شويه
حضرتك بتقول حيعملوا طريق في وسط ارضك
ممكن حضرتك طالما ارضط بقت علي طريق سريع تفكر في مشروع
كويس وتحاول تنفذه
زي بنزينه ومركز خدمه سيارات
كمان وجود الارض نفسها علي الطريق اكيد حيرفع سعرها بشكل يعوض الجزء اللي تم استقطاعه منها
وربنا معاك ويعوضك خير باذن الله

---

والله انا فكرت زيك يا شنوري
ان او جزء اتاخد طريق يبقة الباقي ح يبقى ع الطريق وسعره يرتفع
لكن هو بيقول ان الارض اتاخدت كلها ......
ربنا يعوض خير

الارض كلها(كلها) اتاخدت الحمد لله وكمان خدوا من الجيران حولى
فعلا صدق المثل اللى يشوف مصيبة غيرة تهون عليه
الحمد لله على كل شئ
فى ناس راحت عليها ارضها وراحت عليها بيوتها اللى عايشة فيها
تخيل فى لحظه تفقد ارضك اللى هي محل نشاطك وتفقد بيتك اللى انت عايش فيه وتبقى فى الشارع
بقى فى حد يتخيل ان حد يعتمد فى تخطيط طريق دولى على تصوير جوى حصل من 10 سنين
عجبى
ومدام عايشين فيها ياما هنشوف

لا حول ولا قوة الا بالله العلي العظيم
يا اخى لا يضيع حق وراءه مطالب
اتظلم وارفع صوتك
وصل صوتك للمسئولين
للاعلام يمكن يكون ليهم فايدة
ما تسكتش عن حقك ربنا هايسئلك عنه يوم القيامة

اقتباس:

---

المشاركة الأصلية كتبت بواسطة michohat

الحمد لله الارض كلها ضاعت الطريق بلع الارض كلها و واخد من الجيران كمان
مقلق ادخل فى سكك محامين التعويضات
هل فيه حل لوقف الطريق

---

ما ضاع حق ورأه مطالب ... أولاً أوعى تتكاسل فى البحث عن حقك اللى يرضيك ... الساكت عن الحق ........* اخرس

بالنسبه لسؤال حضرتك .. فـ الطريق ده هو عباره عن مشروع من مشروعات الحكومه وطالما بدء يبقى اعتقد مينفعش الرجوع فيه

بس أعتقد إننا لو لجئنا بالتظلم للمراقبين على الحكومه ( مجلس الشعب.. طبعاً) ممكن يتواجد حل يرضي حضرتك ..


الخلاصه : حضرتك تجمع عدد من المتضررين من المشروع ده .. وتطلعو على عضو مجلس شعب تقيل .. تشرحوله الموقف وتتابعه معاه ... وياريت لو كانت طالبتكم معقوله .. يعنى متطالبش بوقف الطريق .. بس تقدر تطالب بقطعة أرض مساويه للي كنت تملكها وبتطل على الطريق ... وأعتقد إنك هتكون كده كسبان .. او مرضى بالنسبه للجهد والوقت إللى هيتكلفه الموقف .. وربنا يوفقك وتطمنا .

قلبي معاك

قلبي معاك

بس مش هاتاخد حاجة من المطالبة

نزع الملكية بيكون بقرار جمهوري و ياما اتنزعت ملكيات

ربنا يعوضك خير في حاجة تانية

اللهم أجرني في مصيبتي و اخلفني خيرا منها

و صدقني لو صبرت و احتسبت عند الله هاتلاقي خير كتير

انما الحكومة .....ايدك منها و الأرض

من ضمن الكلام اللى سمعته ان عضو مجلس الشعب هوا اللى متسبب فى تحويل مسار الطريق لانه كان ماشى فى اراضى مملوكه له
و فى ناس ليها معرفة بدكاترة تبع رئاسة الجمهورية و مش نفعوهم بحاجه بيقولوا ده قرار رئاسى
بس نفسى اعرف ازاى يسيبوا حل تانى مش بيسبب ضرر لحد وهوا انهم يغطوا مصرف ويعملوا الطريق فوقة بدل ما يمشوا الطريق فى ارض زراعيه
ناس كتير حصل ليها ضرر كبير من الحكايه دى
ناس خسرت ارضها اللى هيا شغلها
وناس خسرت بيوت ليها
وناس خسرت ارض وبيت ليها مره واحده
وده مش على اصحاب الاراضى وبس
فين هيروح الناس اللى كانت بتزرع
فين هتروح الناس اللى كانت بتأجر الاراضى للزراعه
معرفش بيعملوا كده ليه عاوزين ايه تانى
طريق دولى وبدل ما يمشوه فى منطقة مش تسبب ضرر لحد وبالعكس هتفيد اللى حولها لانهم هيردموا مصرف
يجوا يضيقوها على الفلاح
والله اللى يشوف منظر الارض والطريق ناخر فيها يصعب عليه
فين الدولة اللى بتروح تستصلح اراضى وتدفع كتير وفى الاخر الفلوس تروح لناس كروشها كبيرة
واللى يقف فى وشهم يتاخد و يتحبس
معرفش ليه عاوزين يكرهونا فى مصر بس برضه مش هنكرهها
ولا حول ولا قوه الا بالله , وانا الى ربنا لمنقلبون

روابط ذات صله
http://www.2lex.com/archives/53217

http://www.alwafd.org/details.aspx?nid=18371

واهو عضو مجلس الشعب
http://enshas.com/salhy.htm

اقتباس:

---

السلام عليكم ورحمه الله وبركاته
عندى استفسار ويا ريت حد يعرف يقولى ايه الاجراءات
من فترة واحنا بنسمع ان الدوله بتعمل طريق جديد دولى بيوصل بين المنصورة والزقازيق وانهم ماشيين بيصادروا الاراضى والبيوت واى حاجه فى وش الطريق
دلوقتى وصلت لى اخبار ان الارض المملوكه لى هيعدى عليها الطريق و الدوله هتاخدها
اعمل ايه دلوقت ايه اللى فى امكانى اعمله
الارض دلوقتى لسه زراعيه لكنها فى كردون المبانى يعنى كانت بتتباع بالمتر و كانت جايبة فلوس كتير
دلوقتى لما الدوله تاخدها وهتدى تعويضات هتبقى ملاليم ( سمعت انهم بيدوا تعويض على الفدان اربعه الاف و القيراط الواحد كان ب 20 الف) فهل فى اجراءات اتشاكل بيها لمنع الاستيلاء على الارض من قبل الدولة

الدوله اختارت الطريق الصعب فبدل ما الطريق الدولى الجديد يمشى على مصرف قديم مفيش حد بيستفاد بيه مشته وسط اراضى الناس والناس الواصله واللى ليها نفوذ اتدخلت و بعدت الطريق بعيد عن ارضها ودفعت فلوس
هل فى طريقة لانقاذ الارض؟

---

لا حول ولا قوة الا بالله... مش هو ده الطريق اللي حيتعمل علشان يخفف الضغط علي ميزانية ميت فارس.
.
.
.
.
.
.

فعلا ربنا معاك.

قلبي معاك بجد
انا لا زلت أتذكر حلقة أحمد مظهر من حديث المدينة تقريباَ و هو بيتكلم عن أرضه اللي إتدمرت
الحلقة دي أثرت فيا جامد وقتها .

دى قلة أدب

يا جماعة اي طريق بيتعمل لازم ح يكون على حساب اراضي بتاعة ناس
موضوع المصرف احنا مش عارفين خلفياته
اكيد له ابعاد تانية سواء هندسية او اسباب اخري احنا مش على دراية بها ... مش معقول يسيبو المصرف ويجيبو لنفسهم وجع الدماغ مع الناس ... اكيد لهم سبب ... وبعدين لو المصرف ينفع كانو ليه بينزعو ملكيات ويدفعو تعويضات ..... حتى لو تعويضات ضعيفة ... لكنها ح تجمع ملايين
خلينا نكون عقلانيين
لازم الطريق ح يمشي في ارض بتاعت ناس ولازم ح يكون فيه نزع ملكيات
..... النقطة المحورية اللي ممكن يكون فيها كلام هيا التعويضات .... مش اكتر من كدة
دي اللي ممكن تمشي وراها ... وتتظلم منها ... وترفع دعوى انت وباقي المتضررين وممكن تجيب نتيجة وتاخد تعويض اكتر من اللي هما عاوزين يدوه للناس ... مش ح اقولك تعويض مجزي .... لكن اقل ضررا من الحاصل
لكن انك تحاول تلغي الطريق او تحول مساره ..... كان احمد مظهر بعلاقاته ونفوذه عملها قبلك ....
استعوض ربنا خير في الارض واسعى بكل الطرق لرفع قيمة التعويض .... وربنا يخلف عليك خير بكرمه ورحمته

فيه كلام وصل لى وبيتقال من الكل ان عضو مجلس الشعب عمل على تعديل خط سير الطريق من الاول خالص لانه كان معدى فى ارضه كلها
الطريق كان المفروض يمشى على ضفة الطريق الشمال عدله وخلاه يمشى على ضفة الطريق اليمين وهنلاقى انهم دلوقتى بيعملوا دوران فى الاراضى علشان يطلعوا بكوبرى يعدوا بيه الطريق

بص يباشا سيب من موضوع عضو مجلس الشعب والكلام الى مش هيفيدك فى حاجة
الحل الوحيد قدام حضرتك انك تلجا للقضاء وترفع دعوى تعويض على الهيئة او الوزارة الى هتاخد ارضك
ملحوظة القضية هطول فى المحاكم لان هيدخل خبير فى القضية لتقدير قيمة الارض
دة الى انا اعرفة لان متخصص جنائى

الارض خلاص اتاخدت و اتفرد فيها الرمل فهل القضيه دى هتوقف اللى بيحصل
اعتقد لا , وده هيدخلنى تحت رحمه محامين التعويضات لان اللى بيقبل النوعيات دى من القضايا بيكونوا محامين تعويضات
والقضايا فى مصر مصاريفها كتيرة و حبالها اطول وفى الاخر الارض راحت واقبل بالموجود
مفيش حاجه اقدر اعملها غير انى اقول قدر الله وما شاء فعل
فى ناس وقفت قدام البلدزورات ومش لاقينهم دلوقت

كان الله في عونك
مش عارف اقولك ايه والله
اللهم اجرني في مصيبتي واخلفني خيرا منها
اللهم اضرب الظالمين بالظالمين واخرجنا منها سالمين

اقتباس:

---

المشاركة الأصلية كتبت بواسطة michohat

الارض خلاص اتاخدت و اتفرد فيها الرمل فهل القضيه دى هتوقف اللى بيحصل
اعتقد لا , وده هيدخلنى تحت رحمه محامين التعويضات لان اللى بيقبل النوعيات دى من القضايا بيكونوا محامين تعويضات
والقضايا فى مصر مصاريفها كتيرة و حبالها اطول وفى الاخر الارض راحت واقبل بالموجود
مفيش حاجه اقدر اعملها غير انى اقول قدر الله وما شاء فعل
فى ناس وقفت قدام البلدزورات ومش لاقينهم دلوقت

---

موضوع ان حضرتك ترفع قضية علشان توقف اعمال الحفر هتصرف فلوس على الارض لان الى استولى على الارض حكومة ومش هتقدر توقف المشروع
موضوع تحت رحمة المحامين الموضوع كلة ان المحامى هيتفق معاك على نسبة معينة من قيمة التعويض مش اكتر والنسبة بتختلف من محامى لمحامى وغالبا هتكون من 10:15%
هو فعلا موضوع القضية هيطول بس فى الاخر هتاخد تعويض
هو المدنى سكتة مقرفة وقضايا بطول

واالله ... حاول تقدم تظلم ... تطلب تعويض اعلى
وبفلوسه ... اشتري ارض رخيصة في مكان آخر .. وليكن مرسى مطروح منطقة عجيبة ... وكام سنة وسعرها حيعدي وحيدخل فيها استثمارات ... وربنا يعوضك عن أرضك الحالية

بس ماتسكوتش
حتى ولو ما خرجتش بنتيجة
وأعمل كل حاجة .. بالذو ق وبالهدوء وبالقانون
عشان ما تقعش في مطبات سياسية أخرى

عاوز اشوركم رحت اسئل فى هيئة المساحه عن الاجراءات اللى مفروض اعملها قالوا لى مفيش حاجه و ورونى ان اسمى مكتوب عندهم ومتسجل و لما سئلت عن التعويضات قالوا لى لما الطريق يخلص خالص و العربيات تمشى عليه هتتشكل لجنه وهتنزل تعاين وهيا اللى تقرر التعويض
فرأيكم ابدأ فى سكه القضايا من دلوقت ولا استنى اللجنه اللى ممكن تطول لغايه ما تتعمل؟