تزايد أعداد المجاهرين بالإفطار

**د.محمود صلاح** · 30-09-2007 06:02 PM

لاحظت أعداد كبيرة من المجاهرين بالإفطار فى نهار رمضان وبالذات سائقين الميكروباصات وداخل المقاهى وبعض العاملين ...
لا حول ولا قوة الا بالله العلي العظيم

**AlmAhAtmA** · 30-09-2007 06:15 PM

زمان كان فيه ورانا عماره الدور الارضي كان بجنينه
الجنينه دي كانت بتاعت مدام منيره
مدام منيره في رمضان كانت بتتغدي معانا علي المدفع
تخيلوا ليه
علشان ريحت اكلها و هيه بتسخنوا ما تضايقش الناس
و كانت بتجيب لابنها هدوم في العيد و ييجي معانا الصلاه الصبح و يستنانا نصلي و نروح نتفسح مع بعض
مدام منيره قبطيه مصريه جميله
ده موقف من زمان
الان بقه واحد زميل والدتي في الشغل بتحكلي لي انه مجاهر بافطاره و لما كلموه تخيل الرد كان ايه انا بشتري صيامي ب 10 جنيه بفطر بيها صايم كل يوم
انا اتجننت لما سمعت كده لا ده انت مش جاهل بالدين لا و كمان بتفتي
حاجات كتير اتغيرت و اتقلت بركتها حتي نفوس الناس

**mido777** · 30-09-2007 06:22 PM

فعلا انا وناس اصحابى كتير لاحظو الموضوع ده

انهارده كنت بجيب حاجة من جنب مجمع الكليات اللى عندنا فى اسكندرية...
وشوفت شباب كتير جداجداجدا قاعدين ياكلو قدام المحلات بتاعت الأكل عادى جدا واللى ساند على العربية هو وزميلته وهو ماسك فى ايده كانز وهيا ماسكه ساندوتش

ده غير ان المحل "ابو ربيع " كان علية زحمة جدا

بجد الواحد بيزعل على المناظر دية

**MTAK** · 30-09-2007 06:30 PM

لا حول و لا قوة الا بالله

**إسلام شاهين** · 30-09-2007 06:37 PM

الموضوع مبقاش موضوع فطار وصيام بقى تدني المستوى الأخلاقي للجيل الجديد بشكل بشع أنا وأنا رايح الشغل بشوف مناظر لا حول ولا قوة إلا بالله حاجة تحزن بجد من الشباب اللي فاكر إنه كده روش وبينسى يوم مايوقف قدام ربه يوم القيامه هيقول إيه ؟؟؟

ربنا يعفو عنا .

**Karim_Monir** · 30-09-2007 07:01 PM

السمكري اللي كان بيعملي عربيتي كان بيدخن
بس دخل المحل يتداري وقولتلة ليه كدة قاللي شغالين طول النهار وبنعطش
مش هاقول افتكرت المسلمين في صدر الاسلام
لا ءافتكرت شهدائنا في اكتوبر وهما بيحاربو في سيناء وشايلين عتادهم بالكامل وماششين بيها في الصحراء وهما صايمين

اللهم لا تؤاخذنا بما فعل فعل السفهاء منا