إحترسوا من ظبط زوايا فى محطة التعاون - صلاح سالم

احكى لكم ماحدث لى واتمنى الاتقعوا فى دائره النصب
الحكايه انى كنت ماشى فى طريق صلاح سالم وقلت ادخل امون من محطه التعاون اللى موجوده امام عمارات العبور
بعد الاستاد وكانت معايا العربيه 132
المهم وانا بمون شاهدت مكان ظبط الزوايا مكان شكله نظيف ومعرفش ليه رحت رغم انى بتابع مع محل ظبط من 10 سنين ومرتاح معاه المهم دخلت وقابلت واحد صغير السن قلت فى نفسى ده هيفهم يمكن ماالجهاز جديد وحديث واكيد سهل
المهم نزل الباشا وقعد يخبط ويعمل حركات وانا لمحه فى مرايه الورشه وقلت اصبر رغم غيظى دقايق والباشا
طلع يقولى العربيه محتاجه زرجينه للعجلتين قلت له نعم انا اول مره فى حياتى اسمع ان فى 132 محتاج زرجينه
قالى اصل العجلتين ماخرين قلت له ماهى بتتظبط من يوم ماتولدت العربيه من الشداد قلتله طيب ورينى هتركب الزرجينه فين البيه بيركب زرجينه طولها بالظبط 5 سم عاوز يحطها بين الكاوتش والرفرف دا اول هام الهام التانى والاهم
ان الزرجينه الواحده ب 35 ج × 2=70 ج + 35 ج ظيط يعنى ببساطه يتنصب عليك فى ثانيه ب 105 ج غير بوظان العربيه ودخولك فى مشكله اكبر طبعا انا مسكت فى نار يعنى مش كفايه السرقه لا لو قبلت الزرجينه معناها انها هطبق الرفرف اتلم على الاسطى الكبير وقعد يقنعنى بان كلام الباشا الاسطى صح وانى معرفش زيه مسكت فيهم بقى بعد 28 سنه العربيه معايا لسه مش هفهم وزعيق وصممت انى مش دافع الا لو خدت ورقه مختومه من المحطه ان السياره محتاجه زرجينه واتعملت ودفعت فيها كام رفضوا رفضت دفع حتى الكشف ولو حابين نطلب البوليس ونشوف المهم مشيت بدون ماادفع ولا مليم ومشيت وانا بالعن ابو النصب اللى شغال
وانا متخيل لو واحد ميعرفش ويفهمش هيتعمل فيه ايه وخصوصا ان بلادنا لا تحمى المغفلين ولا الجدعان ولا اى حد
فقلت انبهكم واكيد الموضوع ده منتشر
والله يعنا جميعا:shyy:

نفس الموقف ده حصل معيا فى نفس البنزينة الملعونة من 5 سنوات وكانت

معيا برضه 132 (الوحش الكاسر) وكأنك بتحكى اللى حصل معيا بالتفصيل

وانا اقوله 132 محتاجة زرجينة ؟؟؟!!!! ليه؟؟!!!! يقولى اكيد خبط فى الرصيف

وانت مش واخد بالك فقلتله لا شكرا انا معيش فلوس تكمل قلى خلاص هعملك

الزرجنتين بسعر واحدة ...ياسيدى شكرا ...ماهو ماينفعش ....رحت معلى

صوتى قالى خلاص لازم تدفع كشف قلتله ماشى بس هتدينى ايصال بكده

قالى مافيش ولما اصريت جالى مدير البنزينة النصاب قلى خلاص يابيه

خليها علينا ...رحت سيبه وماشى.....

خمس سنين ونفس اسلوب النصب .......البلد دى مش هيتصلح حالها ابدا :T_thum1[1]:

نفس البنزينه ال.......دى فيها ورشه الكاوتش حراميه والكشف والميكانيكا نصابين ومبيفهموش حاجه ومن كتر ما انا قرفان منهم مبحطش حتى بنزين من عندهم..!!!

شكرا لصاحب الموضوع على التنبيه...!!!

شكرا ع التنبيه.

جزاك الله كل خير يا باشا

شكـــــــــــــــــــــــ ــــــــرا

برافو عليك , تصرفك سليم جدا

مفيش امانة خلاص الناس دى مش بتخاف ربنا

كولة بقى بينصب دلوقتى ويسموها شطارة وتقليب عيش
واكل عيش عيش اية دة اللى كولة نصب .
انا ليا واحد قريبى اشترى عربية جديد المهم دخل مية فى الاسبراتير راح للميكانيكى راح فاككلة المكنة وطلعها برة العربية ويقولة العيب من المكنة طبعا انا لما عرفت الحكاية دية قولتللة وروحنا عملنا مشكلة مع الميكانيكى النصاب دة ولمينا الناس كلها علية وفضحناة
بس انتوا عارفين لسان الصنايعية ب 7 تلسن .

جزاكم الله خيرا على التنبيه

انا لو مكانك كنت عملتله هو زرجينه ....

ايوة ..بالظبط كده

اقتباس:

---

المشاركة الأصلية كتبت بواسطة أشرف فتحى

نفس البنزينه ال.......دى فيها ورشه الكاوتش حراميه والكشف والميكانيكا نصابين ومبيفهموش حاجه ومن كتر ما انا قرفان منهم مبحطش حتى بنزين من عندهم..!!!

شكرا لصاحب الموضوع على التنبيه...!!!

---

من حوالي سنتين أو تلاتة كده اشتغلوني في النزينة دي في موضوع الكاوتش .. كانت فردة مريحه شوية .. المهم قلت ازود الفردة شوية لحد ما اروح لبتاع الكاوتش بتاعي .. المهم قلت للراجل زودلي الفردة دي (تيوبلس) المهم لاقيت الراجل جاي ومعاه زجاجة فيها مياه بصابون وعمال يرش على الفردة من الزجاجة :36_1_40[1]:.. قلت ليه يا عم زود الفردة بس .. مش عاوز أكشف عليها .. قالي يا بيه انا عارف شغلي كويس :ma(30):.. المهم لاقيته من غير ما أقول ليه اي حاجة عمال يغرز السنبك بتاع خابور اللحام في الفردة .. :I_angr1[1]:

قالي الفردة فيها تلات اخرام هي اللي مخلية الفردة بتريح منك .. ومش حتعرف تمشي عليها .. قلت ليه يا عم انا عاوز ازود الفردة مش عاوز الحم حاجة .. بس كان الأوان فات ودبس الزبون (اللي هو أنا) :Copy of majd(4):

المهم بقى نيجي للحساب .. قعد بقى يعمل وشوش الأدب والاحترام :shyy: وقالي الخابور بعشرة جنيه .. أنا طبعاً :44: وعملت ليه فيها مجنون .. وأني حولع في البنزينة لو منزلش في الحساب وخاصة أني مطلبتش منه أنه يعمل لحامات في فردة الكاوتش ..

المهم من هنا لهنا .. حاسبت على بخمسة جنية .. بقعد يأنب في ضميري .. وأنه ميرضيش ربنا .. قلت ليه هو ده اللي عندي تاخدهم ولا أمشي .. قالي لا حاخدهم .. بعد كده كل ما افتكر الموضوع ده احس انهم اشتغلوني اشتغالة ملهاش حل .. ودي كانت أول وأخر مرة أخش المحطة دي سواء أحط بنزين أو أعمل اي حاجة في الكاوتش

حصلتلي يا باشا و دفعت زي الامور 110 بس قالي الزرجينة الواحدة 40 جنيه و 30 جنيه مصنعية
و قالي تفس الكلام الي قالهولك بالظبط في بنزينة التعاون الي في الدقي
حسبي الله و نعم الوكيل فيهم

الف شكر على التنبيه
وياريت كل واحد يحصل معاه اى موقف زى ده يحكيلنا عليه للعلم

اقتباس:

---

المشاركة الأصلية كتبت بواسطة ash_rsi

ايه وخصوصا ان بلادنا لا تحمى المغفلين ولا الجدعان ولا اى حد

---

شكراً على التحذير المهم وياريت كل اللي عنده تجربه مش لطيفه (نصب ) مع ورشه يحكي عشان الناس تستفيد .


تعقيب (ما فيش أي بلد في العالم بتحمي المغفلين )

للأسف الموضوع ده حصل معايا فى نفس البنزينه من 5 سنوات تقريبا فى عربيتى السابقه الفليشيا وبعدها فكيت العفشه كامله علشان أضبط العربيه
الحمد لله الواحد كان لسه قليل الخبره وحسبى الله ونعم الوكيل فيهم

حصل معايا نفس الموقف في البنزينة دي و اتنصب عليا ب 180 جنيه و مرة في التعاون اللي في 6 اكتوبر بس ممكن حد من الاخوة يفيدني انا مش من مصر و مش عارف ايه معنى زرجينة

يييييييييييييييي
هم مزهقوش من الحوار ده
يا جماعه اللي يقرا الموضوع من سكان مدينه نصر و مصر الجديده ينصح قرايبه و زمايله بجد عن موضوع البنزينه دي و حركات النصب الرسمي

جزاك الله خيرا

هى ايه الزرجينة دى ؟؟

الحمد لله انك فلت من النصبه دي

وأنا بحذر كل الناس فعلا من البنزينه دي لأني حصل معايا فيها برضه موقف نصب وكنت بكشف على عربية فيرنا هناك والصنايعية عمولوا عليا نظام حلق حوش وأن العربية زي الفل وفبريكا وبعد ما خرجت مطمنتلهمش ورحت بنزينه تانية وأكتشفت ان العربية جايبه شاسييييييييييييه

وطلع صاحب العربية مظبط معاهم كمان بس الحمد لله اني نفدت

إذن من كلام الناس ان محطة بنزين التعاون أمام عمارات العبور شغلها نصب في
1- الكشف على السيارة موتور وشاسيه
2- زبط الزوايا
3- زبط الكاوتش ولحام
وطبعا ناس زي كدة اكيد بيغشوا في البنزين لذلك انصح كل الناس بمقاطعه البنزينة دي مقاطعه تامه

شكرا علي التنبيه . جزاك الله خيرا

بنزينة التعاون بتاعت صلاح سالم أوسخ بنزينة شفتها في حياتي كمية نصابين فيها مش طبيعية وموضوع الزرجينة دهإتنصب عليا فيه ودفعت 150 جنيه أونطة (الله يلعنهم)
وبرضه كنت بصلح كوتشة فيها خرم واحد قعد يخرمهالي وأنا مش واخد بالي لحد أما دفعني 70 جنيه إبن الحرامية

الحمد الله انى قدرت الفت نظر الاعضاء للناصبين دول واتمنى محدش يقع تحت اديهم
ولى رجاء حار للجميع اى حد يتعرض لاى موضع فيه غش ولا نصب ارجوا انه يلفت نظر الاخرين وقنا ربنا من شر الكدابين والطماعين

بالنسبه لاستفسار ايه هى الزرجينه
دى عباره عن جهاز بيعمل بضغط الهواء بيوضع بين ( فى حاله العفشه ) بين الشاسيه والمقص لاستعدال المقص فى حاله تعرضه لخبطه
ربنا يحمينا جميعا

شكرا جزيلا على التنبيه

بس لى سؤال هوا ليه انتا طلبت منهم ورقه بالكلام ده
وبرضوا العضو ahmed_su قال انوا طلب وصل ورفضوا
ليه انتوا طلبتوا الورقه ومختومه
شكرا جزيلا