اعزائي حبيت استشيركم في مشكله بتواجهني بقالها فتره
انا عربيتي شاهين 1400 ، ركبتلها تكيف والحمدلله بقاله فتره شغال كويس بس في مشكله بتواجهني ، مع تركيب التكيف كان ضروري اني اركب مروحه تبريد تانيه علشان الحرارة ، وفعلا الحراره بقت كويسه بس حصلت مشكله في الكهربا ، بمجرد ما بتشتغل المراوح حتى وبدون تكيف علشان تبرد العربيه لما توصل الحراره لدرجة 90 بلاحظ ان العربية بتتخنق وال rpm بيقل وكمان ممكن لو قرصت عليها تصقف مع العلم اني بحط بنزين 92 وبمجرد ما المراوح تقف العربية ترجع تاني طبيعية والعزم يزيد بشكل ملحوظ
وكمان في حاجات تانيه ملحوظه زي مثلا لما تشتغل المراوح وانا منور النور بليل النور بيقل وكمان لما ركبت كست جديد بقى يطفي ويرستر لوحده لحد ماجبتله سلك مباشر من البطاريه وحاجات كتير بتدل على ان الكهربا ضعيفه وبتلعب
المهم ، انا اسف اني طولت عليكم ، رحت لكهربائي يقيس الشحن الغريبه انه قال ان الشحن تمام وانه 14v على السلنسيه يعني ممتاز جدا والدينمو بخير مع العلم انه الفبريكه وملعبتش فيه نهائيا
في ناس قالولي ان الدينمو ليه امبير غير الفولت وان الكهربائي بيقيس الفولت فقط ونصحوني بحاجه من الاتنين يا امى اني اركب استبليزر يعني منظم كهربا للعربية (ودا مسمعتش بيه في مصر) يا امى اني اسال واشوف اذا كانت ضفيرة العربية تستحمل دينمو بأمبير اعلى
بيني وبينكم انا فكرت في دينمو الشاهين ال1600 اللي بتنزل مكيفه بس مش عارف اذا كان فعلا امبيره اعلى وهيفيدني ولو فعلا اعلى ضفيرة العربية هتستحمله وهلاقيه بكام وفين ؟؟ ياريت تساعدوني بجد المشكله مضايقاني خصوصا ان تشغيل التكيف في الحر دا معناه تشغيل اكتر للمراوح معناه عربيه تقيله ومبتسحبش
ملحوظه : انا مركب بطاريه AC Delco سعودي جافه من سنه تقريبا ونفس امبير الفبريكه مش فاكر كام الصراحه ، ساعة التغيير سمعت انها افضل واشد في الكهربا بس للأمانه ملمستش اي فرق اللهم انها فعلا انضف ومبتحتجش ميه والكلام دا