سـؤال مـهـم بـخـصـوص الـثـبـات وأرجـو الافـاده مـن الـخـبـراء ؟؟؟؟

**Hosam_Optrawy** · 26-05-2009 08:19 AM

السلام عليكم

كنت باتكلم انا وزميل لنا فى المنتدى عن الثبات

واختلفنا فى نقطه

انا كنت باقوله ان كل ما قاعدة العجلات كبرت اللى هو المسافه بين العجله الاماميه والخلفيه الثبات بيزيد

وفى المقابل كل ما المسافه بين العجله الاماميه واول العربيه قصرت , والعجله الخلفيه واخر العربيه قصرت برضه ده بيزود الثبات

وهو كان رأيه ان لأ دول ملهمش علاقه بالثبات دول ممكن يبقى ليهم فايده فى الملفات والدريفتات

اما اللى بيأثر فى الثبات بالنسبه للعجل هو المسافه بين العجلتين اليمين والشمال

فارجو الافاده فى هذا الموضوع

**MMamdouh** · 26-05-2009 11:31 AM

بص... المسافة بين العجلات بتاثر على حاجات كتير

لما المسافة بين المحور الامامى و المحور الخلفى تزيد زى ما انت شرحت فى المثال الاول دة بيزود الثبات على سرعات عالية و انت ماشى فى خط مستقيم... لكن فى نفس الوقت العربية الطويلة بيبقى صعب المناورة بيها فى الملفات الديقة و ثباتها فى المناورات بيبقى مش قد كدة

العكس تماما بيحصل لما تبقى المسافة بين العجلات اليمين و الشمال كبير... العربية بيبقى ليها ثبات عالى فى الملفات بس على سرعات عالية بيبقى صعب السيطرة عليها مقارنة بالعربية الاطول

و كا نظرية عامة... عشان ترفع مستوى ثبات و كفائة المناورة لاى عربية لازم يبقى وزنها - او اكبر نسبة من وزنها - بين المحورين و دة السبب ان السوبر كارز بيبقى فيها الموتور فى نص العربية مكان الكنبة عشان يبقى الوزن كلة بين المحورين و بالتالى على كلامك يبقى الافضل ان العجل الامامى يبقى للامام قدر الامكان و الخلفى ورا قدر الامكان... او على الاقل يبقى موتور العربية بين المحورين قدر الامكان

MMamdouh