باركولى وانصحونى .. جبت سيينا 2002 - 1600

**Ahmed Hamdy** · 26-05-2009 03:29 PM

يا جماعة الحمد لله اشتريت عربية سيينا 2002 - 1600 حالتها كويسة .. استخدام سنة واحدة وكانت مرفوعة ..
يا ريت لو فى حاجة آخد بالى منها تنصحونى بيها ..

فى بس مشكلة واحدة .. ان مفتاح العربية مشفر بس للأسف مش موجود غير مفتاح واحد .. صاحبة العربية كانت فى دبى ونسيت المفاتيح التانية هناك .. بس معايا كارت فى أكواد المفاتيح .. هل ممكن أطلع بيه نسخة وفين وبكام ؟؟؟

**Amr_Moh** · 26-05-2009 03:57 PM

مبروك عليك عربية اعتمادية اعدت معايا ٣ سنين ماشفتش منها حاجة وحشة بس كنت ال-١٤٠٠

**Ahmed Hamdy** · 26-05-2009 04:06 PM

المشاركة الأصلية كتبت بواسطة amr_moh

مبروك عليك عربية اعتمادية اعدت معايا ٣ سنين ماشفتش منها حاجة وحشة بس كنت ال-١٤٠٠

ده أنا لسه واحد صاحبى معكنن على .. قعد يقولى خلى بالك من السخونة .. السيينا بتسخن ولو سخنت مرة واحدة يبقى شكرا الموتور كده لازمله عمرة .. والموتور الـ 1600 ده أصلا مش بتاعها فكبير على الحوض وقريب من الاكصدامات فأى خبطة فى الاكصدام المسامير بتخرم الريداتير .. ومعرفش ايه تانى .. المهم عقدنى وقالى مجبتش لانوس ليه ... ؟؟؟ !!!! وأنا مبحبش اللانوس وشايف السيينا أحسن منها بكتير الصراحة ..

**motoxp** · 27-05-2009 11:43 AM

ياراجل لانوس طب قول حاجة تانية على العموم معايا سيينا بقالها سنة و نصف و الله مشوفتش حاجة و حشة منها خالص
على فكرة كنت حجيب واحدة 1600 بس موضوع المفتاح ده خلانى اتردد و مجبهاش
على العموم الف مبروك

**Ahmed Hamdy** · 30-05-2009 01:04 AM

المشاركة الأصلية كتبت بواسطة motoxp

ياراجل لانوس طب قول حاجة تانية على العموم معايا سيينا بقالها سنة و نصف و الله مشوفتش حاجة و حشة منها خالص
على فكرة كنت حجيب واحدة 1600 بس موضوع المفتاح ده خلانى اتردد و مجبهاش
على العموم الف مبروك

أنا أصلا كنت ناوى على بونتو .. بس لقيتها صغيرة وفكرت فى الكليو بس كنت خايف من قطع غيارها الغالية .. وبعدين لقيت السيينا دى كانت مرفوعة وماشية قليل جدا فحسيت انها فرصة والحمد لله خدتها ...

بس حاسس انى ندمان شوية وبقول يا ريتنى جبت الـ 1400 لانى زى ما قريت هنا فى المنتدى ان صيانتها أسهل وقطع غيارها أرخص ..

أنا مجربتش الـ 1400 بس الـ 1600 دى موتورها جامد جدا .. بس للأسف استهلاكه عالى جدا فى البنزين .. بتعمل تقريبا 130 - 140 فى الصفيحة .. مش عارف ده الطبيعى ولا فيها حاجة محتاجة تتظبط ..
ياريت تقولى استهلاك البنزين فى الـ 1400 كام ..

**ainshouka** · 30-05-2009 06:40 PM

المشاركة الأصلية كتبت بواسطة ahmed hamdy

أنا مجربتش الـ 1400 بس الـ 1600 دى موتورها جامد جدا .. بس للأسف استهلاكه عالى جدا فى البنزين .. بتعمل تقريبا 130 - 140 فى الصفيحة .. مش عارف ده الطبيعى ولا فيها حاجة محتاجة تتظبط ..
ياريت تقولى استهلاك البنزين فى الـ 1400 كام ..

بيتهيألى عمر ميكون استهلاك البنزين بالشكل دا طبيعى كده هى بتستهلك جامد

طب استهلاكها دا انت قسته جوا البلد ولا على الطرق السريعة

**Ahmed Hamdy** · 31-05-2009 10:32 AM

المشاركة الأصلية كتبت بواسطة ainshouka

بيتهيألى عمر ميكون استهلاك البنزين بالشكل دا طبيعى كده هى بتستهلك جامد

طب استهلاكها دا انت قسته جوا البلد ولا على الطرق السريعة

لأ ده جوه البلد .. شوية زحمة وشوية طريق ماشى شوية ..

**awazeer** · 31-05-2009 12:43 PM

بالنسبه للموتور هو فعلا كبير عليها وده السبب ان مش اي حد يعرف يشتغل فيها (حوض ضيق جدا ) بس امكانياته جباره واكيد انت شوفت ده بنفسك

**msy123** · 18-10-2009 03:56 PM

ممكن مساعدة انا محتاج جداول الصيانة الدورية لل1600 سى سى بداية من 100 الف كم
و شكرا

**hoda9999** · 19-10-2009 02:03 AM

بص يا مان مبروك عليك العربية اتمنى انها تكون
hlx
1600
ماتور عفى وفارك كتيير عن 1400
في السحب ممكن تسمى رياضى مش عاءلى
استهلاك البنزين الى انتا بتكول علية عالى جدا
حتى على ال 1600
نصيحتى
روح اشترى التى
فلتر بنزين اى حاجة الموجود
فلتر هوا اى حاجة الموجود
فلتر زيت اى حاجة الموجود
بوجيهات ن ج ك يابانى 2 شمعة
سير دينمو
سير تكييف
سير كاتينة
سبراى منظف انجيشن
زيت باور ماركة جانك علبة
وتتطلع على محطة بنزيين وطنية والميكانيكى بتاعها واسعار حنينة
ويغيرلك زيت ماتور افضل يكوت شل
15w-50 والفلتر ويغيرلك زيت الباور والسيور وينضفلك النجكشن والسيور والماتور بالهوا ويغيرلك الفلاتر وانشاء اللة العربية ترجع زيرو والتكلفة مش هتكون كتيير
واتأكد ان الكاوتش سليم والعفشة والكبالن والتيل خلى يبوصلك علية والبطاحات كمان
اى حاجة فى العفشة عليك وعلى امير وجوزيف فى ابو داود الظاهرى مدينة نصر واشترى القطع الغيار الصلية لان دى العفشة وعن تجربة اى حاجة فى العفشة سواء قطع غيار او التركييب مبتعمرش خالص لو برة التوكييل