الموضوع: انا بدأت اقفل من العربية ايه العمل؟

العربية مابقلهاش 3 شهور معايا و حالتها كانت حلوة و عاملة كل الصيانات في التوكيل الفردية و الزوجية
بس حصل كذا حاجة خلوني بقيت مقلق من العربية
1- موضوع الدفزور ده ظهر بعد ما اشترتها ب اسبوع (الله اعلم هيصلحوه في التوكيل ببلاش ولا لا ) 1700
2- كويل ضرب و في انتظار البقية 350
3- كهربة العربية قطعت فجأه من غير سابق انظار و الحمد لله المشكلة اتحلت 250
4-الاشارة بتاعت الفانوس الشمال عطلت يوم ورجعت تاني
5- مكنة الازاز بتاعت الراكب اللي جنب السواق باظت
و دي اخر مشكلة كلمت الراجل اللي ايمن عرفني عليه و قالي تتصلح ب 200 جنيه
اعمل ايه و ايه رأيكوا يا وحوش ؟؟؟؟

المشاركة الأصلية كتبت بواسطة د.محمود صلاح

هى دى الاعطال اللى معظم ملاك الميجان متفق عليها هنا فى المنتدى , اللى تعرف تعمله بره التوكيل اعمله

لا يا استاذ محمود الاعطال اللي الملاك متفقين عليها هي ( الكويلات و الديفزور و دراع الباب اللي بيقشر و صوت الطقطقة اللي ساعات بيطلع من الابواب و حزام الامان و الجنوط الضعيفة نسبيا و البطرية بالنسبة لموديل 2005 و اول 2006 )
اما ان العربية تقطع مية ونور ماسمعتش عنها قبل كده هنا
و الاشارة دي
و اخيرا ماكينة الزجاج

الموضوع مش موضوع فلوس قد ما هو موضوع راحة نفسية و ثقة في العربية
انا بفرض اني كنت مسافر مثلا و حصل اي حاجة من دول هعمل انا ايه بقي ؟؟؟؟؟؟؟

المشاركة الأصلية كتبت بواسطة أبو عبدالله

والله يا أخي ربنا يعينك ويقدرلك الخير بإذن الله
انا بس عاوز اقولك اني قولت الكلام ده اكتر من مره وملاك الميجان مقتنعين بالعربيه ومفيش مشكلة وده حق لهم وربنا يباركلهم في عربياتهم
ولكن الفكرة ان مش اي حد يتقبل انه يشتري عربيه ويقول عليها اوروبي وبعدين يحصل معاه كل الحاجات اللي انت ذكرتها دي ويبقى الموضوع عادي
ونفس الكلام ده قولته قبل ذلك
افرض اني عاوز اسافر مشوار طويل مثلا
والله انا لن أطمئن للعربيه اني اعمل بها مشوار طويل
لأن لو افترضنا وعملت حاجه من دول في المشوار
موقف صعب بجد
والكلام على العربيه والله ليس من فراغ ولكن انظر حولك
ربنا يبارك لملاكها والله
ولكن مش اي حد بيقبل ان عربيته يبقى فيها اي حاجه من دول ويبقى مبسوط وطبيعي

وربنا يعينك ان شاء الله

شكرا يا ابو عبدالله علي الدعاء
ربنا يسمع منك
بالنسبة لموضوع العربية انا مش عارف انت صح ولا غلط لحد دلوقتي والله يابو عبدالله لان العربية لسه مبقلهاش معايا 3 شهور و يمكن اكون منحوس و خدتلي عين و كله طلع دلوقتي و بعد كده مش هيحصل حاجة


ساعات بقول اي عربية هشتريها مستعملة لازم هصرف عاليها ايا كانت حالتها حلوة ولا وحشة
ومشكلة الازاز دي حصلت مع اتنين صحابي واحد بتويوتا كورولا 2005 و التاني لانسر 2004 فهي مشاكل بتحصل في كله و كمان العربية فيها مميزات كتير تعوضني عن المشاكل دي
وساعات اقول لا المشاكل كتير خصوصا اني عارف العربية اتغير فيها ايه من ساعت ما المالك الاول اشتراها علشان معايا كل اوراق الصيانة و التغيير

بس انا اوعدك اول ما اكمل بيها سنه ان شاء الله هقولك علي حكمي بمنتهي الامانة

المشاركة الأصلية كتبت بواسطة ahmed a.maksoud

و هل تعتقد سيادتك أن مالكى الميجان مش بيسافرو بيها مثلاً

ما هو أنا لو معايا العربية بقالى 4 سنين و كل لما أجى أسافر العربية تعطل يبقى أكيد مش هسافر بيها تانى....... و لو هى فى ال 4 سنين بتعطل منى مرتين تلاتة فى السنة يبقى العربية مش هقعدها بعد السنة الأولى و هبيعها على طول.

كل الأعطال اللى أحمد قالها ممكن تمشى عليها لو أنت فى طريق سفر ما عدا طبعاً موضوع أنها قطعت كهرباء.........طب حضرتك سألت هى قطعت كهرباء ليه ؟؟؟؟
عشان فيوزات بايظة.......هل دى مش ممكن تحصل فى عربيات تانية و أنت مسافر؟؟؟؟

على فكرة انا لما بحب أسافر أى سفرية دايما و الحمد لله بطلع بالميجان و ما بطلعش بالياريس لإنى الياريس مقلقة على طريق السفر عكس الميجان ممتعة جدا فى السفر

بالنسة لموضوع قطع الكهرباء بسبب فيوزات دى أول مرة أسمعها من حد فى الميجان
لكن هى حصلت لى قبل كده فى لانسر 98 و حصلت لأخو واحد صاحبى كان معاه كرولا 2008 جنوب افريقى قبل ما يبعيها

أحمد جمال الحاجات اللى قلت عليها من ديفيزور و كويل حصلت لمعظم ملاك الميجان يعنى حاجة انت اكيد عارفها و بالنسبة لموضوع الإشارة دى حاجة بسيطة يا أحمد و حصلت لى قبل كده و إتقالى أنها علقت لإنك ممكن تكون خدت مطب جامد أو حفرة فإتهزت من مكانها فعلشان كده ممكن تعلق منك

بالنسبة للديفيزور يا أحمد انا عرفت من م/ محى ان بيغيروه داخل الضمان للسيارات اللى معدتيش الـ 60 الف بشرط انك تكون مواظب على جميع الصيانات فى التوكيل

رأى الشخصى لو حتبدأ تقفل من الميجان بيعها أحسن لإنك بدات تقلق منها و مش حتعرف تستمع بيها

المشاركة الأصلية كتبت بواسطة Mahmoud Saloum

+100000000 سيبك من الزجاج (الافضل انك تصلحه لو مافبش حاجة اتكسرت) وسيبك من الديفيزور والكويل اللى انا عايز اسألك عنه موضوع قطع الكهرباء العطل كان ايه واتصلح ازاى للاستفادة وماتزعلش دى حظوظ والعربية لازم تاخد العين يعنى لازم تاخد العين واسال اخاك. بس انا ليا استفسار انت بتقول ان صاحبها ادالك ورق الصيانة يعنى يا اما العربية مبتصرفش وده يبقى حظك العثر انها صرفت معاك يا اما كانت بتصرف كتير ومبهدلاه وتبقى العربية فيها مشكلة وتبقى انت الغلطان انك اشتريتها

استاذ ابو عبد الله لازم تركب ميجان علشان تعرف احنا بنحبها ليه وليه فضلناها على حاجات تانية كتير رغم ما يقال اللى يركب الميجان يحس انه مركبش عربيات قبل كده الميجان قصة تانية خالص.... وشكرا

شكرا يا استاذ محمد علي مشاركتك
السبب انا ذكرته في المشاركة اللي فاتت مش عارف انا كنت عامل اقتباس لكل المشاركات بس اول 3 اختفوا
العربية مصرفتش كتير ولا حاجة بالنسبة للميجان لكن بالنسبة لعربيات تانية هيبقي كتير

المشاركة الأصلية كتبت بواسطة Ahmed A.Maksoud

أحمد يا جمال.....
أولاً ربنا معاك

ثانياً يا أحمد أنت شارى عربية مستعملة يعنى لازم تتوقع أن ممكن يحصل فيها حاجة فى أى وقت.............أنت مش شارى عربية زيرو

و بما أن مشكلة الكهرباء اللى حصلت قبل كده كانت فيوزات و دلوقتى مشكلة أشارة فأنا أعتقد ( مجرد أعتقاد شخصى مش أكتر ) أن العربية فيها مشكلة كهرباء نتيجة لأن المالك الأول خلى حد مش فاهم أشتغل فيها.........و الله أعلم

احمد باشا
انا عارف ان اكيد في مشاكل هتحصل بس مش كله مره واحده
بالنسبة لموضوع الكهربة الراجل اللي هو اصلا شغال في الكهربة في التوكيل قالي انه ماتلعبش فيها قبل كده ولو كان اتلعب مكنتش هشتغل فيها
وانا اعتقد ان سبب اني قافل شوية ان االاهلي اخد الدوري و الامتحان جه زي الزفت الدكتور ( اسامة المليجي ) زمالكاوي و العربية جت كملت عليا