فيها أيه لو نمشي علي اليمين
السادة الاعضاء الكرام...
أسعد الله صباحكم بكل خير...
مش عارف ليه اللي بيمشوا بسرعة بطيئة بيكونوا ماسكين الشمال علي طول و اللي جاي بسرعة يضطر يعدي من اليمين
يعني النهاردة مثلا رايح الشغل متاخر فماشي بسرعة و عمال أعدي العربيات اللي قدامي من اليمين و معظمهم يا اما لسه ماصحيوش من النوم أو عمالين يتكلموا في الموبايلات و ماسكين الشمال بصراحة حاجة متعبة جدا المشي بطريقة الزجزاج دي
تخيلوا واحدة ست ماشية قبل الكيلو 4 و نص و بتتكلم في الموبايل و كانت علي الشمال طبعا انا بأقلب نور الاول و أنا جاي من الخلف و بعدين بأدي أشارة يمين مع كلاكس و أروح معدي من اليمين , الهانم بقة كانت بتتكلم في الموبايل و مش واخدة بالها و العربية هيا اللي ماشية و راحت حادفة يمين , طبعا زودت السرعة و خطفتها من اليمين بسرعة و لما هيا فاقت علي صوت الكلاكس ردت العربية شمال مرة واحدة كانت هاتلبس في عربية تانية كانت بدأت تعديها من الشمال
أيه اللي يجري لو مشينا علي اليمين و اللي بيتخطي اللي قدامه يتخطاه من الشمال و بعدين يكمل في اليمين
و اللي بيتكلم في الموبايل أو اللي بتسرح شعرها أو بتعدل الطرحة في المراية تقف علي جنب الطريق (اليمين طبعا) و تشغل الانتظار
أنا شخصيا بأعمل كده بس لما بكون مستعجل أو في حالة طارئة بأضطر الي اساليب أخري لا احبها
ليه مانمشيش عدل ؟؟؟؟
معلش طولت عليكوا
ربنا يسترها معايا و معاكوا
م/ سمير الشهاوي