هيونداي i 10 2010

**sara2001** · 28-05-2009 03:09 PM

السلام عليكم

في البدايه عايزه اشكر كل اللي قائمين على المنتدى بجد مجهود جبار انا تقريبا بقيت مذاكره كل العربيات اللي كنت عايزه اعرف عنها معلومات واعمل ما بينها مقارنه الشرح وافي جدا

انا كنت عايزه اشتري عربيه i 10 فول اوبشن وبعد اللف على الوكيل والبحث في الموقع عن مميزاتها وعيوبها عندي كم سؤال وارجو منكم النصيحه لأن دي اول مره اشتري عربيه وخايفه من عدم الخبره

انا شفت الموضوع بتاع قطع الغيار اللي اسعارها عاليه جدا وكنت عايزه اعرف بعد فترة الضمان لو حتحتاج تصليح بره الوكيل حتكون قطع الغيار اسعارها غاليه برده ولا لأ؟

الحاجه التانيه انا دوخت واستنيت حوالي 10 ايام لغاية ما الوكيل جاب واحده فول اوبشن وده خلاني اشك انها تكون بتيجي فاضيه وتتعمل فول اوبشن هنا زي ما البائع بتاع سمير ريان قاللي (ويمكن يكون بيقول كده علشان مش عنده الفول اوبشن بتاعتها ويدفعني لشراء البيكانتو اللي عنده اكتر) لكن الوكيل اكدلي ان الكاسيت بس هو اللي راكب هنا وقاللي انت تعرفي تميزي بنفسك .... مش عارفه ازاي؟ حاجه تحير الواحد مش عارف يصدق مين؟

العربيه الفول اوبشن اللي في الوكيل دلوقتي اللي حتاخد حوالي من 10:7 ايام بعد الحجز على ما تاخد افراج جمركي وييجي ورقها موديل 2010 ومش عارفه دي حينفع تترخص على طول ولا لأ؟

سؤال اخير ايه الأوراق والحاجات اللي حستلمها عند شراء العربيه

**sara2001** · 28-05-2009 03:12 PM

وهل الأفضل اشتري من الوكيل ولا من معرض من المعارض ولكم مني جزيل الشكر

**karimone** · 28-05-2009 04:18 PM

بالنسبه للترخيص هاتترخص 2010 مادام ورقها جاي من بره 2010

المرور بيعترض علي 2010 دلوقتي للعربيات المجمعه محلياً زي الفيرنا

**A.Saad** · 28-05-2009 08:08 PM

المصرية مش موثوق فيه خالص
ناس كتير فى المنتدى اشتكت منه
ممكن تعمل بحث فى المنتدى عنهم

**sara2001** · 29-05-2009 03:06 AM

المشاركة الأصلية كتبت بواسطة ehibrahim

بداية الف مبروك مقدما وربنا يباركلك فيها السيارة فوق الممتازة وبالنسبة لاستفساراتك بالنسبة لقطع الغيار هى فعلا غالية ولكن اعتقد ان ذلك بسبب ان السيارة ما زالت جديدة فى السوق ولم تنتشر يعنى حوالى سنة هتختلف اسعار قطع الغيار لهذه السيارة ام بالنسبة لموضوع الترخيص فسوف يتم الترخيص على اساس انها 2009 لان تراخيص 2010 يبدأ من شهر اغسطس . ولو فيه اى استفسار اخر تحت امرك

الله يبارك فيك متشكره جدا على ردك
معنى كده ان اسعار قطع الغيار غاليه بره الوكيل برده مش كده؟
وبخصوص الترخيص انا سمعت ان ماينفعش تترخص قبل شهر سبتمبر

**sara2001** · 29-05-2009 03:11 AM

المشاركة الأصلية كتبت بواسطة ash257

أولا.. أشتري من أي مكان ذو سمعه كويسة يعني لو مافيش فرق في السعر بين الوكيل وبين الموزعين ولا المعارض هاتي من التوكيل ولو في فرق هاتي من معرض موثوق فيه (سمير ريان - الطارق - المصرية)
ثانياً.. حاكاية الكماليات دي طبعاً لو حاجة مش باينة زي التكييف ممكن تكون بتتركب هنا بس طبعا يفدنا حد يكون خبره أكتر وكمان ممكن تكون التجهيزات زي زراير الازاز الكهرباء والتكييف جايه مع العربية بس ممكن يكون المكن متركب هنا زي موتور التكييف ومكن الأزاز وكمان السنتر
بس عايز أقول حاجة مادام الوكيل بيضمنها خلاص مفيش قلق لأن الحاجات دي مش تصنيع مصري ده هو تركيب بس
ثالثاً.. موضوع قطع الغيار انا بدعي ربنا يكرم ملاك العربية وترخص شويه لأني حاسس إنها غالية جداااااااااااااا جداااااااااااااا على ثمنها اللي معقول نوعاً ما

الف شكر على الرد ..... بس موضوع الكماليات ده مش ممكن يكون صيني مثلا؟

**sara2001** · 29-05-2009 03:20 AM

المشاركة الأصلية كتبت بواسطة karimone

بالنسبه للترخيص هاتترخص 2010 مادام ورقها جاي من بره 2010

المرور بيعترض علي 2010 دلوقتي للعربيات المجمعه محلياً زي الفيرنا

متشكره جدا على ردك جزاك الله كل خير
بس حضرتك متأكد من ان الإعتراض على ترخيص العربيات المجمعه محليا بس ولا كله؟ لأن ده السبب الأساسي تقريبا في ترددي للشراء دلوقتي .... خايفه اشتريها واركنها 5 شهور تحت البيت خصوصا ان الوكيل ما اكدش انها ينفع تترخص قاللي لو ماعرفتيش ترخصيها اجري لوحات تجاريه!!!!
انا مش فاهمه ازاي اصلا في موديل 2010 واحنا لسه في 2009 واعرف منين انها 2010 مش 2009 ولا حاجه؟

**sara2001** · 29-05-2009 03:24 AM

المشاركة الأصلية كتبت بواسطة a.saad

المصرية مش موثوق فيه خالص
ناس كتير فى المنتدى اشتكت منه
ممكن تعمل بحث فى المنتدى عنهم

متشكره جدا على الرد

انا فعلا مش مستريحه للتعامل مع المصريه في ناس كتير قالتلي كده برده وسمير ريان كمان مش مريحني بعد موقف التنفير من العربيه اللي عايزه اشوفها مش قادره أثق فيهم