الطريق من القاهرة الي اسيوط

**nubera97** · 28-05-2009 11:55 PM

السلام عليكم
كنت حابب من الاخوة الافاضل يعرفوني اذاي اسافر لمحافظة اسيوط بالسيارة وافضل وأأمن طريق لها والوقت المستغرق تقريبا
ولكم تحياتي
:k4:

**nubera97** · 30-05-2009 12:24 AM

ايه يا جماعة محدش سافر قبل كدة لاسيوط من القاهرة ،،،، ؟؟؟؟؟؟ غريبة بجد

**beshir_lucky** · 30-05-2009 04:42 AM

فيه عندك ثلاث طرق للصعيد عموماً

أولهم الطريق الزراعي وده طريق كله مناطق سكنية ومطبات كتير وده أوله من القاهرة بيكون المنيب وبتمشي في خط طولي لحد أسيوط.

الثاني الطريق الصحراوي الغربي وده بدايته من طريق الفيوم وتوصل لطريق الفيوم عن طريق ميدان الرمايه في إتجاه 6 أكتوبر بس بتكمل علي طول من غير ما تدخل مدخل أكتوبر لحد ما بتلاقي بنزينه وبعدها بتلف اليوتيرن وتدخل أول يمين دا طريق القاهرة أسيوط الغربي "فيه علامه إرشادية بعرض الطريق بتوجهك للمدخل دا".

الثالث هو الطريق الصحراوي الشرقي وده بدايته من بعد 15 مايو وهوا طريق جديد وأخره لحد بني سويف وبعد كده بتكمل علي الطريق القديم.

الطريق الثاني هوا أفضلهم من وجهه نظري "الصحراوي الغربي" يعتبر طريق أمن وعليه خدمات غير الشرقي ، الزراعي أمن وعليه خدمات بس ممل جداً.

وتوصل بالسلامه إن شاء الله،

**ehab_mansour** · 30-05-2009 10:36 AM

السلام عليكم

انا أؤيد رأي ان الطريق الصحراوي الغربي هو أفضلهم وده هتاخده زي ما قلك الأخ الكريم من الرماية طريق الفيوم وبعدها بشويه هتدخل الطريق الغربي لحد ما توصل لمفارق اسيوط هتدخل شمال الي اسيوط والمسافة تقريبا 423 كيلو متر من القاهرة وعلي حسب سرعتك هيكون الزمن اللي تقطعه في الوصول الي اسيوط ورحلة سعيده ان شاء الله

بس صدقني عن تجربة الطريق الغربي ده ممتاز جدا جدا لحد اسيوط وتوصل وترجع بالسلامة والله الموفق

**MaZaGAngeE** · 05-06-2009 04:38 AM

المشاركة الأصلية كتبت بواسطة morieno

أنا من المنيا وبسافر هناك كتير
الغربى هو الأفضل
الرميا فطريق الفيوم
بعد دهشور هتلاقى يوتيرن مكتوب عليها طريق اسيوط الغربى
لف وكانك راجع القاهره
اول يمين وطوالى لحد اسيوط
لو زهقت من الصحاروى وحبيت تغير مناظر أنصحك تدخل زراعى من سمالوط او المنيا نسها لانهم اقصر دخلتين من الصحراوى للزراعى
[marq="4;up;2;alternate"]خلى بالك فى ردار معظم الوقت فى الوصلة اللى بين بنى مزار وسمالوط حوالى 20 كيلو[/marq]
وتروح وترجع بالسلامه

كلام مظبوط ممكن تدخل من محور 26 يوليو على 6 أكتوبر لطريق الفيوم و منه لطريق أسيوط الصحراوي الغربي أو من نهاية فيصل أو الهرم أو من محور المنيب تدخل على ميدان الرماية و ده أول طريق الفيوم و تكمل منه ........
طبعا الطريق ده هوه أفضل طريق للصعيد بس عيبه أنك عشان تدخل على البلد بتاعتك متوسط المسافة بين الطريق و البلد 30 كيلو كلها مطبات و ملفات متعبة جدا و أول دخلة معقولة دخلة سمالوط أنا بدخل منها و أرجع تاني حوالي 15 كيلو عشان أروح مطاي .........
الطريق عليه خدمات لحد سوهاج و من هناك مفيش صريخ ابن يومين لحد ما تدخل قنا و مش عارف بعد كده فيه خدمات و لا لأ .........

**MaZaGAngeE** · 05-06-2009 04:43 AM

عندك يا ريس الطريق الصحراوي الشرقي كويس جدا و ده ممكن تدخله من نهاية الأوتوستراد من ناحية 15 مايو و فيه ناس بتسميه طريق الكريمات و ده أفضل طريق في مصر بس لحد بني سويف و منها ترجع تمشي على الطريق الشرقي القديم بس الجيش بيكمل الطريق و المفروض أنه في نهاية 2009 يكون خلص لحد المنيا و لما يخلص هيكون أفضل طريق الناس تسافر منه ....
وطبعا الحلو مايكملشي عشان تدخل بلدك لازم تعدي النيل طبعا المسافة صغيرة جدا و غالبا أقل من 5 كيلو بس مفيش كباري تعدي النيل منها غير في بني سويف نفسها أو المنيا نفسها غير كده تعدي بالمعدية و دي خطيرة جدا لأن سور المعدية واطي جدا و دايما بتكون فيها عربيات نقل بتاعة الحجر الأبيض بتاع المباني .

**MaZaGAngeE** · 05-06-2009 04:49 AM

اخر طريق بقى يا ريس
الطريق الزراعي و ده من نهاية البحر الأعظم من ناحية المنيب في الجيزة أو من محور المنيب تعدي النيل و تروح على المنيب أو كمان تعدي كوبري المرازيق اللي بعد حلوان على الكورنيش أو تاخد المعدية بتاعة الحوامدية من قدام مصنع سيجوارت في المعصرة ... و ده بقى طريق مزدوج لحد ما تدخل بني سويف بس يا باشا عندك بالعدد الفعلي 113 مطب محترم و 8 مزلقانات قطر و 17 كمين بوليس و.
و من بني سويف الطريق بيكون فرداني و من مغاغة ( أول بلد في المنيا ) فرداني برضه بس مفيش مطبات تقريبا و البلاد بتكون متباعدة شوية و لو ماشي بالليل ممكن تجري عليه بس أوقات الخطر الساعة 5 الصبح لحد 8 الصبح و من 5 المغرب لحد 8 تقريبا عشان دي مواعيد الناس بتروح الغيطان و بترجع البيوت في المواعيد دي ................