كمين مفاجيء اتعمل امبارح فى غمرة على الساعة 9 الصبح كده .
طبعا قبل ما اطلع على غمرة .. اتفاجات ان الميكروباصات ماشية فى شوارع غريبة جدا اول مرة اشوف فيها ميكروباصات ..
استغربت اوى و قلت دول جايين منين دول !
عدى اكتر من 25 ميكروباص تقريبا و كله بيخرم و يطلع على كوبرى احمد سعيد .
لما تلعت على شارع غمرة شفت الكمين و عرفت اللى فيها بقي .
الميكروباصات كانت بتخرم من شارع رمسيس و تدخل من الظاهر و تطلع قبل كوك دور و تنزل الناس . كل ده علشان الكمين كان شادد اوى .
تخيلوا كام سواق ميكروباص ممعهوش رخصة يا جماعة !! ده حرام بجد .
بعدها ركبت تاكسي . و انا راكب سالت السواق قلت له كل دول ممعمش رخصة !
قالى لالا مش كلهم , هو معظمهم معهمش رخصة و لكن الاكتر منهم سوابق و لو وقفوا فى الكمين هيرخموا عليهم خصوصا لو كانوا معروفين من الظباط ..
شيء عجيب جدا يا جماعة , كان زمان نشوف ميكروباص واحد ولا اتنين اللى بيهربوا من الكمين و خلاص .
و لكن هذا الكم الهريب من الميكروباصات بتهرب من الكمين فده شيء مخيف بصراحة .
و بما اننا اتكلمنا عن الميكروباصات بقي . فمعلش انا عايز احكى موقف مدايقنى اوى يا جماعة .
من قيمة اسبوعين كنت راجع من جسر السويس و كان وقت الظهر كده . و بعد ما ركبت بشوية ركب طفل صغير قدام جمب السواق و قاله ممكن يا اسطي تنزلنى عن جامعة عين شمس !
السواق قاله ماشي .. و لما جينا عند وزارة الدفاع كان شارع الجامعة واقف وقفة سوداء .
و العبقرى السواق كان لسه خارج من السجن و ايده على الكلاكس و عمال يشتم فى خلق الله كلهم و فى ظابط شافه قاله يخرب بيتك هو انت خرجت من السجن امته ياض قاله اول امبارح يا باشا .
المهم قرر انه ياخد صلاح سالم من عند ارض المعارض و يدخل على العباسية و كان الطريق مسدود اكتر من شارع الجامعة .
جينا عند كوبرى العباسية بقي و قلت للسواق انزل من تحت الكوبرى علشان الولد الصغير ده ينزل عند الجامعة يا اسطى . راح داخل من تحت الكوبري و الاشارة واقفة 10 ثوانى و فتحت الاشارة ونزل الولد الصغير و راحت الاشارة قافلة تانى .
قعد يبرطم بالكلام و يقول هو الشعب المصرى ده لازم يخترع لنا حاجات جديدة كده و مش عارف ايه .. ما انا كنت هنزله بعد الكوبرى و كان هيرجع شوية و قعد يافاف ( يقول أوف ) و كان هاين عليه يقل ادبه كمان .
رحت مذقع فيه و قلت له ده عيل صغير ليه تمشيه كل ده و هو مش عارف الطريق و كمان هو راكب علشان ينزل قدام بابا الجامعة انت ليه لفيت من صلاح سالم بقي ! اتقى الله يا عم .
راح واحد نازل من الميكروباص بجلابية و معه زوجته تقريبا .
وهو نازل برطم بالكلام برده و بيقول للسواق بقى تخلينا كل ده فى الاشارة علشان عيل صغير يا راجل حرام عليك و كل الناس اللى فى الميكروباص اتخرصت و محدش اتكلم خالص غير صاحبي اللى كان معايا ..
بصراحة شعورى كان نو كومنت احسن من ان اتعب نفسي مع ناس سلبية و لا عندهم دم اساسا !!
المفضلات