سؤال بخصوص مشكله بالريجاتا 1500 سىسى

اخوتى الاعزاء انا عندى مشكله فى سيارتى الريجاتا هى موديل 1985 - 1500 سى سى اشتريتها من شهرين وكانت حالتها سيئة .... واحده واحده فضلت اصلح فيها يعنى مثلا عملت لها طقم شمبر + وغيرت 2 مساعدين وعلبة دريكسيون + صيانه كاملة للميكانيكا + شوية رفايع بس صرفت برده زى طقم مرايات وفرش وعوامة التانك وتيل فرامل اماى وخلفى والصيانة الاساسية لاى عربية تجيبها مستعملة .... المهم من اسبوعين لاقيت العربية بتخنق معايا وبتكن وانا على الدائرى كانها قطعت بنزين ومهما ادوس بنزين العربية ما بتسحبش بالعكس بتهدى لغاية ما تقف وبعدين ادورها تانى تدور وتمشى كان مافيش حاجه حصلت ... المهم الميكانيكى قالى لى ده كربراتير ...روحت لبتاع الكربراتير خصوصا ان العربية كانت بتاكل معايا بنزين ... عمل طقم اصلاح كامل للكربراتير ( اكس + باب + جوانات + بكات ) وبعد كده العربية بقت تمام ... بس لسه برده بتاكل بنزين على حسب ما زمايلى ما بيقولولى يعنى مثلا انا كنت مفول على الكيلو 203162 بعد اسبوع روحت افول تانى حطيت 30 لتر بنزين لغاية ما التانك بقى فول وكان العداد عامل 203369 يعنى استهلكت 30 لتر فى 207 كيلو يعنى بمعدل اللتر بيعمل حوالى 7 كيلو
فهل ده طبيعى على عربية 1500 سى سى ولا دى فعلا لسه بتاكل بنزين ؟ ولو لسه بتاكل اعمل كشف على ايه تانى فيها علشان احل الموضوع ده ..فى ناس قالت لى التيكيهات .... وناس قالت لى غير الكربراتير خالص .... ياريت حد يعرفنى المفيد افدكم الله .... وشكرا جزيلا

اقتباس:

---

ياريت حد يعرفنى المفيد افدكم الله

---

المفيد يا أستاذنا ......أن تقييم الأستهلاك ماينفعش على مرات متقطعه خلال أسبوع .................ولكن لالزم من خلال مشوار واحد على الطرق السريعه .....صد رد ......يعنى مشوار رايح جاى مباشر

اولا مبروك على العربيه
اعتقد ان الاستهلاك ده فعلا كبير جدا وده اكيد لان موتورك خفيف حتى مع الشنبر الجديد تانى حاجه اعتقد ان عمل صيانه الكربراتير وخصوصاالباب والكس مش مظبوطه بصراحه الكربراتير بعده معمره مايظبط راجع الميكيانيكى وربنا يوفقك

متشكر جدا على اهتمامكم وردودكم ياجماعه .... بس يا باش مهندس سمير هل فعلا ممكن معدل الاستهلاك يفرق لو روحت بيها طريق سفر صد رد عن اللى انا قولته لحضرتك ؟؟؟؟ على العموم انا هعمل زى ما حضرتك قولت وهبلغك بالنتيجه ويارب تكون خير ان شاء الله .
ويا استاذ ASh ازاى ماتورى خفيف بعد ما عملت طقم الشمبر ؟ انا خليت كذا ميكانيكى تانى بصوا عليه وقالوا لى الماتور ده سليم 100 /100 مافهوش حاجه . والحمد لله فهل ممكن يبقى العيب فى حاجه تانية .

اقتباس:

---

بس يا باش مهندس سمير هل فعلا ممكن معدل الاستهلاك يفرق لو روحت بيها طريق سفر صد رد عن اللى انا قولته لحضرتك ؟؟؟؟

---

طبعا ياباشا ........ماينفعش الواحد يقيم الأستهلاك على أسبوع ( مش بتوقف وتبطل وتسخن وتشغل الشفاط وأشارات وموال كبير ).......يبقى لازم تقيم بالطريقه اللى قولتلك عليها الأول ................قبل أى كلام ...............بس ظبط العربيه الأول ( فرامل _ هواء الأطارات _ وبرضه تكون مطمن للفلاتر هواء وبنزين _ الشكمان يكون سالك برضه _ بلى العجل يكون كويس مش تقيل ).................دى أمور لازم تكون مطمنلها قبل أى شىء لما تحب تقيم الأستهلاك ..............دا غير موضوع البوجيهات وكابلاتها والبوبينا ( يكون كله تمام ).........علشان تقيم صح

ده معدل استهلاك عالي, حتى لو كان جوا البلد, انا كانت معايا العربية دي, و كان معدل استهلاكها عالي بس مش زي كده, يعني, 40 لتر يعملوا 300-330 كيلويعني بتعمل حوالي 150-160 كيلو في الصفيحة, و الاستهلاك طبعاً كان بيتحسن لما بيبقى في طريق سريع, ممكن توصل الى 450-500 كيلو, و لكن اقولك انا عملت فيه كل حاجة وما عرفتش اوصل لحاجة, و لكن في نقطة مهمة انت نسيت تذكرها, انت بتحطلها 80 و لا 90, عشان لو 90 دي تبقى مصيبة لان 90 المفروض يكون الاستهلاك اقل, المهم ان في كذا حاجة لازم تراجع عليها عشان تعالج مشكلة الاستهلاك الزايد في البنزين, و هو وجودة في موضوع هنا في المنتدى, بس مش عارف اوصله حاول تدور عليه, و لكن في موضوع تاني ممكن يفيد بخصوص توفسر استهلاك البنزين شوفو:

http://www.nilemotors.net/Nile/showthread.php?t=40209

انا متشكر جدا يا جماعة على الردود والمعلومات المفيده دى .... بس انا بفول ببنزين 80 ..... هل ده برده هيفرق ؟

طبعا بيفرق ياباشا .....لأن الجوده الحراريه للبنزين 80 غير ال90 وال92 ............وبعدين طالما بتمون 80 .....فلا داعى لأجهاد النفس عن الأستهلاك وخلافه ......طالما العربيه شغاله كويس

مع بنزين 80 الريجاتا كانت معايا بتاكل بنزين شوية بس مش للدرجة بتاعتك الصراحة

متشكر قوى لتعاونكم معايا يا جماعة بس لو سمحت يا استاذ ابو مريم ممكن تقولى كانت معدل استهلاكها كام معاك ؟

وكنت عايز اعرف حاجه تانية كمان بعد اذنكم هو حجم التانك بتاعها قد ايه ؟؟

اقتباس:

---

المشاركة الأصلية كتبت بواسطة ahmadhussein

متشكر قوى لتعاونكم معايا يا جماعة بس لو سمحت يا استاذ ابو مريم ممكن تقولى كانت معدل استهلاكها كام معاك ؟

---

الصفيحة كانت بتعمل حوالي 170-180 ك يعني اللتر بيمشي العربية 9 ك تقريبا

اقتباس:

---

المشاركة الأصلية كتبت بواسطة ahmadhussein

وكنت عايز اعرف حاجه تانية كمان بعد اذنكم هو حجم التانك بتاعها قد ايه ؟؟

---

التانك بتاعها 45 او 50 لتر

اقتباس:

---

المشاركة الأصلية كتبت بواسطة أبومريم

الصفيحة كانت بتعمل حوالي 170-180 ك يعني اللتر بيمشي العربية 9 ك تقريبا



التانك بتاعها 45 او 50 لتر

---

التانك بتاعها 55 لتر, و عن تجربة

مظبوط هي 55 لتر

انا معايا ريجاتا 88
وعاوز اقول ان الاستهلاك ده عالى العيب فى الكربيراتير اما يكون الباب فيه بوش او يكون البيك مقاسه كبير انا كان عندى نفس العيب
لازم تروح لميكانيكى كويس ولو عاوز نمره الميكانيكى الى بتعامل معاه انا تحت امرك

اوك يا استاذ أيمن ياريت بعد اذنك تدينى رقمه لانى فعلا غلبت وروحت كشفت على العربية كلها امبارح بوجيهات وبلى واسبراتير والكربراتير روحت للراجل تانى ولبتاع الشكمانات علشان اعرف منفس ولا لاء وكان كله تمام . مش عارف اعمل ايه تانى .

بس فيه حاجه الاخوه الكرام بيقولوا ان التانك 55 لتر ازاى وانا مرة العربية لمبة البنزين نورت معايا وروحت افول حطيت 41 لتر بس ؟

اقتباس:

---

المشاركة الأصلية كتبت بواسطة ahmadhussein

اوك يا استاذ أيمن ياريت بعد اذنك تدينى رقمه لانى فعلا غلبت وروحت كشفت على العربية كلها امبارح بوجيهات وبلى واسبراتير والكربراتير روحت للراجل تانى ولبتاع الشكمانات علشان اعرف منفس ولا لاء وكان كله تمام . مش عارف اعمل ايه تانى .

بس فيه حاجه الاخوه الكرام بيقولوا ان التانك 55 لتر ازاى وانا مرة العربية لمبة البنزين نورت معايا وروحت افول حطيت 41 لتر بس ؟

---

التانك فعلا 55 لتر واللمبة لما تنور بيكون لسة في من 10 -15 لتر في التانك
نصيحتي ليك بتوع الكربراتير كلهم اشتغالات ومحدش هيفيدك في موضوع استهلاك البنزين اللهم الا تغيير البيكات ببكات اصغر وبما انك بتحط 80 اللي كله شوائب هتلاقي البيكات هتتسد بسرعة جدا فبلاش احسن

أخى العزيز
واضح أنك دخت كتير فى موضوع أستهلاك البنزين,أنصحك أنك تروح لمركز متخصص فى الكربراتير بس زى مركز الصفا أدام سوق القنال(وان كان هما مش بيشتغلو فالكربراتيرات اللى أتلعب فيها وأتعملها أكس وباب - بس جرب)
أستوقفنى أن فى خطأ شائع أن البنزين ال90 أكتر قيمة حرارية عن ال80!!!!!!!!!!!!!!!!!!!!
درجة الاوكتان 80/90/92/95 معناها مقاومة ظاهرة الصفع (العربية بتسقف)detonationلوقود معملى يماثل البنزين((((((فى المعمل)))))
وبيستفاد بيها صناع المحركات فى وجود وقود يصلح لتصميمات المحركات ذات الانضغاط الأعلى بدون ما تسقف
(وفوق كل ذى علم عليم)
م/سامح

انا كانت معايا الريجاتا لفترة طويلة لكن علشان اقدر اقول لك ان الاستهلاك ده عالى لازم تحدد انت مشاويرك فيها مسافات طوالى شكلها ايه وفترات توقف شكلها ايه، يعنى لو كل مشاويرك فى وسط البلد وبتعمل معاك 7 كيلومتر فى اللتر يبقى كدة اخر جمال، لكن لو مثلا مشاويرك مثلا من التجمع الخامس الى مدينة نصر وفيها مسافات كبيرة طوالى يبقى كدة انت راكب بلاعة بنزين

الحكم ياتى انك تاخدها مشوار طوالى كدة اسماعيلية رايح جاى على سرعة 90، مفروض تعمل معاك 250 كيلومتر فى الصفيحة على الأقل ، لو موصلتش معاك للكلام دة يبقى كاربراتيرك بايظ، وعموما انا من تجربتى مع مسالة الأكس والباب والكلام ده كله اكشتفت انها كلها مسأئل تصلح لتحويل ميت الى مريض، لكنها لا تعالج مريضا، لو وصلت فى النهاية الى ان كاربراتيرك حالته تعبانة فالاكس والباب لن يصلحوه، انت تعمل حسبة بسيطة، كاربراتير استيراد ب500 جنيه و100 جنيه فك وتركيب ومصنعيات، لو هيعمل معاك 9 كيلو فى اللتر، يبقى كدة 2 كيلومتر زيادة ، يعنى حوالى 20 قرش وفر فى كل لتر، يعنى ال 600 جنبه هيرجعولك بعد 3000 آلاف كيلومتر، ده على حسبة بنزين 80، فلو الحسبة دى مجازية معاك اشترى كاربراتير استيراد، لو مش مجازية انساها، ولما تشترى الكاربراتير تشتريه على تجربة

انا فعلا يا استاذ سبعاوى بروح شغلى بيها من المعادى دائرى الى الجيزة وشارع البحر الاعظم وقليلا لما بنزل بيها مشوار اخر بليل فى المعادى وقليل جدا وسط البلد .

لو حبيت اجيب كربيراتير استيراد ممكن الاقيه فين ؟؟ وهل لازم اخد معايا ميكانيكى علشان يشوفه ولا ايه ولا كله بيبقى كويس وتمام ؟؟ ولا اخلى الميكانيكى هو اللى يجيبوا ليا ؟

ياريت حد يفيدنى

الكرابراتير الاستيراد من الوكالة او من عزبة شلبي و لازم يجربهولك والافضل تاخد معاك بتاع الكربراتير عشان هيعرف ملعوب فيه ولا لأ