المشاركة الأصلية كتبت بواسطة SE_coralsea
لسه من كام يوم ماشي بالليل و طالع من شارع ضيق و بأخد الملف و أذا بي ألاقي عربية شرطة واقفة و منزلين الاقماع البلاستيك قدامها و قافلين بيها نص الملف , ليه كد بدون سبب مجرد حماية لبوز عربية الشرطة المتبهدل أساسا من سواقة العساكر , المهم غصب عني جنب العربية لطش في القمع و أنا بألف و وقعه علي الارض قامت الدنيا و ماقعدتش تاني
طبعا البيه الظابط (نقيب ب 3 نجوم) قام فز و اتنفض من العربية و 2 عساكر بالرشاشات (كان فاضل يجيبوا دبابات و طيارات) حاصروا العربية , فوقفت قام البيه قالي : رخصك
أنا: أتفضل
الظابط: أنت مش شايف القمع
أنا: لأ لأنكم حاطينه في ملف و أنا مش بأنجم علشان أعرف انكم واقفين في الملف
الظابط: تقوم توقعه ؟؟
أنا: ماقصدتش و عموما انا اسف لأني فعلا ماشوفتوش و أنا بألف
الظابط: يعني أيه ماشوفتوش ؟؟ تحب أسحب الرخص و اعمل لك محضر ؟؟
انا: كل ده علشان وقعت قمع ؟؟ جت سليمة و ماحصلوش حاجة ما أتكسرش يعني
الظابط: يعني أنت غلطان و مش عاجبك كلامي
أنا: من ناحية غلطان لأ مش غلطان لكن كلامك علي رأسي من فوق
الظابط: مش غلطان أزاي ؟؟ ده أنت كسرت الكمين
انا: هو فين الكمين ده ؟؟ أنتوا عربية شرطة واقفة في ملف يعني واقفين غلط و تقولي كمين بأقل لسيادتك أيه الرخص بعد أذنك يا تديني وصل
الظابط: و لا رخص و لا وصل و هاتيجي معايا للقسم
أنا: أوي أوي بس قبل مانروح القسم أسمح لي أعمل تليفون صغير أعتذر للناس اللي كنت رايح لهم في ادارة أمن الدولة و أبقي فاضي و أجي مع حضرتك
الظابط: (بص لي أوي و سكت شوية) أتفضل رخصك أيه بس تخلي بالك بعد كده
أنا: متشكر أوي علي ذوق حضرتك و أسف مرة تانية