هو صف تاني و خلاص؟

**OlaOsman** · 30-05-2009 12:06 AM

هي الناس بتركن صف تاني و السلام؟ أي حاجة يعني؟

الشارع اللي فيه شغلي من أرخم شوارع المهندسين، اتجاهين و ضيق و مستفز. انا طبعا راكنة عربيتي صف أول و الشارع مستحيل حد يقدر يركن فيه صف تاني و المساحة اللي فاضلة تعدي عربية. جه واحد بفيرنا سودا ركن صف تاني في الناحية التانية اللي قصاد عربيتي بالظبط و عشقها و طلع مش عارفة فين. طبعا الشارع كده اتخلقت فيه أزمة و بقيت خايفة على عربيتي لاحد ياخدها عافية و يحاول يعدي يقوم يلطش عربيتي

شوية صغيرين و جت دودج صاحبها عايز يعدي من الشارع و معرفش يرجع عشان الشارع وراه قفل، حاولوا يزقوا العربية، مافيش.. قام الراجل آخر ما اتنرفز راح راجع بعربية سنة لورا و طراااااااخ في بوز العربية زاققها.. اتزقت سنة، حاول يعدي برضه ما نفعش قام خابطها خبطة كمان في الإكصدام بس طبعا الكبوت اتتني سنة و الباب ماكانش عايز يفتح لما صاحب الفيرنا نزل بعد شوية.

بعد الخبطة التانية العربية اتزقت مسافة كويسة وسعت شوية للي عايز يعدي و عدى صاحب الدودج و الحمد لله ما حكش في عربيتي بس حك في الفيرنا و عدى بعده طابور طويل من العربيات من مسافة صغيرة اوي و انا فضلت واقفة لحد ما اتأكدت ان عربيتي بخير الحمد لله.

طبعا صاحب الفيرنا نزل بعد شوية و لقى عربيته كده، الناس حكت له اللي حصل و ازاي هو عمل أزمة في الشارع و كلهم لاموه فمقدرش يتكلم و وقف شوية يشوف اللي حصل لها و هايعمل فيها ايه.

انا طبعا عارفة إن أزمة الركنات في القاهرة بتخلي الناس تعمل أي حاجة، بس برضه لازم الواحد يخاف على عربيته و عربيات الناس و ما يوقفش الشوارع.. و لا ايه؟

**Ashraf_Ashraf** · 30-05-2009 12:11 AM

اكيد طبعا بس للاسف الكل بيقول انا وبس مش مهم يركن غلط ويقفل الشارع مش مهم يعمل اى مشكله بسبب سوء السلوك
احيانا الواحد من غيظه من النوعيه دى بيبقى نفسه يكسر العربيه وصاحبها لكن اكيد مايننفعش ولا لى الحق فى ده
مافيش غير اننا نتمنى ان الاحساس والذوق يعودوا للناس من تانى

**إبراهيم.صادق** · 30-05-2009 12:12 AM

هي الناس مش بتركن صف تاني وخلاص، هما بيركنوا صف تاني عشان مافيس صف أول :)
أنا شخصيا غالباً بركن صف تاني أو تالت بس في منطقة هي نظامها كده -عند نادي الصيد في المهندسين- يعني مش باقفل على حد ولا باعطل الطريق
بس الغباوة بقى اللي بيركن صف تاني ويعشق العربية ده بصراحة مالوش غير حل واحد اكسر إزاز العربية ومورها وسيبهاله يفرح بيها :)

**M.Mostafa80** · 30-05-2009 12:12 AM

هى بقت حاجه تنقط والله على الأقل يسب الهاند بريك ويسيب العربيه فى وضع المور

**hamedo0** · 30-05-2009 12:13 AM

اولا حمدالله علي السلامه انا بقالي كتير مش شوفت ليكي مواضيع يا استاذه علا
ثانيا طبعا صاحب العربيه الفرنا غلطان شايف ان الشارع ضيق وعشان مش يدور علي ركنه كويسه ساب عربيته يبقي يستاهل الحصل ليه

**Sharky** · 30-05-2009 12:28 AM

انا مش حقول غير حاجة واحدة
الراجل بتاع الدودج دا عمل الصح
امثال الراجل بتاع الفيرنا لازم عربياتهم تتخبط علشان يحرم يركنوا صف تانى و يوقفوا الشارع علشان أنانايتهم

**dr_darsh** · 30-05-2009 02:19 AM

انا الموقف ده شفته بعينى بس فى الشارع اللى بين مجلس الشعب ووزاره الصحه واحد بعربيه نوبيرا وقف صف تانى والشارع زحمه جدا وساب العربيه ونزل بس المصيبه ان بعد شويه كان فى اتوبيس كان فيه فوج سياحى مش عرف يعدى وقف وقفل الطريق والناس حاوت تزق النوبيرا ولا فى فايده والطريق اتقفل خالص لحد ماصاحب العربيه جه بمنتهى البرود وركب العربيه ومشى ولا كأن فيه حاجه اللى ضايقنى ان فى أفراد من الفوج السياحى كانوا بيصوروا الموقف ده وطبعا مش هاعلق على ردود فعلهم وانطباعهم اللى خدوه عن سلوك الشارع المصرى ...أكيد معروف

**Bossy_Fadl** · 30-05-2009 05:14 AM

اللهم لا شماته

صاحب الفيرنا غلط

و ده تصرف احمق

يستاهل اللي صارله من صاحب الدودج

و لا هو كل واحد بقي يقول يلا نفسي و خلاص

و مش مهم الطريق يمشي و في داهيه الناس؟

ميرسي لالك علا علي الطرح المميز