تحذير هاااام - اوعى تركن في عباس العقاد

**a.fouad** · 02-10-2007 04:14 AM

السلام عليكم،

عايز احكيلكم موقف حصل معايا من اسبوع كده .... كنت واخد عربية خالي وهي موديل كورولا تقريبا 94. المهم رحت بيها الشغل وكنت راكن في عباس العقاد قبل شيخ البلد ... والعربية كانت معايا بقالها يوم وكانت زي الفل ... المهم نزلت من الشغل ودورت العربية دارت عادي جدا .... مشيت بيها عشان اوصل لاول يو تيرن وارجع تاني ...العربية مكملتش 200 متر تقريبا ولقيتها طفت لوحديها .... يمين شمال مش عايزة تدور ... وانا بما اني معنديش عربية اساسا فخبرتي في ميكانيكا السيارات نفس خبرتي في اللغة الصينية... المهم ... الكلام ده كان ساعة اذان العصر والدنيا صيام والعربية بالمناسبة كانت نمرها مش القاهرة ولا الجيزة ......المهم في دقيقتين لقيت الارض اتشقت عن ميكانيكي ... قلت يا ما انت كريم يا رب .... الحمد لله رينا راضي عني وبعتلي ميكانيي بالسرعة دي المهم فتحنا الكبوت ... بص فيها وفك خراطيم بتاعة البنزين وشفط شوية من الخرطوم وحطهم في الكاربيراتير وقالي دور يا بيه دورت دارت .... قلت الحمد لله يا ما انت كريم يااارب... يدوب قبل ما اقفل الكبوت واركب عشان اطلع كانت طفت تاني.... طبعا اخينا الميكانيكي مكنش مشي ... فتحنا الكبوت تاني وقالي الرداخ ده عايز يتغير .... بعت جابلي واحد جديد وقالي ده تمنه في التوكيل حوالي 570 جنيه .... قلتله ركبه خلينا نجرب ... بعد كده نزل تحت العربية معرفش عمل ايه وطلع .... دورنا العربية دارت طبعا زي الفل .... لفينا بيها معملتش اي مشاكل قلتله فك الرداخ الجديد وركب القديم .... هنا بقى لقيته هيموت وميفكش الرداخ ويقولي طيب ادفع اللي معاك طيب عايز تاخده بكام ... المهم بعد محاولات ركبت القديم ودورت العربية دارت زي الفل وسافرت بيها من غير اي مشاكل خالص....... عرفت ان البيه ده نصاب ... وتقريبا فك خرطوم البنزين اللي جاي من تنك البنزين وموصل للكاربيراتير .... المفاجاة بقى ان مديري في الشغل معاه بردو كورولا 99 تقريبا وكان راكن في عباس العقاد وحصل معاه نفس الفيلم دور العربية دارت وبعد 100 متر طفت منه وبرد النصاب ده جاله بس هو مشاه وبعت جاب الميكانيكي بتاعه .... وفعلا طلع حديدة كده كان النصاب حاططها مكان الخرطوم اللي فكه بتاع البنزين.
حبيت بس احذركم واقولكم خدوا بالكم متركنوش في عباس العقاد الرئيسي ... لو هتركن في شارع يستحسن يكون في سايس في المكان اللي هتركن فيه.

مهندس/أحمد فؤاد

**Chicco** · 02-10-2007 04:45 AM

نفس الحكاية حصلت معايامن 5 سنين أو أكتر بعربية فيليشيا مو95 وكنت راكن جنب جامع السيدة عائشة بس أنا بقي إتنصب عليا :lol: :lol:

**nonoymm** · 02-10-2007 05:46 AM

بيعملوا كدا مع اللادا ؟ :twisted:

**PAYOO** · 02-10-2007 07:56 AM

الواحد المفروض يشتري عربيه مصفحه من تحت عشان العالم إللي زي دول

**ecybrarian** · 02-10-2007 08:05 AM

لا حول ولا قوة إلا بالله. الموضوع ده بيحصل مع العربيات إللي فيها كاربيراتير بس ولا مع كله. وياترى شوفت تنقيط أو بقع تحت العربية ولا لا؟؟؟؟

**memo_hefnawy** · 02-10-2007 09:12 AM

نفس الحكتية المشهورة :) بجد إحمد ربنا إنك مش شربت المقلب تمام كده و الحمد لله كان هايلبسك فى أقل واجب 200 300 جنيه و يركبلك قطعة غيار مغسولة ماتسواش 3 نكلة

**عاشق الفولفو** · 02-10-2007 09:25 AM

الموضوع دة حصل بالظبط سنة 98 كان والدي لسة جايب كرولا العيون وكان في ارض المعارض بس للاسف ماقدرش يعمل حاجة علشان كان خارج من المعرض بعد الساعة 3 فجراً ومعاه والدتي النصاب اول ما عمل الحركة دي قالو الرداخ دة ب 1000(شايف باة عربية لسة علي الزيرو :shock: )حسبي الله ونعمة الوكيل فيهم