أستفسار عن حاجة غريبة فى الموتور

**rabeasaber** · 30-05-2009 02:48 PM

الأخوة الأفاضل هل خروج نقط مياه من الشكمان بصورة ملحوظة حتى بعد تسخين العربية دليل على كفاءة الموتور ولا على مشكلة داخلية فيه مع العلم ان العربية 128 موديل 91 ولسه عامله جوان وش سلندر بعد مضرب من سخونة طارئة شديدة نتيجة تسرب كل مياه الريداتير

**samirayad** · 30-05-2009 03:34 PM

أهم شىء تكون مية التبريد مابتنقصش فى الردياتير .......طبعا بعد الـتاكد من الكشف الخارجى نحو وجود تسريب خارجى ( يعمى أطمن من خارج المكنه .......لو تمام .......ولكن الميه بتنقص فى الردياتير .....يبقى الجوان مش مظبوط أو الرأس مقفعه من المره اللى فاتت ).......غير كده يبقى مفيش أى مشكله

**rabeasaber** · 30-05-2009 05:38 PM

تحياتى ياباشمهندس سمير أولا . ثانيا انا بلاحظ فعلا ان المية يتنقص فى القربة شوية .فهل لو المشكلة فى الجوان أو الراس مقفع لو مشيت بيها كده فيه ضرر؟

**samirayad** · 30-05-2009 08:13 PM

تحياتى ياباشمهندس سمير أولا

الله يخليك

ثانيا انا بلاحظ فعلا ان المية يتنقص فى القربة شوية

ماهو علشان كده أنا سألتك عن النقطه دى بالذات .....مع أطمئنانك أن سبب نقصانها ميكونش بسبب تسريب خارجى (قفيز مهوى - خرطوم مشروخ والشرخ بيفتح مع الحراره ....غطاء قربه مش سليم وهكذا )............

.فهل لو المشكلة فى الجوان أو الراس مقفع لو مشيت بيها كده فيه ضرر؟

حيعملك قلق على طول ......ومع الشغل حجم التلف حيزيد كمان .....ويجب العلاج فورا .....بعد ماتطمن على كل جوانب أحتمال التسريب الخارجيه .....ولو أننى تقريبا مقتنع أن العيب من الجوان لم يتم ربطه بالطريقه الهندسيه الصح ( ترتيب رباط رأس السلندر المعروف ).....أو أن البيه الميكانيكى ما أطمنش لأستواء السطح السفلى لرأس السلندر لما روحتله تغير الجوان .....لأنه المفروض كان يحط الوش على المقشطه (الفريزه ) علشان يطمن على أستواءه ................

**rabeasaber** · 30-05-2009 09:01 PM

طيب ياباش مهندس لو السبب فعلا فى تركيب الجوان هيبقى الحل ايه؟ جوان جديد ولا التقريط على الجوان الموجود حسب ما فهمت من كلامك؟
وعلى فكرة أنا أحييك على التنظيم والتنسيق فى الرد !فعلا مهندس !!! ربنا يبارك فيك وفى أمثالك

**samirayad** · 30-05-2009 09:16 PM

طيب ياباش مهندس لو السبب فعلا فى تركيب الجوان هيبقى الحل ايه؟

ياريت بعد أذنك عدم أستعمال اللون الحمر لأنه خاص بالأخوه المشرفون......

جوان جديد ولا التقريط على الجوان الموجود حسب ما فهمت من كلامك؟

روح للميكانيكى تانى ....وقوله يعيد على رباط الرأس صح .....زى الناس مابتعمل ......وجرب كده الأول بعد مايعيد الرباط ......لو النتيجه تمام يبقى الحمد لله ......لو لا قدر الله ...أستمر الوضع ...حتضطر تحل الرأس تانى وتظبط الرأس على المقشطه ...وحتغير جوان الرأس .....ولكن لا نسبق الأحداث فقد يشاء المولى ....والرباط يجيب نتيجه كويسه ( وخليه برضه يطمن على جوايط الرأس .....ممكن يكون واحد أو اثنين مش كويسين ...أو الصواميل فيها حاجه وهوت بعد الرباط )

ربنا يبارك فيك وفى أمثالك

أشكرك يا أخى .....ودعواتى لك بالتوفيق أن شاء الله

**yahyaelsirafy** · 30-05-2009 09:16 PM

على فكرة .... ممكن عربية يكون موتورها خفيف و الشكمان يطلع ميه عادي جدا ....
لأن اي احتراق لمركب كربوني اللي هو البنزين بينتج عنه ثاني اكسيد الكربون و ماء في صورة بخار...
يعني الشكمان غصب عن عين التخين هيخرج منه ماء ..... مهما كانت صورة الماء ده....

**samirayad** · 30-05-2009 09:23 PM

طيب هو فيه عربيات بتشتغل بالبنزين اليومين دول وعربيات بتشتغل بالفحم مثلا ................ماكل العربيات شغاله بالمركبات الكربونيه (البنزين ).......بس مش كل العربيات بتخرج ميه من الشكمان

**sab3aawy** · 30-05-2009 11:23 PM

خروج ماء من عدمه يرتبط بدرجة الحرارة النهائية التى يخرج عندها العادم من الشكمان ودرجة حرارة الجو ودرجة الرطوبة النسبية للجو

درجة الحرارة النهائية لخروج العادم من الشكمان كلما انخفضت كلما اتاح ذلك لبخار الماء الذى ينتج من الاحتراق التكاثف سواء فى شكل ضباب او فى شكل قطرات اما اذا كانت درجة حرارة العادم مرتفعة فان البخار يخرج فى صورته الغازية وهى صورة غير مرئية بالنسبة لنا(خطأ ان بخار الماء شكله ضبابى ابيض، الشئ الضبابى الأبيض هو ماء متكثف معلق فى الهواء لاسباب ايروديناميكية ، لكن بخار الهواء لا لون له وغير مرئى بالنسبة لنا كالهواء تماما) ، اما ما يسبب انخفاض درجة حرارة العادم الى درجة تكثف المياه فهى كفاءة استغلال المخلوط المحترق بفعل المكابس(وليس كفاءة الاحتراق كما هو شائع) وكفاءة نظام تبريد السيارة و كذلك انخفاض درجة حرارة الجو وانخفاض درجة حرارة المحرك (الأمر الذى يحدث خلال التسخين صباحا)

اما العاملين الآخرين ، انخفاض درجة حرارة الجو وارتفاع الرطوبة النسبية ، امران كلاهما يؤدى الى تكاثف بخار الماء الموجود فى الشكمان وهى الظاهرة الملحوظة تتمام ومن كل السيارات فى الشتاء

طبعا انا لم اتحدث هنا عن الظاهرة الاخرى التى تسبب وجود بخار ماء متكاثف فى الشكمان وهى التسريب من دورة التبريد الى دورة الحريق بفعل تآكل جوان وش السلندر، وهى ظاهرة اخرى تؤدى الى تحميل العادم بكميات كبيرة جدا من الماء الذى قد يكون تبخر او لم يجد الفرصة للتبخر لكنه فى الحالتين يكون اكثر من قدرة الهواء فى العادم على تحمل البخار مما يؤدى الى تكاثفه فى صورة قطرات وظهوره فى العادم على شكل قطرات مائية ايا كانت درجة حرارة الجو

لكن فى النهاية فأنه بالفعل اى احتراق هيدروكاربونى لابد ان ينتج عنه اكاسيد كربون وبخار ماء ، ويمكن التأكد من ذلك بتجربة بسيطة جدا، اى شكمان سيارة لو جبنا بالونة او كيس وعبيناها منه وقفلناها وتركناها تبرد او عرضناها لتيار بارد فسنجد تجمع مائى صغير يظهر داخلها ، حتى لو كان عادم السيارة لا يظهر فيه اى بخار ماء لحظة خروجة، لأن بخار الماء كما اوضحت غير مرئى فى حالته الغازية ، ويرى فقط عند تكثفه