من كام يوم روحت مرور أبيس لفحص و ترخيص العربية لمدة 3 سنين ... الموضوع أخد يومين كاملين و اجمالى اللى دفعته بالمخالفات و الضرايب و التأمين و خلافه حوالى 1000 جنيه و الحمد لله ... لكن الحقيقة اللى أثار انتباهى جداً و خلانى أكتب الموضوع دة انى لقيت يافطة عليها قيمة الضرايب للسعات المختلفة و كانت كالتالى:
http://bigprof.com/imgstore/darayeb.jpg
و دة كلام جميل و معقول و مقدرش أقول حاجة عنه! لكن الكارثة كانت اللوحة اللى جنبها اللى عليها ضرايب العربيات اللى فوق 2030 سى سى و لاحظ ان دى ضرايب سنة واحدة فقط:
http://bigprof.com/imgstore/mokoos.jpg
أنا و الحمد لله معنديش وللا عربية من دول لكن ممكن حد يفهمنى الدولة بتعمل ايه زيادة للى معاه S500 أو شيروكى أو حتى كومودو عشان تحصل منهم المكوس الوهمية دى؟؟؟ هل مثلاً ليهم حارات مخصصة ليهم لوحدهم فى الشوارع أو أماكن انتظار خاصة بيهم؟؟؟ مش كفاية الجمارك الفظيعة اللى حوالى ضعفين تمن العربية؟؟ و لا حول و لا قوة الا بالله...
ملحوظة: بعد ما أخدت الرخصة سألت على المثلث و الشنطة لقيت الموظفة بتبصلى ببلاهة كدة و تقوللى لا دى كانت دفعة و خلصت خلاص!!!! ممكن تبقى تيجى تسأل عليهم كل أسبوعين تلاتة كدة ....
طلعت من بوابة المرور و بصتلها (للبوابة يعنى) و قلتلها أشوفك ان شاء الله بعد 3 سنين لو كان فى العمر بقية!
