الموضوع: أفيدونى يرحمكم الله

المشاركة الأصلية كتبت بواسطة zalabany2007

ما تاخدش عربيه راشه دواخل هاتغلب في بيعها

مش شرط كل اللي راشش دواخل يبقى العربية فيها حاجة .. والأساس في هذه الفكرة ان العربية بتبقى عاملة حادثة أو مغيرة أجزاء فيها .. وفيه سمكرية محترفة مبتبينش إذا كانت العربية عاملة حادثة ولا لآه .

وفيه ناس بترش عربياتها جوة من باب النظافة مش أكتر ولا أقل .

إنما العبرة في النهاية عند فحص العربية .. انك تركز على أماكن اللحامات والأقفال بتاعة الشنطة والكبوت والقوايم إذا كانت فبريكة ولا معمول فيها شغل .. ودي العين الخبيرة هي اللي بتكتشفها حتى لو راشه .. لأنها لو عاملة حادثة ومهما كان مدى احترافية السمكري والبوهيجي حيبقى فيها حاجات باين أن معمول فيها شغل .

وبعدين على أقل تقدير 90% من العربيات 128 فيكي يا مصر إلا وغيرت ركب (عيب جوهري في كل 128) .. وخاصة الموديلات القديمة بتاعة السبعينات والتمانينات .. ودي لما بتتلحم بيبقى شكل الحوض وحش .. ففيه ناس بترش الحوض علشان تداري لحامات الركب دي .

انا مش بقول كده علشان ادافع عن العربيات القديمة اللي راشه دواخل .. لأن الكلمة دي بتلاقيها لبانة في بق التجار علشان يخسفوا من تمن العربية ويطلع فيها عيوب بأي شكل .. وبعد كده يبيعوها بالسعر اللي هما عاوزينه .. ويسوقوا المبررات اللي قلتها في الأول .