حالة المرور دلوقتي - موضوع متجدد

**OlaOsman** · 01-06-2009 08:06 PM

النهاردة المندوب بتاعنا في الشركة جاي من برة بيقول لنا الطرق النهاردة زي الزفت و شارع شهاب و جامعة الدول و الدقي واقفين فاعملوا حسابكوا و انتوا مروحين ابعدوا عن المناطق دي.

لما بتصادف و باسمع نجوم إف إم لما باخد تاكسي أحيانا في طريقي للشغل الصبح باسمع فقرة اسمها انت فين دلوقتي أو حاجة زي كده، الناس بتتصل و تقول هي فين دلوقتي و حالة المرور في المكان ده عاملة ازاي عشان الناس تتجنب الطرق المتكدسة مروريا و تاخد محاور تانية.

خطر في بالي ان ليه ما نعملش حاجة مشابهة لدي هنا؟ ممكن اللي رايح الشغل الصبح و هو في طريقه لقى الدنيا زحمة، و هو بيبص على نايل موتورز زي كل يوم ممكن ييجي هنا في الموضوع ده و يقول للناس ان الطريق الفلاني واقف أو فيه حادثة - لا قدر الله - أو حاجة من هذا القبيل، تقوم الناس اللي ممكن تكون هتاخد نفس الطريق يعملوا حسابهم.

ممكن برضه حد يدخل هنا و يسأل الناس عن الطريق الفلاني، حد خده النهاردة؟ طيب ايه نظامه؟ ده احسن و لا آخد طريق كذا؟ و هكذا. نتبادل المعلومات و المنفعة تعم ع الكل و نبقى كمن كان في حاجة أخيه. إيه رأيكوا؟

**Samah AbdAllah** · 01-06-2009 08:36 PM

هى فكرة كويسة بس المشكلة مش هنلاقى شارع كويس نتكلم عنه

**aif** · 01-06-2009 10:58 PM

المشاركة الأصلية كتبت بواسطة olaosman

النهاردة المندوب بتاعنا في الشركة جاي من برة بيقول لنا الطرق النهاردة زي الزفت و شارع شهاب و جامعة الدول و الدقي واقفين فاعملوا حسابكوا و انتوا مروحين ابعدوا عن المناطق دي.

فكرة جامدة يا علا
لكن الشوارع اللي انتي بتقولي عليها دي ..... عمري ماشوفتها ولا سمعت انها رايقه ابدا

**Bossy_Fadl** · 02-06-2009 01:21 AM

بس لو انا شوفت الطريق واقف بسبب حادثه او غيرها و جيت بعد ساعتين قولت الكلام ده هنا بنايل موتورز ما هو اكيد او ممكن يكون حالة الطريق بقت عاديه و الظروف اللي فيه انتهت.

لو الكلام فوري او مباشر متل ما زميلك عمل يا علا او متل برنامج انت فين دلوقتي ممكن فعلا يكون فيه فايده.

بس ان الكلام يتنقل علي مدار كذا ساعه ما بعتقد راح يكون مفيد

كمان في شي

تقريبا كلنا او علي الاقل تلات ارباعنا بننزل بنفس الوقت للشغل و بنرجع بنفس الوقت

يعني مش راح نقدر نفيد بعض الا بأثر رجعي و ساعه ما يجي حد فينا يقول اللي قابله اليوم بالطريق الباقي هيكونو already رجعو من الشغل

ممكن الفايده تعود بس علي اللي نازلين بالليل و اخبار الطريق اتنقلتلهم من اللي فعلا لسه راجعين من الشغل

و ممكن كمان الفايده تكون عن طريق حالة الطرق بشكل عام

يعني معروف مثلا عن شارع متل جامعه الدول انه تقريبا علطول واقف

لو حد جاي من محاقظة تانية و عارف انه راح يمر منه

ممكن يرجع للموضوع هنا و بيعرف منه شو حالة الشارع هاد او غيره عن طريق مراجعه المشاركات او عن طريق سؤال بقيه الاعضاء اللي بيمروا من الشارع

عموما الفكرة حلوة و ممكن تتطبق بشكل او بأخر

**OlaOsman** · 02-06-2009 10:30 AM

جزاكم الله خيرا جميعا على التجاوب

**إبراهيم.صادق** · 02-06-2009 11:26 AM

طيب انا عاوز اقولكم معلومة ان انا لسة جاي من شارع النيل "في الاتجاه من كوبري الساحل إلى الجيزة" وفي لجنة عند ميدان الكيت كات ودفعت غرامة عشان مش اللي راكب جنبي مش لابس حزام الأمان!!
كل واحد يخلي باله من اللي قاعد جنبه عند لجنة الكيت كات:)

**OlaOsman** · 02-06-2009 01:09 PM

المشاركة الأصلية كتبت بواسطة EMSadeck

طيب انا عاوز اقولكم معلومة ان انا لسة جاي من شارع النيل "في الاتجاه من كوبري الساحل إلى الجيزة" وفي لجنة عند ميدان الكيت كات ودفعت غرامة عشان مش اللي راكب جنبي مش لابس حزام الأمان!!
كل واحد يخلي باله من اللي قاعد جنبه عند لجنة الكيت كات:)

هو ده الكلام :k32:

جزاك الله خيرا