أيهما أخطر السيارات النقل أم العادية

تفتكروا يا جماعة لو بصينا على عدد الحوادث على الطرق كلها وبالتحديد عدد الوفيات الناتجة من الحوادث دى ، تفتكروا نصيب العربيات النقل منها أد إيه ؟؟

إتفرجوا على الأرقام دى:

أولآً: نسبة حدوث وفيات ناتجة من حوادث سيارات نقل إلى حدوث وفيات ناتجة عن جميع أنواع السيارات (يعنى لو 100 حادثة أدوا إلى وفيات بغض النظر عن عدد المتوفين ، كام حادثة منهم كانت بسبب عربية نقل):

فى نيوزيلاندا : 3.30%
فرنسا : 2.93%
كندا : 2.23%
استراليا : 2.07%
أمريكا : 1.72%
بريطانيا : 1.49%
السويد : 3.94%

ثانياً: نسبة عدد الوفيات الناتجة من عربيات نقل إلى عدد الوفيات الناتجة من حوادث سيارات بشكل عام (يعنى لو حصل 100 حالة وفاة نتيجة حوادث ، كام متوفى منهم كان بسبب عربية نقل):

نيوزيلاندا : 20.3%
ألمانيا : 19.4%
أمريكا : 13.0%
بريطانيا : 16.3%
استراليا : 14.9%

نقدر نقرأ إيه من الأرقام دى ؟ حاجتين إتنين :
1- إن حوادث السيارات النقل التى تؤدى إلى وفاة قليلة الحدوث جداً .
2- عندما تحدث حوادث تؤدى إلى وفاة نتيجة سيارات نقل فإنها تسفر عن أعداد كبيرة من الوفيات .

يعنى بالبلدى كدة حوادث النقل قليلة بس لما بتحصل بتضيع ناس كتير أوى

فتلاقى فى نيوزيلاندا مثلاً 3.30% من الحوادث بيتسبب فى 20.3% من الوفيات ، يعنى حوادثها قليلة بس الحادثة منهم بيضيع فيها أرواح كتير

تفتكروا الأرقام هنا فى مصر ممكن تكون إزاى ؟ وهل فيه إحصاء أصلاً عندنا بالدقة دى

ملحوظة الموضوع مترجم بمعرفتى من موقع البوليس النيوزيلندى والرابط أهو
http://www.police.govt.nz/district/c...ease/1358.html

أعتقد لو اتعمل احصاء زي ده في مصر يجب ان يشمل :
- الميكروباصات
- السيارات الملاكي اللي ماشية بسرعة بطيئة علي اليمين
- موتوسيكلات الديلفري

صدقني بتوع النقل مهما عملوا من كوارث فأسمهم فاهمين الخوف من سائقي الملاكي اللي بيطلعوا رخصة كده و السلام و يمشوا في الطريق دون فهم أو أدراك لقواعد أو أصول القيادة

اعتقد ان فى مصر سبب البلاوى الرئيسى هو النقل بسبب استهتار السائقين و احساسهم بالامان لانه راكب جبل حديد و مهما حصل مش هيجرى له حاجة و كتير منهم من ضريبة المخدرات و السوابق اللى معندوش حاجة يبكى عليها....... الملاكى مهما حصل بيخاف على حياته و عربيته لكن اللعنة كلها موجودة فى النقل و اللى عايز يتأكد فعلا ياخدله اسبوع على الدائرى الذى يرتع فيه النقل بحرية مطلقة و بلا رادع يشجعه على ذلك غياب الرقابة و الرادار و التواجد الامنى....... لنا الله

أخي الكريم أتفق معك في أن الطريق الدائري بمصر هو كارثة يومية و لعنة الفراعنة التي حلت بالمصريين بعد 7000 سنة لتحصد أرواحهم و أموالهم بشكل يومي منتظم , لكن الفضل كل الفضل في تلك الفوضي و العشوائية يرجع بالمقام الاول الي الغياب الامني و المروري و سوء حالة الطريق الاكثر أستخداما

و لكن هناك أيضا من سائقي الملاكي و هم كثيرون يتصفون بالرعونة و الاستهتار و اللامبالاة في القيادة لدرجة انهم قد يشكلون خطرا جسيما حتي علي سيارات النقل الثقيل ذاتها

المشكلة في الاساس مشكلة رقابة و غياب للقانون و ضياع هيبة و احترام و مصداقية رجال الشرطة و المرور الذين أصبح لا هم لهم سوي جباية المال و خدمة كبار الممولين و المنتفعين بدولة جمهورية الجباية العربية

تأكيدا لكلامك........ انا ساكن فى اكتوبر و بحتاج الدائرى يوميا عشان يوصلنى لطريق الواحات....... و اتفرج على مسلسل الرعب اليومى على الاقل موقفين او تلاتة من اللى بيخلوا شعر راسك يطقطق........ اما غمزة او لمزة او حتى همسة من ديناصورات الاسفلت باشوات حصانة القيادة اللى تتلاشى قدامهم سطوة حصانة مجلس الشعب...... لذلك من فترة قصيرة قررت انى هستخدم المحور رغم المسافة الابعد و وقت الوصول الاطول...... لكن فى المقابل راحة البال الى حد كبير لان معظم العربيات ملاكى و الاغلبية ملتزم بحارته و بسرعة الطريق ان لم يكن حبا فى الالتزام فعلى الاقل خوفا من الرادار و المخالفة....... وهذا هو فعلا الفرق

المحور سيدي الفاضل هو طريق الوزراء و كبار المسؤلين لذا فعليه رقابة و تأمين مروري بعدد من الرادارات الغير متوافرة علي أغلب ان لم يكن كل الطرق المصرية

و اللي يؤكد كلامي و برضه كلامك ما كنت أشهده من فوضي و سيطرة ديناصورات طريق القاهرة / السويس و لعل ماتعرضت له من حادث بسبب احدهم في شهر 12 الماضي خير دليل و كان ذلك علي مرئي و مسمع من نقطة الكمين و قيادة الطريق

أما بالامس و اثناء ذهابي الي السويس ثم عودتي منها فقد وجدت الوضع و قد تغير , وجدت ألتزام غير مسبوق من سائقي النقل علي وجه الخصوص و السبب طبعا وجود 3 لجان علي الطريق و رادارات عند (مدينتي - بدر - الشروق) بالاضافة الي رادار بعد بوابة السويس

هو ده الحل سيدي الفاضل , العقاب الرادع لكل من ينتهك القانون و يهدد سلامة الاخرين

المشكلة مش العربية النقل و لا الملاكي
المصيبة في الناس اللي بتعدي الشارع من غير حتى ما يفكر أنه يبص فيه حاجة جاية و لا لأ و لما تكلمه يزعل و ممكن يتخانق فيك كأن الشارع بتاع أهله .........
كمان التوكتوك و الموتوسيكلات و الكارو و الحناطير دول أخطر بكتير من العربيات النقل و لا الملاكي و حتى كمان التاكسي و الميكروباص .............

ممكن يكون فعلا النقل حوادثه اصعب ونائجها كارثة لكن كمان حوادث السيارات كتير جدا بسبب التهور والسرعة

بالنسبة للنقل ففى كتير جدا منهم بالذات الكبار فى السن شوية بقاله من 10 -20 سنة على الطريق ممكن يبات فى العربية بيسافر بيها أيام و ليالى من الأخر عارف العربية و العربية عارفاه و ما بيلعبش السواقة مش شغلته بعد الضهر أكل عيشة مينفعش يقف بسبب عطل فى العربية فبيحترم العربية و بقدرها حتى تلاقيها بتعيش على عكس النص نقل و التاكسى الى غالبا بيبقوا واخدنها لعبة بالذات التاكسى الى غالبا دى بتبقى شغلانه بعد الضهر و النص نقل بيفكر غنه راكب ملاكى
ملخص كلامى أى حادثة بتتسبب فيها عربية نقل 90% مش غلطة سواق النقل و بتبقى غلطة الملاكى الى مش عارف قد إيه سواقة النقل صعبة جدا"18 نقلة فى الفتيس و مقطورة " بجد ربنا يكون فى عون سواقين النقل
الإستهتار الى بنشوفه من ناس منهم فما هو إلا نتيجة لضغوط ناتجة عن إلتزامه بمعاد تسليم

أنا ماردتش أعقب إلا لما أسمع الكلمتين دول ، لأنى أنا أصلاً ببقا ماشى مطمن وأنا سايق جنب نقل أو أوتوبيس أو ميكروباص سياحة لأن كلهم سواقين بجد وقاريين المرايات والشارع كويس وبتلاغيه ويلاغيك بالكلاكس والإشارات فبتبقوا فاهمين بعض مين ناوى على إيه ، هتاخد الغرزة اللى قدامه ولا هتستنى وهو يشد ، تطلع منه دلوقتى ولا فيه حاجة جاية فى المقابل ، أما بقا الرعب بالنسبة لى بيبقا فى بتوع الملاكى خصوصاً لو واحدة ست لأن كتير من الملاكى بيبقا ماشى فاكر نفسه فى الصحرا ومافيش حد معاه ولا بيبص فى مرايات ولا فاهم حاجة عن أى حاجة وتيجى تطلع من جنبه تلاقيه بيرمى عليك مش بيوسعلك وحاجات غريبة بتحصل ، إنما سواقين النقل بيبقا شايفينك ولما بيغلسوا بيغلسوا بمزاجهم مش عن جهل عشان واحد إستفزه وإتمنظر بغرزة مالهاش لازمة من قدامة أو قطع عليه فى تقاطع وخلاه يهدى ودى أكتر حاجة بتغيظهم لأنه عقبال ما بيجمع وياخد سرعته تانى بياخد وقت إنما لو داخل عليه بتلاغيه بالكلاكس ولا بالإشارات هتلاقى تعامل تانى خالص !!