سير كاتينة ثم عملية نصب، احذر ميكانيكى العلمين .
السلام عليكم،
ازيكم يا شباب،
كل سنة وانتوا طيبين،
الصراحة دى تعتبر اول مشاركه بجد ليا هنا من ساعة لما اشتركت،
يعنى كان بيمنعنى من المشاركه صعف معلوماتى فى مجال السيارات بعض الشئ،
لكن اما لقيت الناس هنا بسم الله ما شاء الله ايجابيه جدا، اتكسفت وقلت احاول اشارك معاكم على قدى كده،
المهم، انا هحكيلكم على موقف حصل معايا من كام شهر كده مش فاكر :?
كنت مسافر من القاهرة الى مرسى مطروح قبل الصيف والمصايف بشهر تقريبا،
كان معايا عربية فيرنا 1500 موديل 2005 وكانت ايجار،
المشكلة حصلت لعد ما طلعت من مرسى مطروح الساعة 2 بالليل وكنت لوحدى وطبعا الطريق كان فاضى خالص ومغرى جدا وانا متوصيتش طول الطريق ماشى 160/170
وصلت لغاية محطة دفع الرسوم بتاع العلمين ولقيت العربية فجأة بطلت..
ادور أبدا، أدرو تانى برضه ابدا حالفه يمين ما تدور وتكسفنى ...
كان فيه واحد سواق نقل داخل وساعدنى لغاية ما ركنت جنب البوابه،
صراحة معرفتش أعمل ايه، العربية فيها كهربه لكن مش عايزه تدور خالص،
هوه جه تطوع واقترح يدينى زقه قلت مفيش مانع،
لكن برضه العربية قفلت معاها خالص،
فتح الكبود وفعد يبص على شويه حاجات وقالى شوف كده ليكون فيه فيوز ضارب لكن برضه مفيش فايده.
اضطريت انتظر للصبح فى العربية علشان أنزل اشوف ميكانيكى فى العلمين،
دى طبعا اول مرة انزل العلمين،
سألت على ميكانيكى قالولى قدام شوية، اسمه عبده الجهينى،
رحت بعت معايا واحد يشوف العربية وقالى لازم نوديها الورشه لأنه شاكك لتكون سير كاتينه،
طبعا انا ولا أعرف يعنى ايه سير كاتينه ده اصلا،
المهم قطرنا العربية ووديناها الورشة وطلع فعلا سير كاتينه والراجل قالى احتمال تكون جابت صبابات.
الموضوع اتعقد اكتر،
الراجل طبعا قالى انه لازم ينزل اسكندرية علشان يجيب سير الكاتينه من التوكيل،
سلمت بالأمر الواقع واستنيت يوم كامل وفى الآخر جانت المفاجأة ان العربية جابت صبابات..
قلتله خلاص انزل بيها القاهره قالى متقلقش خالص الموضوع بسيط وهوه ممكن يقوم بيه،
المهم سيبت العربية علشان يعملها الصبابات دى،
الموضوع أخد 3ايام على ما عملها عند الخراط زى ما قالى وعلى ما العربية تلين،
انا للأسف مسلم بالوضع تماما لأنى معرفش أى حاجه عن اللى هوه بيتكلم عنه ده،
العربية كانت عاملة 48000 او 68000 كم مش متذكر،
كلمت الراجل اللى انا مأجرها منها وقالى مفيش مشاكل، وهوه الصراحه كان متفاهم خالص.
الميكانيكى بقى خلص ودفعنى حوالى 1500 جنية مقابل سير الكاتينه والصبابات وجوان وش سلندر ومش عارف بلى أو شداد حاجه كده مش فاكرها،
أخدت العربية واتحركت لقيتها مش مظبوطه خالص وبتبطل كل شويه وحالتها صعبه خالص،
قلتله قالى دى علشان بس لسه بتلين !
نزلت القاهره قلت لواحد صاحبى على الموضوع قالى طيب خلينا نوريها لميكانيكى ورا سوق السيارات
تقريبا،
الراجل قلنا الموتور ده متحلش والجوان زى ما هوه !!
طبعا على قد ما دمى غلى على قد ما حمدت ربنا ان الراجل المفترى مفتحش الموتور وقعد يلعب،
رحت لمكتب الإيجار وقلتله ان العربية جابت سير كاتينه وهوه اتعمل لكن العربية مش مظبوطه،
أخدها وداها للميكانيكى اللى بيتعامل معاه قاله ان فيها صبابات وعايزه تتعمل،
فى الآخر الراجل عملها ببتاع 400 جنيه على ما أتذكر وكمان قسمنا التكلفه بالنص بينى وبين صاحب المعرض.
والحمد لله على كل حال.
وادينى عرفت ان فيه حاجه اسمها سير كاتينه وانى محاولش ادور العربية لو السير اتقطع ..
بس بعد ايه ... :(
