الموضوع: فيلم ابراهيم الابيض

الفيلم من اخراج مروان حامد.

من ناحية الإخراج أنا شايفه عادى مفيش جديد وبعض المشاهد كان ممكن تنفذ بشكل أفضل من كدة بكتير.

القصة تعبانة أوى وغير مترابطة وبصراحة خرجت من فيلم ملوش قصة !!

التمثيل كان حلو من ناحية محمود عبد العزيز وعمرو واكد ، أحمد السقا كان شغال لكن فيه أحسن ، هند صبرى بقى وباقى الكاست كان المستوى متواضع جدا ً.

مستوى الصوت فى الفيلم من حيث الموسيقى والباك جروند كان ممتاز.

فى النهاية الفيلم ياخد منى مش أكتر من 6/10.

انا رأيى الشخصى ان الفيلم رائع


محمود عبد العزيز جامد جدا و مخلى الفيلم ليه طعم

المشاركة الأصلية كتبت بواسطة camaro

معلش يا حماعة أنا لي رأي في الأفلام دي ..
إحنا كل فيلم نقعد نقول دة فيه رسالة .. فيه رسالة .. كلمة بتتكرر كثير من ناس كثير مننا أو من المخرجين أو العاملين في مجال التمثيل .. و كلمة ثانية كمان بيقولوها و هي ( دة الفيلم دة بيتناول مشكلة كذا أو كذا ) .. معلش يعني إيه بيتناولها .. يعني بياكلها على العشاء و لا إيه .. لأن دي بقت حجة عند العاملين في مجال السينما و أيضا الكثير مننا بيقولوها ..
و كمثال بسيط فيلم خالد يوسف اللي كان فيه تقريبا عمرو سعد و هالة فاخر و سمية الخشاب و غادة عبد الرازق اللي كان من سنة مش فاكر اسمه بصراحة .. الفيلم دة لما طلع خالد قال دة بيتناول مشكلة العشوائيات و مشكلة كذا و كذا .... يا فرحتي و يا هنايا و منايا أعمل بيه إيه ما الشعب كله عارف إن المشكلات دي موجودة في البلد .. أضاف إيه بقى الفيلم .. لو كان عرض حلول مقترحة للمشكلات دي ماشي تمام أو حتى إسهامات في حلها أهلا و سهلا غير كدة يبقى اسمه في الأول و الآخر فيلم بيعرض في السينما ..
أما موضوع رسالة و مش رسالة فدة كله في رأيي اسمه كلام فاضي .. نتيجة لنفس الكلام السابق ..
أما لو عملت فيلم بتوضح فيه أخطار الإدمان و علاجه ففي الحالة دي الفيلم بيكون له رسالة مثلاَ موجهة للشباب أو على حسب موضوع الفيلم ..

و آسف على الإطالة بس حبيت أقول رأيي ..

لأ طبعاً. الفيلم عشان يكون له رسالة مش لازم يقدم حلول مقترحة للمشكلات اللي بيعرضها.

مجرد عرض المشكلة ممكن يعتبر رسالة توعية أو خلق تعاطف المشاهدين مع ضحايا المشكلة أو (في اضعف الايمان) مجرد توثيق للمشكلة. ممكن يكون دور الفيلم هو استفزاز المشاهدين للتفكير في المشكلة وربما الوصول لحلول ممكنة.

وممكن الفيلم يكون من غير رسالة بانه يكون ممتع فقط. مش عيب خالص.
زي كتير من أفلام الأكشن والاثارة والرعب والرومانسية اللي ممكن يكون مستواها الفني عالي من حيث التصوير أو الموسيقى أو حبكة القصة واثارتها ولكن لا تعرض أي مشكلة جديه.