صوت الكاوتش مع الفرامل

**nasroo** · 04-06-2009 10:24 AM

المشاركة الأصلية كتبت بواسطة merosss

هو تقريبا فى علاقة بين الصوت دة ونوع الطريق الى ماشى علية فى ملف معين كدة فى طريق المرصد الى بمشى علية كل يوم

ساعات انا كمان بيعمل معايا كده في نفس الحتة دي على طريق المرصد - انت من حلوان؟

**souzoran** · 04-06-2009 12:50 PM

المشاركة الأصلية كتبت بواسطة أبو صلاح

يعجبني قوي كده اللي يدخل المنتدى يرمي قنبلة ويطلع يجري

يا راجل حرام عليك زرجينة ايه بس :t_thum1[1]:
بتحسسني كانك بتقوله غير بوجيه
ههههههههههههههههههه

انا مارمتش قنبله وجريت انا لسه شايف الردود دلوقتى وفيه حاجه عايز اوضحها الزوايا حاجه وفتح العجله او قفلها حاجه تانيه لو العربيه بتحدف منك شمال او يمين تبقى زوايا لو الكاوتش بيصفر فى الملفات او مع الفرامل فى العدل يبقى ديه العجله مفتوحه او مقفوله و وبيكشف عليها بجهاز مخصوص وبتتعالج بالزرجينه

**MMamdouh** · 04-06-2009 12:58 PM

المشاركة الأصلية كتبت بواسطة souzoran

الزوايا حاجه وفتح العجله او قفلها حاجه تانيه

ازاى؟؟؟ امال بتاع الزوايا بيعرف منين ان فيه مشكلة محتاجة زرجينة؟؟؟... مهى لو ملهاش علاقة بالزوايا يبقى ملهاش علاقة ببتاع الزوايا

لو العربيه بتحدف منك شمال او يمين تبقى زوايا

ماشى ولو انة مش شرط... مكن يبقى عندك فردة بايظة او ضغط الكاوتش مش صح و دة يسبب حدفة

لو الكاوتش بيصفر فى الملفات او مع الفرامل فى العدل يبقى ديه العجله مفتوحه او مقفوله

فتح او قفل العجلة مشكلة زوايا صرف و مبتتعالجش بزراجين اساسا

و وبيكشف عليها بجهاز مخصوص

مين بقى اللى بيكشف عليها؟؟؟ بتاع الزوايا؟؟؟ ازاى و هى مش مشكلة زوايا؟؟

وبتتعالج بالزرجينه

الزراجين مبتعالجش العجل المفتوح او المقفول... زاوية الtoe بتتعدل من رجلاش بيض الدركسيون

MMamdouh

**nasroo** · 04-06-2009 01:09 PM

المشاركة الأصلية كتبت بواسطة mmamdouh

الزراجين مبتعالجش العجل المفتوح او المقفول... زاوية الtoe بتتعدل من رجلاش بيض الدركسيون
mmamdouh

هي الزرجينة دي بتعمل ايه؟

**MMamdouh** · 04-06-2009 01:24 PM

المشاركة الأصلية كتبت بواسطة souzoran

محمد ممدوح باشا انا مقتنع بكلامك بس انا حصلتى نفس المشكله و رحت لكذا واحد بتاع زوايا وكشف عليها وظبط الزوايا برده نفس المشكله كانت بتصفر فى الملفات فى الاخر رحت لواحد كويس وحكيتله الموضوع كان عنده جهاز بيكشف على العجل وقالى العجل عايز يتفتح شويه بسيطه وفعلا ظبطه والعربيه بقت تمام

بص... كبداية... اى حاجة ليها علاقة بوضعية العجل على الطريق بتصب فى قسم الزوايا... بالتالى طالما كانت مشكلتك فى العجل و احتاجت زرجينة يبقى الناس اللى كشفوا على العربية قبل كدة معندهمش فكرة او اجهزتهم مش مضبوطة

العجل له 3 زوايا و هم الcamber و ال caster و الtoe

فتح و قفل العجلة بيبقى من خلال الtoe و دة من خلال تعديل طول الذراع الواصل بين علبة الدركسيون و العجلة و الزاوية دى بتتحكم فى اتجاه العجلات و انت ماشى للامام... لو العجل مقفول بيبقى العجل اكنة باصص لبعضة و لو مفتوح بيبقى اكنة بيبعد عن بعضة زى ما هو واضح فى الرسم

الكامبر هو درجة ميل العجلة بالنسبة للطريق... و دى سهل اوى تميزهل لما تمشى ورا عربية BMW و تبص للعجل الخلفى و هى على طريق سريع تحس ان العجل طالع لبرة من تحت و كدة بتبقى زاوية الكامبر سالبة... و لو الزاوية دى فيها مشكلة بتحتاج زرجينة و بيتقال ان العجلة مقلوبة

اخر زاوية و هى زاوية الكاستر و دى نقدر نشرحها ببساطة انها زاوية ميل المساعد الامامى عن وضع الزاوية القائمة بالنسبة للطريق و دى لو فيها مشكلة بتحتاج زرجينة و بيقال ان العجلة ماخرة او مقدمة حسب الخلل الموجود فى وضع العجلة بالنسبة للوضع الطبيعى

معنى كدة ان فتح و قفل العجلات ملوش دعوة بالزراجين... فى الغالب انت كانت عندك مشكلة فى الكامبر (لان الراجل مقالش ان العجل مقدم او ماخر) و لو كلامى صح يبقى هو عمل زرجينة بين المساعد الامامى و فلنشة حديد ركبها على صرة العجلة... صح؟؟

MMamdouh