حد عايز حاجة من ابوحسين اوباما (الفرصة الأخيرة)

**ecybrarian** · 03-06-2009 10:19 PM

باراك اوباما المشهور بأبو حسين بين اصحابه في الشلة جاي مصر بكرة. والحقيقة ابو حسين مأكد علي يشوفني والشلة ونقعد قعدة من بتوع زمان قبل الحياة ما تاخدنا من بعض...ليك وحشة يابوحسين. المهم انا قلت ابعت اشوف يمكن في حد عايز يقدم له اي طلب انا في الخدمة..يمكن حد ساكن في عشوائيات كولومبيا عايز شقة في المساكن الجديدة في فيرجينيا..أو حد عايز وظيفة في شركة بترول لأولاده..او عايز يدخل المرافق في منطقتة..ابعت لي الطلب وانا هاوصله له...

المهم قادتني الأقدار إني اشوف بعض من العربيات المرافقة لأبوحسين النهارده..بس طبعا كان من المستحيل تصويرها. كلهم عربيات سوداء ماركة gmc وشيفورليه..ماتفهمش عربيات ولا دبابات!! بجد مش هزار. الغريب إن كلها عربيات gm إللي الحكومة الأمريكية رفضت تساعدها. العربيات لا يمكن تشوف اي حاجة جواها...الجنوط فيها أكتر من 30 مسمار!!!! وطبعا الكوتش غير قابل للاخطراق أو الحريق...وفيهم عربيتين فوق سقفهم اريال ضخم قطره لا يقل عن 10 بوصة وطوله بتاع 50 سم...أعتقد الأريال ده بتاع اعتراض الموجات اللاسلكية.

الأغرب عربية شكلها مابين suv والنقل بتاع الموبيليا!!!! لقيت واحد امريكاني راح فاتح باب وراه لوحة كنترول كأنه في مركبة فضاء...طبعا كل ده شفته في ثواني لأن كل الأمن كان مراقب كل إللي في الشارع...

عموما انتظروا صور مندوب نايل موتورز في لقاء الشلة بابوحسين باكر إن شاء الله

**NaderNabil** · 03-06-2009 10:31 PM

ده انا متفق معاه هاستقبله عند الصينية اللي قدام موقف العاشر علي الدائري....
و موضبله الحتة التويوتا الهاي إيس 2009 بالديفيدي و التكييف أمامي و خلفي و حاجة زي الفل...
إن شاء الله هانعمل شوية شغل زي الفل

**moudy88** · 04-06-2009 02:02 AM

انا كنت كلمته وعزمته عندي في البيت ولاقيته بيقولي انا مش فاضي ووريا مشواير وبتاع وسايب المدام والاولاد في البلد ( امريكا يعني ) ومش عايز يتاخر علشان يروح و مايباتش بره ...قلتله خلاص يا ابو سحس انا هاجيبلك الغدا لحد عندك في قصر القبه ..ووصيت الحاجه تجيب فرخيتين بلدي وصينيه رقاق وطبق ملوخيه وحله محشي وطبق فته و 5 ارغفه من ابو ربع جنيه (بلاش ابو شلن علشان االراجل ضيف)...وهوديلاه بكره

**badblood** · 04-06-2009 02:55 AM

ساندوتش همبورجر

**fady.bekatcho** · 04-06-2009 04:45 AM

الغريب ان كلها عربيات gm إللي الحكومة الأمريكية رفضت تساعدها

على فكرة امريكا هتدفع لجنرال موتورز معونة 30 مليار جنية مقابل 60 % من اسهمها

والحكومة الكندية 9 مليار وكام كدة مقابل 12% باين

واوباما هو الى اصر انة يقدم المعونة

وعملوا استطلاع اغلب شعب امريكا كان عايزها تتقفل نهائى

واوباما طلع تصريح انة لو اتقفلت اقتصاد امريكا والعربيات هيضرب

**ashouhdy** · 04-06-2009 04:56 AM

والنبى وصووة يجيبلى معاة كرتيين من اللى بيفوكوا القنوات المتشفرة

**msobhy** · 04-06-2009 09:34 AM

والله اوباما ده راجل جدع
عمل اللى كل مصرى فشل فيه بنسبة 100%
1-نظف الشوارع
2-رصف الشوارع (مع انها كانت مرصوفه)
3-ملئ الشوارع زرع وزهور (شكل جامعة القاهره يفرح)
4-دهن البيوت
5-نظم الحركه المرورية وقلل الكثافة المرورية وقلل الكثافة السكانية فى ضربة وحده (أستاذ ورئيس قسم)
6- والله العظيم مش بهزر انا عندى مشكله فى الجيوب الانفيه ودايما باتخنق من رائحة دخان وتلوث المحروسه - النهارده الدنيا بمبى بمبى بمبى بمبى

كل ده عمله فى 8 ساعات فقط
والنبى يا ابوحسين تقعد عندنا شوية يمكن حالنا ينصلح

**ashouhdy** · 04-06-2009 09:55 AM

المشاركة الأصلية كتبت بواسطة msobhy

والله اوباما ده راجل جدع
عمل اللى كل مصرى فشل فيه بنسبة 100%
1-نظف الشوارع
2-رصف الشوارع (مع انها كانت مرصوفه)
3-ملئ الشوارع زرع وزهور (شكل جامعة القاهره يفرح)
4-دهن البيوت
5-نظم الحركه المرورية وقلل الكثافة المرورية وقلل الكثافة السكانية فى ضربة وحده (أستاذ ورئيس قسم)
6- والله العظيم مش بهزر انا عندى مشكله فى الجيوب الانفيه ودايما باتخنق من رائحة دخان وتلوث المحروسه - النهارده الدنيا بمبى بمبى بمبى بمبى

كل ده عمله فى 8 ساعات فقط
والنبى يا ابوحسين تقعد عندنا شوية يمكن حالنا ينصلح

لأ ما حضرتك أول ما يروح بيتهم كل دة حيتشال فى 5 دقايق
شوفت بقى ان احنا أجدع ههههههههههههههههههههههههه هههههههه

**pro_samir** · 04-06-2009 02:04 PM

الراجل معذور يا جماعة معليش مكانش فاضى
يدوب اصلا لحقنا ، نزلت معاة اشترينا البدلة والقميص والكرافتة من وسط البلد علشان يلحق الخطاب
نزل متنكر على فكرة كان ضارب جلابية بلدى وعمة صعيدى ، بس كان شكلة عسل فيهم