اول صيانه للهيونداى أفانتى فى مركز الدلتا بالمنصورة
بسم الله الرحمن الرحيم
كنت محتار كتير اعمل صيانه للعربيه فين
وكنت متردد جدا اروح ابورواش على الرغم من انه جنبى
وكنت فى زياره لأحد أصدقائى فى المنصورة
قررت اجرب مركز الدلتا
وبالفعل رحت الساعه 9 صباحا كانو لسه قافلين
لقيتهم بيفتحوا الساعه 9 ونص
وبصراحه المعامله ممتازه من الوهله الولى
كان معايا الاستاذ / محمد صلاح فى الاستقبال
وطلب منى الرخصه واخد بيانات العربيه
وبصراحه ما بخلش عليا بأى معلومه انا طلبتها منه بخصوص الصيانه والنظام المتبع فى المركز
خصوصا انى من يوم ما جيبت العربيه ما عملتش ليها صيانه
اخد ملاحظاتى على العربيه
والحمد لله ما كانش فيها غير ان
الهواء بتاع التكييف بيخرج ضعيف جدا على الدرجات 1و2و3
وسالت الاستاذ محمد صلاح على نوع الزيت اللى بيتغير
قالى بنغير موبيل وتوتال على حسب طلب العميل
واتفضل مشكورا ركب العربيه ودخل بيها الصاله
وشربت الشاى ودخلت عند العربيه ولقيت الكبوت مرفوع وبينفضوا العربيه من التراب بخرطوم الهوا
وبعد كده فك فلتر الهوا ونظفو
وزود لى ميه المساحات
وتم رفع العربيه وغيرو الزيت (انا طلبت موبيل xhp)والفلتر
وتم تربيط العفشه بالكامل وفحص تيل الفرامل وفرامل اليدوطقم السيور والمساعدين
بعد كده العربيه نزلت وجه المهندس اللى هيكشف على المحرك الكترونيا بالجهاز
ركب فى العربيه وكنت معاه علشان اعرف ايه اللى بيحصل بالظبط
عشان انا مهندس كمبيوتر وحبيت اعرف الكشف الكترونيا هيكون ازاى
وبالفعل حط فيشه للجهاز تحت الطاره
وقالى الموتور تمام ولقيت ان الجهاز ده عباة عن وحده تحكم كامله فى العربيه
يعنى شغل الانوار والمساحات والميه والسنتر ولمبة الصالون والايرباج والabsوepsو
esp
على فكره المهندس عمل كاليبريشن لل eps
وسالته ليه؟؟؟؟؟؟
قالى العربيه خرجت من المصنع مش واخده على المطبات والطرق عندنا
والعربيه عملت 8000 كيلو وده بنعمله فى اى عربيه مع اول صيانه ليها
بتبقى العربيه والجهزه اللى فيها طبعت مع الطرق
بس نظام ال vdc ماكانش موجود عنده فماقدرش يعمل عليه تشيك
المهم وعمل تشيك على التكييف بدرجاته
وحاجات كتير والله انا مش فاكرها
وبعد كده خلص وجه واحد تانى وفك فلتر التكييف اللى كان مكتوم خالص وبعد تركيبه الهواء على الدرجات 1و2و3 بقى زى الاول
ولقيت الاستاذ محمد صلاح ركب العربيه
وخرج بيها فى الباركينج
وقالى اتفضل معايا فى الحسابات
دخل معايا وطبعلى فاتورة وكمان جدول الصيانه الدوريه
جـــ
الفاتوره تفصيليا جالون زيت 105
فلتر زيت 33
خدمة صيانة ال 10000 120
يعنى دفعت 258 جنيه
والسؤال هنا مش المفروض ان صيانة ال 10000 بيكون فيها تغيير الزيت والفلتر وفلتر البنزين؟؟؟؟؟
لو نعم
انا ليه دفعت ثمن الزيت والفلتر
ارجو الافاده لانى ما اكتشفتش كده الا بعد ما مشيت
ملحوظه
عنوان مركز الدلتا فى المنصوره
المنصورة - طلخا -طريق المحله دمياط السريع - امام موقف طلخا الجديد
9107572
0100624080
فاكس 9107573
ارجو ان اكون وفقت فى توضيح زيارتى الاولى للمركز مع اول صيانه ليا
ارق تحيتى
