اكبر تحدى ممكن حد يقابله فى حياته

**a4_n** · 04-10-2007 03:11 AM

السلام عليكم يا جماعه
انا لسه عضو جديد طازة :D وعندى طلب منكم وياريت ماتكسوفينيش
ربنا رزقنى بعربية من قديم الزمن موديلها من منتصفات القرن الماضى :roll:
هيا بلا فخر او عنطزه فيات 1100 سىسى موديل 59
طلبى باه منكم ان كل واحد فيكم يتخيل كده معايا انه بعد الشر بعد الشر يعنى عنده العربية دى زى حالاتى كده وعاوز يظبطها التظبيطه التمام بحيث تشتغل بكفاءة كافية ويتفشخر بيها برضه
يعنى حيعمل ايه فى كل من:
1 الموتور
2الهيكل من لون و اضافات لزوم الترويش
3 العفشه
4 الصالون
بس واكون شاكر جدا لو ساعتونى فى الموضوع الصعب ده
واه ياريت كل واحد حيتكرم ويقترح حاجه يقول سعرها والاقيها فين
وشكرا جزيلا
زيزو......عضو طازه

**amrrashed** · 04-10-2007 03:21 AM

اهم حاجة فى الموضوع ان اى تعديل يمكن يفوق تمنها الاصلى وزى ما انا شايف من بياناتك ان عندك اكسنت فلو العربية العربية الفيات دى عربية تانية يستحسن بلاش تعدل فيها اما لو هى العربية الوحيدة ممكن نتكلم بعد كدة

**a4_n** · 04-10-2007 04:05 AM

انا شاكر جدا لاهتمامك والرد على استفسارى بس 1100 تعتبر بتاعتى فعلا وهيه اول عربية اشتريها كانت رخيصه روحت جايبها عامله 3000 جنيه انما الاكسنت دى (ربنا يوعدنا) بتاعة والدى وعلى فكرة انا حغير البيانات دى
والفشكر تانى على اهتمامك
كل سنه وانت طيب :D

**ayman_elkholy** · 04-10-2007 04:07 AM

روح قلبى حقك تروش عربيتك بس انت كده ممكن تصرف عليها اكتر من ثمنها وهاتخصر فيها كتير
وشوف رأى باقى الاعضاء

**a4_n** · 04-10-2007 04:44 AM

انا بتكلم بس على اى حاجه تقومها تخلى اداءها احسن يعنى مثلا ايه الموتور الى يناسبها بحيث اسقطهلها

**a4_n** · 04-10-2007 05:03 AM

يا جماعه انتوفين عاوزاسمع مقترحاتكو انا عارف انه موضوع صعب حبتين بس مش عليكو يعنى انتو قدها وقدود

**hazem_khidr** · 04-10-2007 05:43 AM

اولا اهلا بيك معانا :)
ال 1100 ممكن يركب عليها اي موتور من مواتير الفيات العظيمه
بعني ممكن تركب مواتير من اول ال 124 لحد التمبرا!!!!!!!!
ما تستغربش فعلا المواتير دي بتركب عليها بسهوله بس اي موتور واحد كامه زي مواتير ال 131 و 124 انما موتور ال132 ال 2 كامه حيبقي صعب دخوله جوه جسم العربيه.
و بما ان موتور التمبرا بيركب في الشاهين اللي هيا 131 اساسا ف من السهل تركبه عندك و حيخلي العربيه ليها طعم تاني بس في حاله تركيبه حتضطر تجيب فتيس جر خلفي متوافق معاه زي فتيس الشاهين كده.و يا سلام لو ديفرنس بتاع 131 كمان تبقي كده ارتحت للابد من الميكانيكا بتاع العربيه و بقت طلقه ولا لانوس حتي تعرف تجيبك.
بالنسبه للون ف افضل لون تحطه عليها هو الاسود و علي فكره دا افضل لون للعربيات القديمه علشان لو النواكل بتاع العربيه ضايعه او مش موجوده ف الاسود بيغطي عليها كلها.
ممكن تركب طقم جنوط بتاع 132 2000 اللي هو المروحه بس تجيب بتاع ال 131 علشان يبقي مقاسه 13 زي المقاس بتاعك.
اما بالنسبه للصالون ف دا امره سهل و كل الحكايه انك تفك الكراسي و تظبطها و تروح لسروجي محترم و تجيب ليه حشو كراسي بتاع هيونداي او سويفت و يقصقصها علي قد الكراسي بتاعك و يكربها و يعمل فرش جديد و بكده تكون اخدت شكل و راحه الكراسي الحديثه احسن ما تنجدها زي كراسي الصاله.
فرش السقف برضه امر بسيط بتشتري الخامات و السروجي بيضبطها .
بالنسبه للتابلوه ممكن تفكه و تظبطه و علي ما اعتقد انه صاج عندك و يترش رشه نضيفه بلون العربيه الجديد و لو العدادات مكسوره حاول تشوف طقم في وكاله البلح او اي مكان حتفرق كتير في شكل العربيه.و ما تنساش الشبكه النيكل و فانوسين جداد علي اطواق للفوانيس نيكل حيخلوها تحفه من قدام.
بس دا فكرتي لو معايا عربيه زي دي و بحبها حعمل كده بس الكلام دا ممكن يصرف معاك فوق ال 7000 جنيه .