امبارح بالليل راجع البيت من صلاح سالم و قبل مطلع أكتوبر كان فيه حادثة و العربيات بتهدى، قبل الزحمة ب 300 متر كنت ماشى حوالى 60 و ابتديت اهدى و اديت فلاشر و كل حاجة تمام و فجأة لقيت اللى رزع فيه من الخلف، البنت لولو اتسرعت و هى و مامتها خبطوا فى الكرسى اللى جنبى - كانوا قاعدين ورا - و قعدت أهديهم و اطمنت عليه و نزلت و أنا متوقع الاقى الشنطة مبهدلة، اللى دخل فيه عربية أوبل فيكترا و الراجل كان زوق و قعد يغلط نفسه و قال انه اتلخبط و داس بنزين بدل فرامل، المهم نيجى للخساير، الأوبل كبوته اتعوج و فوانيسه اتدشدشت، اللانوس أكصدامها اتجرح فى مكانين حوالى 5 سم كل خربوش و بس، و الله العظيم أنا مش مصدق لغاية دلوقت ان الخبطة دى ما تعملش غير كده لدرجة انى اخدت اجازة النهاردة علشان اروح ارفعها و اخلى العفشجى يبص عليها بس الحمد و الشكر لله و بجد أنا احترامى للعربية دى زاد قوى.