الموضوع: العربيه بجد اتبهدلت.

من يوم ما اشتريت اللانوس وانا باحافظ عليها.
لكن للأسف امبارح اللي حصل غير كده.
.
كنت في اسكندرية وكنت في حاله نفسيه لا تسمح بالقياده نهائي سواء وانا رايح ولا وانا جاي
.
اسلوب القياده كان رياضي متعصب جدآ سواء في الذهاب او العوده.
في طريق العوده سخنت قصد حيوان كان سايق مرسيدس فياجرا s320 موديل 2002
وللأسف ولأول مره أقرص علي العربيه وأقفل الأمبير مع ان وصلة أجا ميت غمر ماتسمحش بكده نهائي والطريق كله مبات هوا.
والنتيجة ان العربيه طارت في مطب هوا وانا معدي ال 180 ... طبعآ كان احساس غبي ان ال 4 عجلات في الهواء والعربيه بتطظ علي الأرض وبتحاول تتحكم فيها. او انك تتخيل لحظيآ لو العربيه اتقلبت علي السرعه دي ايه اللي ممكن يحصل.
المهم ربنا سترها وقدرت الم العربيه.
وصلت امبارح 1 ص بالسلامه.

ولما جيت أشيك علي العربيه النهارده إتقفلت أكتر.

الشكمان من قدام عند علبة البيئة إتعوج وصوته مزعج.
الاكصدام متطبق من تحت ناحية الشمال من تحت
كاوتشة الكوبلن الشمال مقطوعة
كرسي الفتيس اتقطع خالص. والعربيه بقت تتكتف في الطلعه.
غير التزييق اللي ظهر في العافشة.
مروحة التكييف صوتها علي جدآ وفيها ريشتين مكسورين.

مع العلم اني امبارح افتريت علي العربيه أمريكاني وقرص ودريفتات وخلافه.
.
.
المهم بعيد عن النصح. لاني عارف كويس ان اللي حصل غلط والحمد لله ان ربنا سترها.
وده مش اسلوب قيادتي. وجايز ماسقتش عربيه بالاسلوب ده من سنه ونص تقريبآ.
وكان غلط أصلا اني اسافر مشوار طويل وانا متعصب.
.
انا مش عارف ابدأ بأيه ولا أيه.
العافشه اللي حصل فيها مستهلكات لكن مافيش حاجه جامده.
والعربيه مظبوطه علي الطريق مافيش حدفه ولا حتي رعشه في الدركسيون.
يعني الحمد لله الجنط سليم والمقصات وبارات الطرف وخلافه. ماعتقدش انها اتأثرت.

دلوقت أبدأ بأيه.
والليله دي حتتكلف كام...

Abo.Yousif